Threat | വഖഫ് ഭേദഗതി ബിൽ പാസായതിന് പിന്നാലെ ഭീഷണി വർധിച്ചു; അൻവർ മണിപ്പാടി സുരക്ഷ തേടി

മംഗളൂരു: (KasargodVartha) കർണാടകത്തിലെ വഖഫ് ഭൂമി കൈയേറ്റങ്ങളെക്കുറിച്ച് അന്വേഷിക്കാൻ മുൻ ബിജെപി സർക്കാർ നിയോഗിച്ച കമ്മീഷൻ ചെയർമാൻ അൻവർ മണിപ്പാടിക്ക് വധഭീഷണിയെന്ന് പരാതി. ബിജെപി നേതാവായ ഇദ്ദേഹം ഭീഷണി സംബന്ധിച്ച് മംഗളൂരു സിറ്റി പോലീസ് കമ്മീഷണർ അനുപം അഗർവാളിന് പരാതി നൽകി. ആയിരക്കണക്കിന് കോടി രൂപയുടെ വഖഫ് സ്വത്തുക്കളുടെ ദുരുപയോഗം പുറത്തുകൊണ്ടുവന്ന റിപ്പോർട്ടാണ് താൻ തയ്യാറാക്കിയതെന്ന് മണിപ്പാടി അവകാശപ്പെട്ടു.

കർണാടക ന്യൂനപക്ഷ കമ്മീഷൻ മുൻ പ്രസിഡന്റും ബിജെപി നേതാവുമായ അൻവർ മണിപ്പാടിക്ക് വിദേശത്ത് നിന്നുള്ള ഫോൺ വിളികളിലൂടെയാണ് വധഭീഷണി ലഭിക്കുന്നതെന്ന് അദ്ദേഹം പറഞ്ഞു. പാർലമെൻ്റിൻ്റെ ഇരുസഭകളിലും വഖഫ് ഭേദഗതി ബിൽ പാസായതിനുശേഷം ഭീഷണികൾ വർധിച്ചതായി മംഗളൂരു സിറ്റി പോലീസ് കമ്മീഷണർക്ക് നൽകിയ പരാതിയിൽ അദ്ദേഹം ആരോപിച്ചു. മംഗളൂരുവിൽ താമസിക്കുന്ന അൻവറിന് കഴിഞ്ഞ രണ്ട് മൂന്ന് ദിവസമായി ഇൻ്റർനെറ്റ്, സാറ്റലൈറ്റ് അധിഷ്ഠിത ഭീഷണി കോളുകൾ ലഭിക്കുന്നുണ്ടെന്നും വ്യാഴാഴ്ച മുതൽ കോളുകളുടെ എണ്ണത്തിൽ ഗണ്യമായ വർധനവുണ്ടെന്നും അദ്ദേഹം വ്യക്തമാക്കി.

വഖഫ് ഭേദഗതി ബില്ലിനെക്കുറിച്ചുള്ള പാർലമെന്ററി ചർച്ചയ്ക്കിടെ കേന്ദ്ര ആഭ്യന്തര മന്ത്രി അമിത് ഷാ കർണാടകത്തെക്കുറിച്ച് പരാമർശിക്കുകയും വഖഫ് അഴിമതിയെക്കുറിച്ച് വിശദീകരിക്കുന്ന അൻവർ മണിപ്പാടിയുടെ റിപ്പോർട്ട് ഉദ്ധരിക്കുകയും ചെയ്തിരുന്നു. മുൻ പ്രധാനമന്ത്രിയും ജെഡിഎസ് ദേശീയ ചെയർമാനുമായ എച്ച്.ഡി. ദേവഗൗഡയും പാർലമെൻ്റ് പ്രസംഗത്തിൽ കർണാടകയിലെ വഖഫ് ഭൂമി കൈയേറ്റങ്ങൾ പരാമർശിച്ചിരുന്നു.

