എന്‍.എ.നെല്ലിക്കുന്നിന് യു.എ.ഇ.യില്‍ സ്‌നേഹോഷ്മള വരവേല്‍പ്പ്

ലത്വീഫ് ആദൂര്‍

എം. എല്‍. എ ആയതിനു ശേഷം ആദ്യമായി യു. എ. ഇയില്‍ എത്തിയ എന്‍. എ. നെല്ലിക്കുന്ന് എം. എല്‍. എ, മുസ്ലിം ലീഗ് കാസര്‍കോട് ജില്ലാ ട്രഷറര്‍ എ അബ്ദുര്‍ റഹിമാന്‍ എന്നിവര്‍ക്ക്
 പാര്‍ട്ടി പ്രവര്‍ത്തകരും നാട്ടുകാരും സ്‌നേഹോഷ്മള വരവേല്‍പ്പ് നല്‍കി.

വ്യാഴാഴ്ച ഉച്ചയോടെ അബുദാബി എയര്‍പോര്‍ട്ടില്‍ എത്തിയ നേതാക്കളെ കാസര്‍കോട് ജില്ലാ, കാസര്‍കോട് ജില്ലാ-മണ്ഡലം കെ എം സി സി  കമ്മിറ്റികളുടെ ആഭിമുഖ്യത്തിലാണ് സ്വീകരിച്ചത്. അബുദാബി-കാസര്‍കോട് മണ്ഡലം കെ എം സി സി സംഘടിപ്പിക്കുന്ന 'ബൈതുർ റഹ്മ 'പ്രഖ്യാപന സമ്മേളനത്തിലും  മാപ്പിള കലാ വിരുന്നിലും സംബന്ധിക്കാനായിരുന്നു എന്‍ എ നെല്ലിക്കുന്നും എ. അബ്ദുര്‍ റഹ്മാനും യുഎഇയിലെത്തിയത്. ദുബൈ-കാസര്‍കോട് മണ്ഡലം കെ. എം. സി. സി., ഷാര്‍ജ- കാസര്‍കോട് ജില്ലാ കെ. എം. സി. സി. എന്നിവയുടെ നേതൃത്വത്തില്‍  നല്‍കുന്ന സ്വീകരണ പരിപാടികളിലും ഇരുവരും സംബന്ധിക്കുന്നുണ്ട്.

ജില്ലാ കെ എം സി പ്രസിഡന്റ് പി.കെ. അഹമദ് ബല്ലാ കടപ്പുറം, ജനറല്‍ സെക്രട്ടറി അബ്ദുർ റഹ്മാന്‍ പൊവ്വല്‍, വൈസ് പ്രസിഡന്റ് അബ്ദുർ റഹ്മാന്‍ ചേക്കു ഹാജി, മണ്ഡലം പ്രസിഡന്റ് അബ്ദുർ റഹ്മാന്‍ മാസ്റ്റര്‍, ജനറല്‍ സെക്രട്ടറി ഹനീഫ് പടിഞ്ഞാര്‍ മൂല, ട്രഷറര്‍ ലത്തീഫ് ആദൂര്‍, കാഞ്ഞങ്ങാട് മണ്ഡലം കെ എം സി സി പ്രസിഡന്റ് അഷ്‌റഫ്  കൊത്തിക്കാല്‍, എം എം നാസര്‍ തുടങ്ങിയവരുടെ നേതൃത്വത്തിലായിരുന്നു സ്വീകരണം.
എം.എല്‍.എ. ആയതിനുശേഷം തന്റെ മണ്ഡലമായ കാസര്‍കോട്ട് നടപ്പാക്കിയ ഒരുപാട് വികസന പ്രവര്‍ത്തനങ്ങളുടെ ക്രെഡിറ്റുമായാണ് എം.എല്‍.എ. തന്റെ മണ്ഡലത്തിലെ ജനങ്ങളായ പ്രവാസികള്‍ യുഎഇയില്‍ ഒരുക്കിയ സ്വീകരണ ചടങ്ങില്‍ എത്തുന്നത്. 20 വര്‍ഷങ്ങള്‍ക്കു ശേഷം സര്‍ക്കാര്‍ മേഖലയില്‍ അനുവദിച്ച മെഡിക്കല്‍ കോളജ് കാസര്‍കോട് മണ്ഡലത്തിലെ ബദിയടുക്ക പഞ്ചായത്തിലെ ഉക്കിനടുക്കയില്‍ കൊണ്ടുവരുന്നതില്‍ എം. എല്‍. എ.വഹിച്ച പങ്ക് സ്തുത്യര്‍ഹമാണ്. ഇത് പ്രവാസി കാസര്‍കോട്ടുകാരില്‍ ഏറെ മതിപ്പുണ്ടാക്കിയിട്ടുണ്ട്. ആരോഗ്യ മേഖലയില്‍ ജില്ലയുടെ മുന്നേറ്റങ്ങള്‍ക്ക് മെഡിക്കല്‍ കോളജ് വലിയ മുതല്‍കൂട്ടാവുമെന്ന് പ്രവാസികള്‍ പ്രത്യാശിക്കുന്നു. ഭാവിയില്‍ ഈ മെഡിക്കല്‍ കോളജ് മെഡിസിറ്റി ആയി മാറ്റുവാനുള്ള അഞ്ച് കോടിയുടെ പ്രൊജക്റ്റ് ഗവണ്മെന്റിനു സമര്‍പിച്ചിരിക്കുകയാണ്.

