സ്വര്‍ണക്കടത്ത്: 2 ജ്വല്ലറി ഉടമകള്‍ അറസ്റ്റില്‍; എയര്‍ ഇന്ത്യ ജീവനക്കാരന്റെ വീട്ടില്‍ റെയ്ഡ്

കാസര്‍കോട്: കരിപ്പൂരില്‍ 84 ലക്ഷം രൂപ വിലവരുന്ന സ്വര്‍ണക്കള്ളക്കടത്തുമായി ബന്ധപ്പെട്ട കാസര്‍കോട്ടെ രണ്ടുജ്വല്ലറി ഉടമകളെ കസ്റ്റംസ് ആന്‍ഡ് സെന്‍ട്രല്‍ എക്‌സൈസ് വിഭാഗം അറസ്റ്റുചെയ്തു. കാസര്‍കോട്ടെ ജ്വല്ലറി ഉടമകളായ ഷംസുദ്ദീന്‍, എ.എസ്.മഹ്മൂദ് എന്നിവരെയാണ് കസ്റ്റംസ് അധികൃതര്‍ അറസ്റ്റുചെയ്തത്.

ഇവരെ എറണാകുളത്തെ സാമ്പത്തിക കുറ്റകൃത്യങ്ങള്‍ക്കുള്ള കോടതിയില്‍ ഹാജരാക്കുമെന്ന് കസ്റ്റംസ് ഉന്നത ഉദ്യോഗസ്ഥര്‍ അറിയിച്ചു. ഇതോടെ കരിപ്പൂര്‍ സ്വര്‍ണക്കള്ളക്കടത്തുകേസില്‍ അറസ്റ്റിലായവരുടെ എണ്ണം അഞ്ചായി. അതിനിടെ സ്വര്‍ണക്കള്ളക്കടത്തിന് കൂട്ടുനിന്ന എയര്‍ ഇന്ത്യ എയര്‍ട്രാന്‍സ്‌പോര്‍ട്ട് സര്‍വീസിലെ സീനിയര്‍ സെക്യൂരിറ്റി അസിസ്റ്റന്റ് ജീവനക്കാരന്‍ കാഞ്ഞങ്ങാട് അജാനൂര്‍ കിഴക്കുംകരയിലെ പി.മനോജിന്റെ വീട്ടില്‍ കസ്റ്റംസ് അധികൃതര്‍ റെയ്ഡ് നടത്തി.

ദുബൈയില്‍ നിന്നും സ്വര്‍ണം കൊണ്ടുവന്ന കാസര്‍കോട് തളങ്കരയിലെ കെ.എം.അല്‍ത്താഫ്, അല്‍ത്താഫില്‍ നിന്നും സ്വര്‍ണം ഏറ്റുവാങ്ങാനെത്തിയ അബ്ദുല്‍ ബഷീര്‍ എന്നിവരെയും കസ്റ്റംസ് അധികൃതര്‍ അറസ്റ്റുചെയ്തിരുന്നു.

കോടതിയില്‍ ഹാജരാക്കിയ ഇവരില്‍ അല്‍ത്താഫിന് ജാമ്യം അനുവദിക്കുകയും മനോജിനെയും അബ്ദുല്‍ ബഷീറിനെയും റിമാന്‍ഡ് ചെയ്യുകയും ചെയ്തു. കള്ളക്കടത്തിന് കൂട്ടുനിന്ന എയര്‍ ഇന്ത്യ സെക്യൂരിറ്റി അസിസ്റ്റന്റ് മനോജിനെ എയര്‍ ഇന്ത്യ അധികൃതര്‍ സസ്‌പെന്‍ഡ് ചെയ്തു. കഴിഞ്ഞ എട്ടുവര്‍ഷമായി മനോജ് കരിപ്പൂരില്‍ ജോലി ചെയ്ത് വരികയാണ്. എയര്‍ ഇന്ത്യ സീനിയര്‍ മാനേജര്‍ മുരുകന്റെ നിര്‍ദേശ പ്രകാരമാണ് താന്‍ ചെന്നതെന്നും ഹാന്‍ഡ് ബാഗ് കൈപ്പറ്റിയതെന്നും മനോജ് കസ്റ്റംസ് സംഘത്തിന് മൊഴി നല്‍കിയിട്ടുണ്ട്.

Manoj

അല്‍ത്താഫിനെയും മനോജിനെയും ചോദ്യം ചെയ്തപ്പോള്‍ പലതവണ കാസര്‍കോട്ടെ ജ്വല്ലറിക്കുവേണ്ടി സ്വര്‍ണം കടത്തിയിരുന്നതായി വ്യക്തമായ വിവരം ലഭിച്ചതിന്റെ അടിസ്ഥാനത്തില്‍ കാസര്‍കോട്ടെ രണ്ടുജ്വല്ലറികളില്‍ നടത്തിയ റെയ്ഡില്‍ കണക്കില്‍ പെടാത്ത ഒന്നരക്കിലോ സ്വര്‍ണവും 50 ലക്ഷം രൂപയും പിടികൂടിയിരുന്നു. ഇതിന്റെ അടിസ്ഥാനത്തിലാണ് ജ്വല്ലറിയുടമകളെ അറസ്റ്റുചെയ്തത്.