ഐഎന്‍എല്‍ ജനജാഗ്രത യാത്ര; ജിസിസി രാജ്യങ്ങളില്‍ ക്യാമ്പയിന്‍ സംഘടിപ്പിക്കും- ഐഎംസിസി

ജിദ്ദ: (www.kasargodvartha.com 19/01/2016) വര്‍ധിച്ചുവരുന്ന അസഹിഷ്ണതയ്ക്കും, വര്‍ഗീയ ധ്രുവീകരണത്തിനുമെതിരെ കേരളീയ പൊതുമനസാക്ഷിയെ ജാഗ്രതപ്പെടുത്തുക എന്ന ലക്ഷ്യത്തില്‍ ജനുവരി 30ന് കാസര്‍കോട് നിന്നും ആരംഭിച്ച് ഫെബ്രുവരി 13ന് തിരുവനന്തപുരത്ത് സമാപിക്കുന്ന ഐഎന്‍എല്‍ ജനജാഗ്രതയാത്രയുടെ പ്രചരണ പ്രവര്‍ത്തനങ്ങള്‍ക്ക് ഐഎംസിസി - ജിസിസി കമ്മിറ്റി രൂപം നല്‍കി. ഐഎന്‍എല്‍ സംസ്ഥാന ജനറല്‍ സെക്രട്ടറി പ്രൊഫ. എ.പി അബ്ദുല്‍ വഹാബാണ് ജാഥാ ലീഡര്‍.

യാത്രാ പ്രമേയം മുന്‍നിര്‍ത്തി മുഴുവന്‍ ജിസിസി രാജ്യങ്ങളിലും സാമൂഹിക, സാംസ്‌കാരിക, മാധ്യമരംഗത്തെ പ്രമുഖരെ പങ്കെടുപ്പിച്ചുകൊണ്ടുള്ള സെമിനാറുകള്‍, ടേബിള്‍ടോക്ക്, ലഘുലേഖ വിതരണം എന്നിവ സംഘടിപ്പിക്കും. ഈ മാസത്തിലെ അവസാന ആഴ്ചകളിലാണ് പരിപാടികള്‍. അതോടൊപ്പം യാത്രയുടെ ഭാഗമായി ഐഎംസിസി - ജിസിസി കമ്മിറ്റി നിര്‍മിച്ച് ഐഎന്‍എല്‍ സംസ്ഥാന കമ്മിറ്റി പുറത്തിറക്കുന്ന 'മാറ്റൊലി' എന്ന പ്രമേയ ഗാനങ്ങളുടെ സിഡി പ്രകാശനവും നടത്തും.