‘ഇന്റർനെറ്റ് വഴി എനിക്ക് തുടർച്ചയായി ഭീഷണി കോളുകൾ ലഭിക്കുന്നുണ്ട്. വിവിധ സ്ഥലങ്ങളിൽ നിന്നാണ് കോളുകൾ വരുന്നത്. ഹിന്ദി, മറാത്തി, ഇംഗ്ലീഷ്, മറ്റ് ഉത്തരേന്ത്യൻ ഭാഷകൾ എന്നിവയിലാണ് ഭീഷണി കോളുകൾ വരുന്നത്. ഇംഗ്ലീഷിൽ സംസാരിച്ച ഒരാൾ, ഞാൻ അധികകാലം ജീവിച്ചിരിക്കില്ലെന്ന് മുന്നറിയിപ്പ് നൽകി. എൻ്റെ സ്വന്തം സമുദായം ഞാൻ കൂടുതൽ കാലം ജീവിച്ചിരിക്കില്ലെന്ന് ഉറപ്പാക്കുമെന്നും പറഞ്ഞു,’ അൻവർ മാധ്യമങ്ങളോട് വെളിപ്പെടുത്തി. ‘എല്ലാ നേതാക്കളും എനിക്ക് എതിരാണെന്ന് പോലും അവർ പറഞ്ഞു. എൻ്റെ സമുദായവുമായി എനിക്ക് ഒരു പ്രശ്‌നവുമില്ല. ഭീഷണികളെക്കുറിച്ച് ഞാൻ പോലീസ് കമ്മീഷണർ അനുപം അഗർവാളിനെ അറിയിച്ചിട്ടുണ്ട്. എനിക്ക് നൽകിയിട്ടുള്ള സുരക്ഷ ഞാൻ നേരത്തെ നിരസിച്ചിരുന്നു. എന്നാൽ വഖഫ് ഭേദഗതി ബിൽ പാർലമെന്റിൽ പാസായതിനുശേഷം ഭീഷണി കോളുകൾ വീണ്ടും ആരംഭിച്ചു. ഇത് സ്വാഭാവികമാണെന്ന് എനിക്ക് തോന്നുന്നു. ഇന്നത്തെ കാലത്ത് ഒരാളെ കൊല്ലുന്നത് ബുദ്ധിമുട്ടുള്ള കാര്യമല്ല. പുറത്തിറങ്ങരുതെന്നും ആരെയും എൻ്റെ വീട്ടിലേക്ക് പ്രവേശിപ്പിക്കരുതെന്നും ആവശ്യപ്പെട്ട് സുഹൃത്തുക്കളിൽ നിന്നും അഭ്യുദയകാംക്ഷികളിൽ നിന്നും എനിക്ക് പതിവായി കോളുകൾ ലഭിക്കുന്നുണ്ട്. പോലീസ് വകുപ്പിലെ ബന്ധുക്കൾ പോലും ജാഗ്രത പാലിക്കാൻ എന്നെ ഉപദേശിച്ചിട്ടുണ്ട്.’

വഖഫ് ബിൽ പാസാക്കിയത് തനിക്ക് വളരെയധികം സംതൃപ്തി നൽകിയെന്നും അവസാന ദിവസമായിരുന്നു തൻ്റെ ജീവിതത്തിലെ ഏറ്റവും സന്തോഷകരമായ നിമിഷമെന്നും അൻവർ പറഞ്ഞു. തൻ്റെ റിപ്പോർട്ടിൻ്റെ സത്തയാണ് ബിൽ പ്രതിഫലിപ്പിക്കുന്നത്. ന്യൂഡൽഹിയിൽ നടന്ന സംയുക്ത പാർലമെന്ററി കമ്മിറ്റി യോഗങ്ങളിൽ താൻ പങ്കെടുത്തിരുന്നു. തൻ്റെ റിപ്പോർട്ടിലെ കണ്ടെത്തലുകളുടെയും ശുപാർശകളുടെയും അടിസ്ഥാനത്തിലാണ് ഈ ഭേദഗതി നടപ്പിലാക്കിയത്. താൻ 12 വർഷമായി കഠിനാധ്വാനം ചെയ്തു. വഖഫ് സ്വത്തുക്കളിലെ കൈയേറ്റങ്ങൾ വിശദീകരിക്കുന്ന ഏകദേശം 7,000 പേജുള്ള തെളിവുകൾ താൻ സമർപ്പിച്ചു. ലോകായുക്ത റിപ്പോർട്ട് ശരിവച്ചു. മാധ്യമങ്ങൾ അതിനെ പിന്തുണച്ചു. എന്നിട്ടും വിവിധ കാരണങ്ങളാൽ ആ സമയത്ത് ഒരു നടപടിയും സ്വീകരിച്ചില്ല. സംയുക്ത പാർലമെന്ററി കമ്മിറ്റി നിരവധി വിശദീകരണങ്ങൾ തേടിയിരുന്നു, അതെല്ലാം താൻ നൽകി. 1913 ൽ ഇന്ത്യയിൽ ഏകദേശം 18 ലക്ഷം ഏക്കർ വഖഫ് ഭൂമി ഉണ്ടായിരുന്നു. എന്നാൽ ഇപ്പോൾ അത് 1.80 ലക്ഷം ഏക്കറായി കുറഞ്ഞു. കർണാടകയിൽ മാത്രം 54,000 ഏക്കർ വഖഫ് ഭൂമിയിൽ 29,000 ഏക്കർ കൈയേറിയിട്ടുണ്ട്.

