ഇസ്‌ലാഹി സെന്റര്‍ ഖുര്‍ആന്‍ വിജ്ഞാന പരീക്ഷ നവംബറില്‍

കുവൈത്ത്: കേരള ഇസ്‌ലാഹി സെന്റര്‍ ഖുര്‍ആന്‍ ഹദീസ് ലേണിംഗ് വിഭാഗം കുവൈത്ത് മലയാളികള്‍ക്കായി സംഘടിപ്പിച്ചു വരുന്ന ഖുര്‍ആന്‍ വിജ്ഞാന പരീക്ഷയുടെ 22-ാം ഘട്ടം നവംബര്‍ ഒന്നിന് രാവിലെ 8.30 ന് കുവൈത്തിലെ വിവിധ കേന്ദ്രങ്ങളിലായി നടക്കുമെന്ന് സെന്റര്‍ ഭാരവാഹികള്‍ അറിയിച്ചു.

പരീക്ഷക്ക് പരിശുദ്ധ ഖുര്‍ആനിലെ 61, 62, 63 അധ്യായങ്ങളായ സൂറത്തുല്‍ സ്വഫ്, സൂറത്തുല്‍ ജുമുഅ, സൂറത്തുല്‍ മുനാഫിഖൂന്‍ എന്നിവയാണ് തിരഞ്ഞെടുത്തിട്ടുള്ളത്. മര്‍ഹൂം മുഹമ്മദ് അമാനി മൗലവി രചിച്ച ഖുര്‍ആന്‍ പരിഭാഷയുടെ ഹാന്റ്ബുക്ക് ഇതിനായി പ്രത്യേകം തയ്യാറാക്കിയിട്ടുണ്ട്. രാവിലെ 8.30 മുതല്‍ 10.30 വരെയാണ് പരീക്ഷ സമയം. സ്ത്രീകള്‍ക്ക് പരീക്ഷയെഴുതാന്‍ പ്രത്യേക സൗകര്യമുണ്ടായിരിക്കും.

താല്‍പര്യമുള്ളവര്‍ നിശ്ചിത അപേക്ഷാ ഫോറത്തിലോ, പേര്, ഏരിയ, സിവില്‍ ഐഡി നമ്പര്‍, ഫോണ്‍ തുടങ്ങിയ വിവരങ്ങള്‍ ഇസ്‌ലാഹി സെന്റര്‍ ഭാരവാഹികളെയോ സെന്ററിന്റെ കീഴില്‍ മലയാള ഖുത്ബ നടക്കുന്ന അബ്ബാസിയ, ശര്‍ഖ്, ഫൈഹ, അബൂഹലീഫ, മംഗഫ്, ജഹ്‌റ, ഉമരിയ, മെഹ്ബൂല, ഹവല്ലി, ഖൈത്താന്‍ പള്ളികളിലെ കൗണ്ടറുകളിലോ കുവൈത്ത് സിറ്റി, ഫഹാഹീല്, അബ്ബാസിയ, ഹസാവിയ ഓഫീസുകളിലോ ഏല്‍പിക്കേണ്ടതാണെന്ന് സെന്റര്‍ ഖുര്‍ആന്‍ ഹദീസ് ലേണിംഗ് വിഭാഗം സെക്രട്ടറി മുഹമ്മദ് അസ്‌ലം കാപ്പാട് അറിയിച്ചു.

ഇസ്‌ലാഹി സെന്ററിന്റെ വെബ് സൈറ്റില് (www.islahikuwait.org) ഹാന്‍ഡ് ബുക്കും ഓണ്‍ലൈന്‍ രജിസ്‌ട്രേഷന്‍ സംവിധാനവും ഏര്‍പെടുത്തിയിട്ടുണ്ട്. വിശദ വിവരങ്ങള്‍ക്ക് 97557018, 66369240, 22432079, 23915217 എന്നീ നമ്പറുകളില്‍ ബന്ധപ്പെടാവുന്നതാണ്.