കായലില്‍ മരിച്ച നിലയില്‍ കണ്ടെത്തിയ മിഷേലിന്റെ മരണം ആത്മഹത്യയാണെന്ന് പോലീസ് ഹൈക്കോടതിയില്‍

By Web Desk SNNov 10, 2017, 11:12 IST

കൊച്ചി: (www.kasargodvartha.com 10/11/2017) കായലില്‍ മരിച്ച നിലയില്‍ കണ്ടെത്തിയ മിഷേലിന്റെ മരണം ആത്മഹത്യയാണെന്ന് പോലീസ് ഹൈക്കോടതിയില്‍. മുങ്ങിമരണമാണെന്നാണ് പോസ്റ്റുമോര്‍ട്ടം റിപോര്‍ട്ടില്‍ പറയുന്നത്. ബലപ്രയോഗമോ പീഡനശ്രമമോ ഉണ്ടായിട്ടില്ലെന്നും റിപ്പോര്‍ട്ടില്‍ വ്യക്തമാക്കുന്നു. ഇതിന്റെ അടിസ്ഥാനത്തില്‍ കേസ് അന്വേഷിക്കുന്ന ക്രൈംബ്രാഞ്ച് ഡിവൈഎസ്പി ജോര്‍ജ് ചെറിയാന്‍ മിഷേലിന്റേത് ആത്മഹത്യയാണെന്ന് ഉറപ്പാക്കുകയായിരുന്നു.

കേസില്‍ പ്രതിയായ ക്രോണിനും മിഷേലും ഉപയോഗിച്ചിരുന്ന ലാപ്‌ടോപ്പുകള്‍, മിഷേല്‍ നേരത്തേ ഉപയോഗിച്ചിരുന്ന ഫോണ്‍, സിംകാര്‍ഡ് എന്നിവ ശാസ്ത്രീയ പരിശോധനയ്ക്ക് അയച്ചിട്ടുണ്ട്. ഇവര്‍ ഉപയോഗിച്ചുവന്ന ഫോണും സിംകാര്‍ഡും വിശദ പരിശോധനയ്ക്ക് തിരുവനന്തപുരം സിഡാകിന് അയച്ചു. മിഷേലിനെ കാണാതായ ദിവസം ക്രോണിന്‍ ഫോണിലും എസ്എംഎസ് മുഖേനയും മാനസികമായി ബുദ്ധിമുട്ടിച്ചതായി ക്രൈംബ്രാഞ്ച് കണ്ടെത്തിയിരുന്നു. ഇതേ തുടര്‍ന്നാണ് യുവതി ആത്മഹത്യ ചെയ്തതെന്നാണ് ക്രൈംബ്രാഞ്ച് അന്വേഷണത്തില്‍ വ്യക്തമായിരിക്കുന്നത്.