വഖഫ് ഭേദഗതി ബിൽ നിരവധി ഐഎഎസ് ഉദ്യോഗസ്ഥരെയും രാഷ്ട്രീയക്കാരെയും സൂക്ഷ്മപരിശോധനക്ക് വിധേയമാക്കും. ബിൽ നടപ്പിലാക്കിക്കഴിഞ്ഞാൽ എല്ലാ രാഷ്ട്രീയ പാർട്ടികളിലെയും, പ്രത്യേകിച്ച് കോൺഗ്രസിലെ നേതാക്കൾ തുറന്നുകാട്ടപ്പെടും. കൈയേറ്റങ്ങൾ ഒഴിപ്പിക്കുന്നതോടെ നിരവധി പേർ ഗുരുതരമായ പ്രത്യാഘാതങ്ങൾ നേരിടേണ്ടിവരും. ബില്ലിനെ എതിർത്തിരുന്ന മുസ്ലിംകളിൽ പകുതിയും ഇപ്പോൾ അതിനെ പിന്തുണക്കാൻ തുടങ്ങിയിരിക്കുന്നു. കഴിഞ്ഞ മൂന്ന് നാല് മാസമായി ഇന്ത്യയിലെ യഥാർത്ഥ പ്രവണത അതാണ്. കൈയേറ്റങ്ങൾ തുറന്നുകാട്ടുന്നതിലെ തൻ്റെ ശ്രമങ്ങളെ മുല്ലമാർ പോലും അംഗീകരിച്ചുകൊണ്ട് തൻ്റെ പ്രവർത്തനങ്ങളെയും ബില്ലിനെയും അഭിനന്ദിച്ചു എന്ന് അൻവർ അവകാശപ്പെട്ടു.

ബെല്ലഹള്ളിയിലെ 602 ഏക്കർ, മൈസൂരു റോഡിലെ 400 മുതൽ 500 ഏക്കർ വരെ സ്ഥലം, ലാൽബാഗ് റോഡിലെ ഹോപ്‌കോംസിൻ്റെ പ്രധാന സ്ഥലം എന്നിങ്ങനെ ബംഗളൂരുവിലെ കൈയേറ്റങ്ങളുടെ പ്രത്യേക ഉദാഹരണങ്ങളും അൻവർ ചൂണ്ടിക്കാട്ടി. വഖഫ് ഭൂമി കൈയേറിയാണ് മെഡിക്കൽ, എഞ്ചിനീയറിംഗ് കോളേജുകൾ നിർമ്മിച്ചിരിക്കുന്നതെന്നും അദ്ദേഹം കൂട്ടിച്ചേർത്തു. കൈയേറ്റ ഭൂമി മുഴുവൻ സർക്കാർ തിരിച്ചുപിടിക്കണം. വഖഫ് സ്വത്തുക്കൾ കൈയേറിയവർ കള്ളന്മാരല്ലാതെ മറ്റൊന്നുമല്ല. പുതിയ ബില്ലിലെ വ്യവസ്ഥകൾ പ്രകാരം അവരെ ശിക്ഷിക്കണം. അതാണ് തൻ്റെ ആത്മാർത്ഥമായ പ്രാർത്ഥനയന്ന് അദ്ദേഹം പറഞ്ഞു.

2012 മാർച്ചിൽ കർണാടക സംസ്ഥാന ന്യൂനപക്ഷ കമ്മീഷൻ ചെയർമാനായിരുന്ന അൻവർ മണിപ്പടി ബിജെപി നേതാവായ അന്നത്തെ കർണാടക മുഖ്യമന്ത്രി ഡി.വി. സദാനന്ദ ഗൗഡക്കാണ് റിപ്പോർട്ട് സമർപ്പിച്ചിരുന്നത്. എന്നാൽ പിന്നീട് അധികാരത്തിൽ വന്ന ബിജെപി, കോൺഗ്രസ് സർക്കാരുകളോ ജെഡിഎസ് സഖ്യ സർക്കാറോ ആ റിപ്പോർട്ട് പരിഗണിച്ചില്ല.

ഈ വാർത്ത പങ്കുവെക്കുകയും അഭിപ്രായങ്ങൾ രേഖപ്പെടുത്തുകയും ചെയ്യുക. 

Anwar Manippady, former chairman of the commission appointed by the previous BJP government to investigate Waqf land encroachments in Karnataka, has reported receiving death threats. The BJP leader claims the threats intensified after the Waqf Amendment Bill was passed in Parliament. He has filed a complaint with the Mangaluru City Police Commissioner and is seeking security.

#WaqfBill #Threats #AnwarManippady #Karnataka #Security #LandEncroachment