കുടുംബവഴക്കിനിടെ യുവാവിന് വാക്കത്തികൊണ്ട് തലയ്ക്ക് വെട്ടേറ്റു

ബുധനാഴ്ച രാത്രി 9.30 മണിയോടെയാണ് സംഭവം. കാര്‍ബണേറ്റ്‌സ് പ്രൈവറ്റ് ലിമിറ്റഡ് എന്ന സ്ഥാപനത്തിന്റെ കേരള റപ്രസെന്റേറ്റീവായ നാരായണന്‍കുട്ടി കടയില്‍ നിന്നും സാധനങ്ങള്‍ വാങ്ങി വീട്ടില്‍ തിരിച്ചെത്തിയപ്പോള്‍ വൈകി വീട്ടിലെത്തിയത് എന്തിനാണെന്ന് ഭാര്യ കയര്‍ത്ത് ചോദിച്ചതോടെ ഇരുവരും തമ്മില്‍ വഴക്കുണ്ടായി. തുടര്‍ന്ന് ഭാര്യ വിവരം ചാലിങ്കാലിലെ വീട്ടിലേക്ക് ഫോണ്‍ ചെയ്ത് അറിയിച്ചു. രാത്രി 10 മണിയായതോടെ ഭാര്യയുടെ മാതാവ് തങ്കമണിയും സഹോദരന്‍ ശ്രീകുമാറും പുതിയകണ്ടത്തിലെ വീട്ടിലെത്തുകയും നാരായണന്‍കുട്ടിയുമായി വഴക്ക് കൂടുകയും ചെയ്തു.

ഇതിനിടെ തങ്കമണി നാരായണന്‍കുട്ടിയുടെ ആറ് മാസം പ്രായമുള്ള ആണ്‍കുട്ടിയെയും കൊണ്ട് പോകാന്‍
ശ്രമിച്ചു. കുട്ടിയെ പിടിച്ചുവാങ്ങാനുള്ള ശ്രമത്തിനിടെ നാരായണന്‍കുട്ടി തങ്കമണിയെ തള്ളിവീഴ്ത്തി. ഇതില്‍ പ്രകോപിതനായ ശ്രീകുമാര്‍ വാക്കത്തികൊണ്ട് നാരായണന്‍കുട്ടിയുടെ തലയ്ക്ക് വെട്ടുകയായിരുന്നു. ബഹളം കേട്ട് പരിസരവാസികള്‍ ഓടിയെത്തിയതോടെ ശ്രീകുമാര്‍ ബൈക്കില്‍ കടന്നുകളയുകയായിരുന്നു. തലയ്ക്കും നെറ്റിക്കും ഗുരുതരമായി പരിക്കേറ്റ നാരായണന്‍കുട്ടിയെ മാവുങ്കാലിലെ സ്വകാര്യ ആശുപത്രിയില്‍ പ്രവേശിപ്പിച്ചിരിക്കുകയാണ്.