Railway | ദീർഘദൂര ട്രെയിനുകളിൽ കുപ്പി വെള്ളത്തിന് അമിത വില ഈടാക്കുന്നതായി പരാതി

കാസർകോട്: (KasargodVartha) യാത്രക്കാർക്ക് ഭക്ഷണമൊരുക്കാൻ പാൻട്രി സൗകര്യമുള്ള ദീർഘദൂര ട്രെയിനുകളിൽ കുപ്പിവെള്ളത്തിന് അമിതവില ഈടാക്കുന്നതായി പരാതി. 15 രൂപ രേഖപ്പെടുത്തിയ കുപ്പിവെള്ളത്തിന് പാൻട്രി ജീവനക്കാർ 20 രൂപ ഈടാക്കുന്നതായാണ് ആക്ഷേപം. 'റെയിൽ നീർ' എന്ന പേരിലാണ് 15 രൂപയുടെ കുപ്പി വെള്ളം യാത്രക്കാർക്ക് 20 രൂപയ്ക്ക് നൽകുന്നത്. 

വില കൂടുതലാണെന്ന് ചോദ്യം ചെയ്യുന്ന യാത്രക്കാരോട് പാന്‍ട്രി ജീവനക്കാർ പറയുന്നത്, പാന്‍ട്രി കാറിൽ നിന്ന് യാത്രക്കാരുടെ കമ്പാർട്ടുമെന്റുകളിലേക്ക് വെള്ളം എത്തിക്കുന്നതിനുള്ള അധിക ചാർജ് ആണെന്നാണ്. എന്നാൽ റെയിൽവേയുടെ നിയമങ്ങളിലോ നിർദ്ദേശങ്ങളിലോ ഇങ്ങനെയൊരു അധിക ചാർജ് ഈടാക്കാൻ അനുമതിയില്ല. ഇത് ജീവനക്കാരുടെ ഏകപക്ഷീയമായ തീരുമാനമാണെന്ന് യാത്രക്കാർ ആരോപിക്കുന്നു.

നേരത്തെ യാത്രക്കാരുടെ പരാതിയിൽ കുപ്പി വെള്ളത്തിന് അമിത വില ഈടാക്കുന്നതായി ശ്രദ്ധയിൽപ്പെട്ട റെയിൽവേ മന്ത്രാലയം കുപ്പിവെള്ളത്തിന് നിശ്ചയിച്ച തുക മാത്രമേ യാത്രക്കാർ നൽകാവൂ എന്നും, അമിത ചാർജ് ഈടാക്കുന്നവർക്കെതിരെ നടപടി ഉണ്ടാകുമെന്നും അറിയിച്ചിരുന്നു. എന്നാൽ ട്രെയിനിലെ പാന്‍ട്രി  ജീവനക്കാർ ഇതൊന്നും അറിഞ്ഞ മട്ടില്ല. ഇതുപോലുള്ള വിഷയത്തിൽ ടിക്കറ്റ് പരിശോധന ചുമതലയുള്ള ടിടിആറും ഇടപെടാറില്ല.

റെയിൽവേയ്ക്ക് പരാതിപ്പെടാം: 

ട്രെയിനിലെ യാത്രയ്ക്കിടയിൽ ഇത്തരത്തിലുള്ള ദുരനുഭവങ്ങളുണ്ടായാൽ, ഇന്ത്യൻ റെയിൽവേയ്ക്ക് ഉടൻ തന്നെ പരാതിപ്പെടാവുന്നതാണ്. അതിനായുള്ള വിവിധ മാർഗങ്ങൾ താഴെ നൽകുന്നു:

● ഹെൽപ്പ്ലൈൻ നമ്പർ: 139 എന്ന ടോൾ ഫ്രീ നമ്പറിൽ വിളിച്ചാൽ നിങ്ങളുടെ പരാതി രേഖപ്പെടുത്താം.
● ഓൺലൈൻ പോർട്ടൽ: ഇന്ത്യൻ റെയിൽവേയുടെ ഔദ്യോഗിക വെബ്സൈറ്റ് വഴി നിങ്ങളുടെ പരാതി ഓൺലൈനായി സമർപ്പിക്കാം.
● റെയിൽമദദ്: റെയിൽവേയുടെ 'റെയിൽമദദ്' എന്ന ഗ്രീവൻസ് ഫോം ഉപയോഗിച്ച് നിങ്ങൾക്ക് പരാതി നൽകാനും അതിന്റെ പുരോഗതി ട്രാക്ക് ചെയ്യാനും സാധിക്കും.
● എസ്എംഎസ്: 91-9717680982 എന്ന നമ്പറിലേക്ക് നിങ്ങളുടെ പരാതി എസ്എംഎസ് ആയി അയക്കാവുന്നതാണ്.
● സുരക്ഷാ പ്രശ്നങ്ങൾ: സുരക്ഷയുമായി ബന്ധപ്പെട്ട എന്തെങ്കിലും പ്രശ്നങ്ങളുണ്ടെങ്കിൽ 182 എന്ന നമ്പറിൽ വിളിക്കാവുന്നതാണ്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

long-distance trains complain about excessive charges for bottled water, sold at a rate higher than the official price.

#RailwayNews #TrainWaterPrice #KasaragodNews #IndianRailway #TravelIssues