പുസ്തകം എടുക്കാന്‍ വൈകിയതിന് ഒന്നാം ക്ലാസ് വിദ്യാര്‍ത്ഥിയെ അടിച്ചു പരിക്കേല്‍പിച്ച സംഭവം ഒതുക്കാന്‍ ശ്രമമെന്ന് പരാതി; അധ്യാപികയ്‌ക്കെതിരെ കേസെടുക്കാന്‍ പോലീസ് തയ്യാറായില്ല, വിദ്യാര്‍ത്ഥി സംഘടനകള്‍ സമരത്തിലേക്ക്

മഞ്ചേശ്വരം: (www.kasargodvartha.com 10.07.2018) ക്ലാസില്‍ പുസ്തകം എടുക്കാന്‍ വൈകിയതിന് ഒന്നാം ക്ലാസ് വിദ്യാര്‍ത്ഥിയെ ക്രൂരമായി ചൂരല്‍ കൊണ്ട് അടിച്ചുപരിക്കേല്‍പിച്ച സംഭവത്തില്‍ കേസെടുക്കാന്‍ മടിച്ച് പോലീസ്. രാഷ്ട്രീയ സ്വാധീനം മൂലമാണ് പോലീസ് കേസെടുക്കാത്തതെന്നാണ് പരാതി. മഞ്ചേശ്വരം ഉപജില്ലയിലെ അട്ടഗോളി എ എല്‍ പി സ്‌കൂളിലെ വിദ്യാര്‍ത്ഥിയെയാണ് അധ്യാപിക മാരകമായി അടിച്ചു പരിക്കേല്‍പിച്ചത്. സംഭവത്തിനെതിരെ പ്രതിഷേധമുയരുകയും എംഎസ്എഫിന്റെ നേതൃത്വത്തില്‍ സ്‌കൂളിന് മുന്നില്‍ കുത്തിയിരിപ്പ് സമരവും നടത്തിയിരുന്നു.

ചൈല്‍ഡ് ലൈന്‍ പ്രവര്‍ത്തകര്‍ കുട്ടിയില്‍ നിന്നും മൊഴിയെടുക്കുകയും ഇതുസംബന്ധിച്ച് കേസെടുത്ത് അന്വേഷണം നടത്താന്‍ നിര്‍ദേശിക്കുകയും ചെയ്തിട്ടുണ്ട്. എന്നിട്ടും അധ്യാപികയ്‌ക്കെതിരെ കേസെടുക്കാന്‍ പോലീസ് തയ്യാറാകുന്നില്ലെന്നാണ് ആക്ഷേപം. കുട്ടിയുടെ കുടുംബവും നിയമ നടപടിയുമായി മുന്നോട്ടു പോകാനാണ് തീരുമാനിച്ചിരിക്കുന്നത്. അതേസമയം അധ്യാപികയ്‌ക്കെതിരെ കേസെടുക്കുകയോ നടപടി സ്വീകരിക്കുകയോ ചെയ്യാത്ത പക്ഷം ശക്തമായ സമരപരിപാടികളുമായി മുന്നോട്ട് പോകാനാന്‍ എംഎസ്എഫ് ഉള്‍പെടെയുള്ള വിദ്യാര്‍ത്ഥി സംഘടനകളുടെ തീരുമാനം.