മാര്‍ക്കറ്റില്‍ 25 ലക്ഷം രൂപ വിലവരുന്ന ഹാഷിഷ് ഓയിലുമായി യുവാവ് എക്‌സൈസ് പിടിയില്‍; പിടിയിലായത് പെയ്ന്റിംഗ് തൊഴിലാളി, ഹാഷിഷ് ഓയില്‍ എത്തിച്ചത് ബംഗളൂരുവില്‍ നിന്നെന്ന് മൊഴി, അന്വേഷണം തുടരുന്നു

കണ്ണൂര്‍: (www.kasargodvartha.com 09.05.2019) മാര്‍ക്കറ്റില്‍ 25 ലക്ഷം രൂപ വിലവരുന്ന ഹാഷിഷ് ഓയിലുമായി യുവാവ് എക്‌സൈസ് പിടിയിലായി. ചിറക്കല്‍ പുതിയതെരുപള്ളി ക്വാര്‍ട്ടേഴ്‌സില്‍ താമസിക്കുന്ന സി പി റാസിമിനെ (25)യാണ് എക്‌സൈസ് സംഘം പിടികൂടിയത്. ഇയാളില്‍ നിന്നും 553 ഗ്രാം ഹാഷിഷ് ഓയില്‍ പിടിച്ചെടുത്തു. റാസിം ഓടിച്ചിരുന്ന സ്‌കൂട്ടറും കസ്റ്റഡിയിലെടുത്തു. പെയ്ന്റിംഗ് തൊഴിലാളിയാണ് റാസിം.

ഹാഷിഷ് ഓയില്‍ എത്തിച്ചത് ബംഗളൂരുവില്‍ നിന്നാണെന്നാണ് ചോദ്യം ചെയ്യലില്‍ പ്രതി എക്‌സൈസിന് മൊഴി നല്‍കിയിരിക്കുന്നത്. ഇതിന്റെ അടിസ്ഥാനത്തില്‍ അന്വേഷണം ആരംഭിച്ചതായും ഹാഷിഷ് കടത്തിനു പിന്നില്‍ സംഘം തന്നെ പ്രവര്‍ത്തിക്കുന്നുണ്ടോയെന്ന് പരിശോധിച്ചു വരുന്നതായും എക്‌സൈസ് ഉദ്യോഗസ്ഥര്‍ അറിയിച്ചു.