മഅദനി: കോടതി വിധി പ്രതിഷേധാര്‍ഹം: പി.സി.എഫ് കുവൈത്ത്

കുവൈത്ത്: ചികിത്സയ്ക്ക് വേണ്ടി ജാമ്യം തേടിയ അബ്ദുല്‍ നാസര്‍ മഅ്ദനിയുടെ ജാമ്യാപേക്ഷ തള്ളിക്കളഞ്ഞ കര്‍ണാടക ഹൈക്കോടതി വിധി പ്രതിഷേധാര്‍ഹമാണെന്ന് പി.സി.എഫ് കുവൈത്ത് അഭിപ്രായപെട്ടു.

പല രോഗങ്ങള്‍ കൊണ്ട് കഷ്ടപ്പെടുന്ന അദ്ദേഹത്തിന്റെ ന്യായമായ ആവശ്യം പരിഗണിക്കാതെ പ്രോസിക്യൂഷന്റെ പൊള്ളയായ വാദങ്ങള്‍ കോടതി മുഖവിലയ്‌ക്കെടുത്തത് നീതികരിക്കാന്‍ കഴിയുന്നതല്ല. മുമ്പ് സുപ്രീം കോടതി നിര്‍ദേശിച്ചിട്ടും രോഗിയായ മഅ്ദനിക്ക് ആവശ്യമുള്ള ചികിത്സ നല്‍ക്കാത്ത സര്‍ക്കാറുകള്‍ ഹൈക്കോടതിയെ തെറ്റിദ്ധരിപ്പിക്കുകയായിരുന്നു. മതേതര പാര്‍ട്ടി എന്നറിയപെടുന്ന കോണ്‍ഗ്രസിന്റെ യഥാര്‍ത്ഥ മുഖമാണ് പബ്ലിക് പ്രോസിക്യൂട്ടറിലൂടെ പുറത്തു വന്നതെന്നും യോഗം വിലയിരുത്തി.


ഈ നീതി നിഷേധത്തിനെതിരെ ജനാധിപത്യത്തിലും മതേതരത്വത്തിലും വിശ്വസിക്കുന്ന കേരളത്തിലെ മുഴുവന്‍ ജനങ്ങളും ശക്തമായി രംഗത്തിറങ്ങണമെന്നും യോഗം അഭ്യര്‍ത്ഥിച്ചു. അഹ്‌മദ് കീരിത്തോട് അധ്യക്ഷത വഹിച്ചു. ഷുക്കൂര്‍ അഹ്‌മദ് കിളിയന്തിരിക്കാല്‍, ഹുമയൂണ്‍ അറക്കല്‍, സഫീര്‍, ഷൗക്കത്ത് എന്നിവര്‍ സംസാരിച്ചു. സലീം തിരൂര്‍ സ്വാഗതവും ഹനീഫ നന്ദിയും പറഞ്ഞു.