പാമ്പിന്‍ വിഷം: റജീഷിനെ വെറുതെ വിട്ടു; 5 പ്രതികള്‍ കുറ്റക്കാര്‍
Sep 11, 2012, 18:25 IST
റജീഷിനെയും രണ്ട് പ്രതികളെയും വെറുതെ വിട്ട കോടതി ഒന്നുമുതല്‍ അഞ്ചുവരെയുള്ള പ്രതികള്‍ കുറ്റക്കാരാണെന്ന് കണ്ടെത്തി. ശിക്ഷ പിന്നീട് കോടതി പ്രഖ്യാപിക്കും. കേസിലെ ഒന്നാം പ്രതി പൂക്കോട് കാരാട്ടെ പി രവി (40), രണ്ടാം പ്രതി കണ്ണൂര്‍ ചാലയിലെ ടി അഷ്‌റഫ്(50), പാട്ട്യത്തെ വി വി ഭാസ്ക്കരന്‍(50), നെടുമ്പൊയിലിലെ രാജന്‍ (48), കല്യാശ്ശേരി കിനങ്ങല്ലൂരിലെ കെ രാജന്‍(52) എന്നിവരെയാണ് കോടതി കുറ്റക്കാരാണെന്ന് കണ്ടെത്തിയത്. കണ്ണൂര്‍ പത്തായക്കുന്ന് സ്വദേശികളായ ആറാം പ്രതി കെ പി ബാലന്‍, കെ വി മഹേഷ് കുമാര്‍, ടി പി രജീഷ് എന്നിവരെയാണ് കോടതി വെറുതെ വിട്ടത്. ഈകേസില്‍ ഏഴാം പ്രതിയായിരുന്നു രജീഷ്.
2002 ഏപ്രില്‍ ഏഴിന് ഹൊസ്ദുര്‍ഗിലെ ബ്രദേര്‍സ് ലോഡ്ജില്‍ നിന്ന് അഞ്ച് പേരെ പാമ്പിന്‍ വിഷം വില്‍ക്കാനുള്ള ശ്രമത്തിനിടയില്‍ പോലീസ് അറസ്റ്റ് ചെയ്തിരുന്നു. ഇവരെയാണ് കോടതി കുറ്റക്കാരാണെന്ന് കണ്ടെത്തിയത്. കേസിന്റെ തുടരന്വേഷണത്തില്‍ പാമ്പിന്‍ വിഷം ഈ സംഘത്തിന് എത്തിച്ചുകൊടുത്ത രജീഷിനെയും കെ പി ബാലനെയും കെ വി മഹേഷ് കുമാറിനെയും കേസില്‍ പ്രതി ചേര്‍ക്കുകയായിരുന്നു.
അഞ്ച് ലക്ഷം രൂപ വിലമതിക്കുന്ന മൂന്ന് കുപ്പി പാമ്പിന്‍ വിഷമാണ് പോലീസ് പിടിച്ചെടുത്തത്. ഒരു മില്ലി ലിറ്ററിന് എട്ടായിരം രൂപ വരെ വിലമതിക്കുന്ന പാമ്പിന്‍ വിഷം കാഞ്ഞങ്ങാട്ടെ ഒരു സംഘത്തിന് വില്‍ക്കാനുള്ള ശ്രമത്തിനിടയിലാണ് സംഘം പിടിയിലായത്. രജീഷിനെയും മറ്റ് രണ്ടുപേരെയും വനം വകുപ്പാണ് കേസില്‍ പ്രതിചേര്‍ത്തത്. ഒരു മാരുതി വാനും കസ്റ്റഡിയിലെടുത്തിരുന്നു. ശിക്ഷ പ്രഖ്യാപിച്ച ഇന്ന് രജീഷിനെ കോഴിക്കോട് ജില്ലാ ജയിലില്‍ നിന്ന് ഹൊസ്ദുര്‍ഗ് കോടതിയില്‍ ഹാജരാക്കിയിരുന്നു.
കേസിന്റെ വിചാരണ ഘട്ടത്തില്‍ മിക്കവാറും ദിവസങ്ങളില്‍ റജീഷ് കോടതിയില്‍ ഹാജരായിരുന്നു. വിചാരണ പൂര്‍ത്തിയായി ജൂണ്‍ ഏഴിന് പ്രതികളുടെ മൊഴി രേഖപ്പെടുത്താന്‍ കോടതി നിശ്ചയിച്ചിരുന്നെങ്കിലും അന്ന് റജീഷ് കോടതിയില്‍ ഹാജരാകാത്തതിനെ തുടര്‍ന്ന് ഇയാള്‍ക്കെതിരെ അറസ്റ്റ് വാറണ്ട് പുറപ്പെടുവിച്ചിരുന്നു. വാറണ്ട് നിലനില്‍ക്കുന്നതിനിടയിലാണ് ടി പി ചന്ദ്രശേഖരന്‍ വധക്കേസില്‍ റജീഷ് പോലീസ് പിടിയിലാവുന്നത്.
Keywords: Snake Poison, Arrest, Kanhangad, Case, Police, Court, Kasaragod, Kerala
Tags
Share this story
