കാഞ്ഞങ്ങാട്ടേക്ക് മണല്‍ കടത്തിവരികയായിരുന്ന പച്ചക്കറിലോറി പാലക്കുന്നില്‍ പിടിയില്‍

File Photo

ബേക്കല്‍: കര്‍ണാടകയില്‍ നിന്നും കാഞ്ഞങ്ങാട്ടേക്ക് അനധികൃതമായി മണല്‍കടത്തിവരികയായിരുന്ന പച്ചക്കറി ലോറി പാലക്കുന്നില്‍ പോലീസ് പിടിയിലായി. ശനിയാഴ്ച രാവിലെയാണ് മംഗലാപുരത്തു നിന്നും മണലുമായി വരികയായിരുന്ന കര്‍ണാടക രജിസ്‌ട്രേഷന്‍ നമ്പറുള്ള കെഎ 19ഡി- 8131 നാഷണല്‍ പെര്‍മിറ്റ് ലോറി പാലക്കുന്നില്‍ വാഹന പരിശോധന നടത്തുകയായിരുന്ന ബേക്കല്‍ എസ്.ഐ. എം.പി. രാജേഷിന്റെ നേതൃത്വത്തിലുള്ള പോലീസ് സംഘം പിടികൂടിയത്. മുകളില്‍ പച്ചക്കറിയും അടിയില്‍ പൂഴിയും നിറച്ചാണ് ലോറി എത്തിയത്.

ഡ്രൈവറെ പോലീസ് ചോദ്യം ചെയ്തപ്പോള്‍ മംഗലാപുരത്തു നിന്നും കാഞ്ഞങ്ങാട്ടേക്ക് പൂഴി കടത്തുകയായിരുന്നുവെന്ന് വെളിപ്പെടുത്തി. ലോറി കസ്റ്റഡിയിലെടുത്ത പോലീസ് ഡ്രൈവറെ അറസ്റ്റ് ചെയ്തു.
കര്‍ണാടകയിലെ വിവിധ ഭാഗങ്ങളില്‍ നിന്നും കാസര്‍കോട്ടേക്കും, കേരളത്തിലെ മറ്റ് ജില്ലകളിലേക്കും വന്‍തോതിലാണ് യാതൊരു രേഖകളുമില്ലാതെ മണല്‍ കടത്തുന്നത്.