ബൈക്ക് മോഷ്ടാക്കള്‍ പെരുകുന്നു; റെയില്‍വേ സ്റ്റേഷനില്‍ നിര്‍ത്തിയിട്ടിരുന്ന ബൈക്ക് കടത്തിക്കൊണ്ടുപോയി, പോലീസ് അന്വേഷണം ആരംഭിച്ചു

കുമ്പള: (www.kasargodvartha.com 24.05.2018) കുമ്പള റെയില്‍വേ സ്റ്റേഷനില്‍ ബൈക്ക് മോഷ്ടാക്കള്‍ പെരുകുന്നതായി പരാതി. ബുധനാഴ്ച റെയില്‍വേ സ്റ്റേഷനില്‍ നിര്‍ത്തിയിട്ടിരുന്ന ബൈക്ക് മോഷണ സംഘം കടത്തിക്കൊണ്ടുപോയി. മംഗളൂരുവില്‍ ജോലി ചെയ്യുന്ന സൂരംബയിലിലെ അഭിനന്ദിന്റെ കെഎല്‍ 14 യു 4183 എഫ് സെഡ് ബൈക്കാണ് മോഷണം പോയത്.


ബുധനാഴ്ച റെയില്‍വേ സ്‌റ്റേഷനില്‍ പാര്‍ക്ക് ചെയ്ത് ജോലിക്ക് പോയതായിരുന്നു. തിരിച്ചെത്തിയപ്പോഴാണ് ബൈക്ക് മോഷണം പോയതായി വ്യക്തമായത്. അഭിനന്ദ് കുമ്പള പോലീസില്‍ പരാതി നല്‍കിയിട്ടുണ്ട്. സംഭവത്തില്‍ പോലീസ് അന്വേഷണം ആരംഭിച്ചു. ബൈക്ക് മോഷണത്തിനു പിന്നില്‍ കര്‍ണാടക മോഷണസംഘമാണെന്നാണ് പോലീസ് സംശയിക്കുന്നത്. ഇതിന്റെ അടിസ്ഥാനത്തില്‍ അന്വേഷണം ഊര്‍ജിതമാക്കിയതായി കുമ്പള എസ് ഐ അശോകന്‍ കാസര്‍കോട് വാര്‍ത്തയോട് പറഞ്ഞു.