പൂച്ചക്കാട് അപകടത്തില്‍ മരിച്ചവര്‍ക്ക് കണ്ണീരില്‍ കുതിര്‍ന്ന യാത്രാമൊഴി

പൂച്ചക്കാട്ടെ അപകടത്തില്‍ മരിച്ച രതീഷ്, രഞ്ജിത, മഹിത്ത്, അഭിഷേക്.

ഉദുമ:  ബുധനാഴ്ച ഉച്ചയ്ക്ക് പൂച്ചക്കാട് തെക്കുപുറത്ത് ഓട്ടോ റിക്ഷയില്‍ സ്വകാര്യ ബസിടിച്ചുണ്ടായ അപകടത്തില്‍ മരിച്ച നാലു പേര്‍ക്കും നാട് കണ്ണീരില്‍ കുതിര്‍ന്ന യാത്രാമൊഴി നല്‍കി. ജില്ലാ ആശുപത്രിയില്‍ ബുധനാഴ്ച പോസ്റ്റ്‌മോര്‍ട്ടം നടത്തിയ ശേഷം മന്‍സൂര്‍ ആശുപത്രിയില്‍ സൂക്ഷിച്ച മൃതദേഹങ്ങള്‍ വ്യാഴാഴ്ച രാവിലെയാണ് വിലാപയാത്രയായി അജാനൂര്‍ കടപ്പുറത്തെ ശ്രീ കുറുംബാ ഭഗവതി ക്ഷേത്രത്തിനടുത്ത ക്രസന്റ് സ്‌കൂള്‍ ഗ്രൗണ്ടില്‍ പൊതുദര്‍ശനത്തിന് എത്തിച്ചത്.

സമൂഹത്തിന്റെ വിവിധ തലങ്ങളിലുള്ള ആയിരങ്ങള്‍ മരണപ്പെട്ടവര്‍ക്ക് അന്ത്യാഞ്ജലി അര്‍പിച്ചു. അതിനു ശേഷമാണ് സമുദായ ശ്മശാനത്തില്‍ മൃതദേഹങ്ങള്‍ സംസ്‌ക്കരിച്ചത്. ഭാസ്‌ക്കരന്‍- വിശാലു ദമ്പതികളുടെ മകനും ഓട്ടോ ഡ്രൈവറുമായ രതീഷ് (26), വിശാലുവിന്റെ സഹോദരി സിന്ധുവിന്റെ മകള്‍ അഞ്ജിത (18), ബന്ധുവായ അനീഷയുടെ മകന്‍ മഹിത്ത് (അഞ്ച്), മറ്റൊരു ബന്ധു വിനുവിന്റെ മകന്‍ അഭിഷേക് (നാല്) എന്നിവരാണ് ദുരന്തത്തില്‍ മരിച്ചത്.