Infrastructure | മഴയെത്തും മുൻപേ നടപടി വേണം; കുമ്പള ദേശീയപാതയിൽ ബസ് കാത്തിരിപ്പ് കേന്ദ്രങ്ങൾ അനിവാര്യം

കുമ്പള:(KasargodVartha) കനത്ത വേനൽ മഴ പോലും ചൂടിന്റെ കാഠിന്യം കുറയ്ക്കാത്ത അവസ്ഥയിൽ, തണൽ മരങ്ങളില്ലാത്ത ദേശീയപാതയിൽ ബസ് കാത്തുനിൽക്കുന്ന യാത്രക്കാർ വിയർത്തൊലിക്കുകയാണ്. ചൂടിന്റെ വർദ്ധനവ് യാത്രക്കാരുടെ ദുരിതം ഇരട്ടിയാക്കുന്നു.

ദേശീയപാതയിലെ സർവീസ് റോഡുകളുടെ നിർമ്മാണം പലയിടത്തും പൂർത്തിയാകാത്തതിനാൽ ബസ് കാത്തിരിപ്പ് കേന്ദ്രങ്ങൾ സ്ഥാപിക്കുന്നതിനുള്ള നടപടികളും അനിശ്ചിതത്വത്തിലാണ്. 

025 മാർച്ച് മാസത്തോടെ ബസ് കാത്തിരിപ്പ് കേന്ദ്രങ്ങൾ സ്ഥാപിക്കാൻ കഴിയുമെന്ന് യുഎൽസിസി അധികൃതർ നേരത്തെ അറിയിച്ചിരുന്നെങ്കിലും, ദേശീയപാത നിർമ്മാണത്തിന്റെ 15 ശതമാനത്തോളം ജോലികൾ ഇനിയും ബാക്കിയുള്ളതിനാൽ ബസ് കാത്തിരിപ്പ് കേന്ദ്രങ്ങൾ, നടപ്പാത, സർവീസ് റോഡ് എന്നിവയുടെ നിർമ്മാണം പൂർത്തിയാകാൻ കൂടുതൽ സമയമെടുക്കുമെന്നാണ് സൂചന.

അസഹനീയമായ ചൂട് കാരണം ബസ് കാത്തിരിപ്പ് കേന്ദ്രങ്ങൾ യുദ്ധകാലടിസ്ഥാനത്തിൽ സ്ഥാപിക്കണമെന്നാണ് യാത്രക്കാരുടെ പ്രധാന ആവശ്യം. ഉച്ചസമയങ്ങളിൽ ബസ് കാത്തുനിൽക്കുന്ന പ്രായമായവർക്കും, സ്ത്രീകൾക്കും, കുട്ടികൾക്കും സൂര്യാഘാതം ഏൽക്കുകയും ബോധക്ഷയം സംഭവിക്കുകയും ചെയ്യുന്നതായും, പൊള്ളലേറ്റതായും റിപ്പോർട്ടുകൾ പുറത്തുവരുന്നുണ്ട്. 

ചൂടിൽ നിന്ന് സംരക്ഷണം നേടാൻ സർക്കാർ നിർദ്ദേശങ്ങൾ നൽകിയിട്ടുണ്ടെങ്കിലും, അത് പ്രായോഗികമായി നടപ്പിലാക്കുന്നതിൽ പരിമിതികളുണ്ടെന്ന് ബന്ധപ്പെട്ടവർ തന്നെ സമ്മതിക്കുന്നു. കൂടാതെ, തൊഴിൽ ചെയ്യുന്നവരുടെ സമയക്രമം പോലും പാലിക്കപ്പെടുന്നില്ലെന്ന ആക്ഷേപവും ശക്തമാണ്.

അതിനിടെ, ദേശീയപാത വികസനത്തിന്റെ ഭാഗമായി പാതയോരങ്ങളിൽ തണൽ മരങ്ങൾ വെച്ചുപിടിപ്പിക്കുമെന്ന അധികൃതരുടെ വാഗ്ദാനവും പാഴ് വാഗ്ദാനമായി മാറുകയാണ്. സർവീസ് റോഡിന് സമീപം മരങ്ങൾ നടാൻ പോലും സ്ഥലമില്ലാത്ത അവസ്ഥയാണ് പലയിടത്തുമുള്ളത്. 

സർവീസ് റോഡിന് അടുത്തായി നിർമ്മിക്കുന്ന നടപ്പാതയ്ക്ക് പോലും പലയിടങ്ങളിലും സ്ഥലസൗകര്യമില്ല. ഭൂമി ഏറ്റെടുക്കലുമായി ബന്ധപ്പെട്ട് നേരത്തെ ഉയർന്ന വ്യാപകമായ പരാതികൾ ശരിവയ്ക്കുന്നതാണ് ഇപ്പോഴത്തെ സ്ഥലമില്ലായ്മ.

മെയ് മാസത്തിന്റെ പകുതിയോടെ മഴക്കാലം ആരംഭിക്കുകയും ജൂണിൽ സ്കൂളുകൾ തുറക്കുകയും ചെയ്യും. അതിനുശേഷം മഴ നനഞ്ഞുകൊണ്ട് ബസ് കാത്തുനിൽക്കേണ്ട ഗതികേടിലാകും യാത്രക്കാരും വിദ്യാർത്ഥികളും. ഇത് അവർക്ക് വലിയ ദുരിതത്തിന് കാരണമാകും. അതിനാൽ, ബസ് കാത്തിരിപ്പ് കേന്ദ്രങ്ങൾ അടിയന്തിര പ്രാധാന്യത്തോടെ സ്ഥാപിക്കണമെന്നാണ് യാത്രക്കാരുടെയും നാട്ടുകാരുടെയും ഏകകണ്ഠമായ ആവശ്യം.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Passengers waiting for buses on the Kumbala National Highway are suffering due to the intense heat and lack of bus shelters. The delay in service road construction is hindering the installation of these shelters, leading to urgent calls for immediate action before the monsoon.

#Kumbala #NationalHighway #BusShelter #PublicTransport #Kerala #HeatWave