18 വര്‍ഷമായി മുടങ്ങിക്കിടക്കുന്ന ബാവിക്കര റെഗുലേറ്റര്‍ പദ്ധതി പുരോഗതിയുടെ പാതയിലാണ്. ഉപ്പു വെള്ളം കുടിക്കാന്‍ വിധിക്കപ്പെട്ട കാസര്‍കോട്ടുകാര്‍ക്ക് ഇത് ആശ്വാസം പകരാന്‍ പോവുകയാണ്. മുമ്പത്തെ കോണ്‍ട്രാക്റ്റ് തുകയേക്കാള്‍ 82%കൂട്ടി നല്‍കിയാണ് പുതിയ കരാര്‍ കൈമാറിയത്. ചില സാങ്കേതിക തടസങ്ങള്‍ മാറിക്കിട്ടിയാല്‍ ഈ പദ്ധതിയും ഉടന്‍ നടപ്പിലാകും.

പോസ്റ്റ് മോര്‍ട്ടം വിഷയത്തില്‍ നിരന്തരം പോരാടിയ എന്‍.എയ്ക്കു പോസ്റ്റ് മോര്‍ട്ടം എം.എല്‍.എ എന്ന വിളിപ്പേരും ലഭിച്ചിട്ടുണ്ട്. സര്‍ക്കാര്‍ ആശുപത്രികളില്‍ 24 മണിക്കൂറും പോസ്റ്റ് മോര്‍ട്ടം നടത്തണമെന്ന ആവശ്യമുയര്‍ത്തി അഞ്ചു സബ്മിഷനുകളാണ് എം.എല്‍.എ നിയമസഭയില്‍ ഉന്നയിച്ചത്. വാര്‍ദ്ധക്യകാല പെന്‍ഷന്‍ പ്രായം  65ല്‍ നിന്നും 60 ആയി അംഗീകരിക്കുന്നത് വരെ തന്റെ തീരുമാനത്തില്‍ ഉറച്ചു നിന്നു പോരാടാനുള്ള ശ്രമത്തിലാണ് ഇപ്പോള്‍ ഈ ജനകീയ എം. എല്‍. എ.

പ്രഭാകരന്‍ കമ്മീഷനിലൂടെ കാസര്‍കോടിനു 25 കോടി അനുവദിച്ചപ്പോള്‍ ഒരു ഭരണ കക്ഷി എം. എല്‍. എ. അത് പോര എന്ന് പറഞ്ഞു പത്ത് കോടി രൂപ അധികം പാസാക്കിക്കുന്നത് കണ്ടു പ്രതിപക്ഷം പോലും അത്ഭുതപ്പെട്ടു. ഇതോടെ നിയമസഭയില്‍ ഒറ്റ പ്രസംഗം കൊണ്ട് പത്ത് കോടി വാങ്ങിയ എം.എല്‍.എ. എന്ന പേരും എന്‍.എയ്ക്ക് സ്വന്തം.

ചെറുതും വലുതുമായ ഒട്ടനവധി വികസന പ്രവര്‍ത്തനങ്ങള്‍ തന്റെ കന്നി സാമാജികത്വത്തില്‍ തന്നെ ചെയ്തു തീര്‍ക്കാന്‍ സാധിച്ച എന്‍.എ. നെല്ലിക്കുന്ന് കാസര്‍കോടിനു കൂടുതല്‍ പ്രതീക്ഷകളാണ് നല്‍കുന്നത്.

ഞങ്ങളുടെ Facebookലും Twitterലും അംഗമാകൂ. ഓരോ വാര്‍ത്തയും കാസര്‍കോട് വാര്‍ത്തയിലൂടെ അറിയാം.