യു.ഡി.എഫ്. പ്രസ്ഥാനത്തിന് അടിത്തറ പാകിയത് സി.എച്ചും കെ.കരുണാകരനും: കെ. മുരളീധരന്‍

കാഞ്ഞങ്ങാട്: ഇന്നത്തെ കരുത്തുറ്റ യു.ഡി.എഫ്. പ്രസ്ഥാനത്തിന് അടിത്തറ പാകിയത് സി.എച്ച്. മുഹമ്മദ് കോയയും ലീഡര്‍ കെ.കരുണാകരനുമാണെന്നും കോണ്‍ഗ്രസും മുസ്‌ലിം ലീഗും അന്ന് തുടങ്ങിവെച്ച ബന്ധത്തിനും സൗഹൃദത്തിനും ഒരു പോറലും ഏല്‍പ്പിക്കാന്‍ ആര്‍ക്കും കഴിഞ്ഞിട്ടില്ലെന്നും കെ.പി.സി.സി. മുന്‍പ്രസിഡണ്ട് കെ.മുരളീധരന്‍ എം.എല്‍.എ. പറഞ്ഞു. കാഞ്ഞങ്ങാട് സി.എച്ച്. ഫൗണ്ടേഷന്റെ ആഭിമുഖ്യത്തില്‍ നടന്ന സി.എച്ച്. അനുസ്മരണ ചടങ്ങില്‍ പ്രഭാഷണം നടത്തുകയായിരുന്നു അദ്ദേഹം. തൃശൂരിലെ മുരളി മന്ദിരത്തില്‍വെച്ചാണ് കെ. കരുണാകരനും സി.എച്ച്. മുഹമ്മദ് കോയയും യു.ഡി.എഫ് എന്ന ആശയത്തിന് തുടക്കം കുറിച്ചത്. കോണ്‍ഗ്രസിന് തിരിച്ചടിയുണ്ടായ കാലത്തുപോലും അടിയുറച്ച് കോണ്‍ഗ്രസിനൊപ്പം തന്നെ നില്‍ക്കാന്‍ മുസ്‌ലിം ലീഗിനെ പ്രേരിപ്പിച്ചത് സി.എച്ചിന്റെ ആദര്‍ശത്തിലധിഷ്ഠിതമായ വ്യക്തിത്വം കൊണ്ടാണെന്നും മുരളീധരന്‍ പറഞ്ഞു.