ജാനകിവധം; ബാങ്ക് കവര്‍ച്ചാ കേസിലെ പ്രതികളെ കേന്ദ്രീകരിച്ചും അന്വേഷണം

ചീമേനി: (www.kasargodvartha.com 04.01.2018) പുലിയന്നൂരിലെ റിട്ട. അധ്യാപിക ജാനകിയുടെ കൊലപാതകം സംബന്ധിച്ചുള്ള അന്വേഷണം പുതിയ ദിശയിലേക്ക്. കൊലപാതകത്തില്‍ അടുത്ത ബന്ധുവും പ്രദേശവാസിയായ യുവാവിനും ബന്ധമുണ്ടെന്ന് തന്നെയാണ് അന്വേഷണ സംഘത്തിന്റെ വിലയിരുത്തല്‍. അതുകൊണ്ട് തന്നെ ജില്ലാ പോലീസ് മേധാവി കെ ജി സൈമണ്‍ ചീമേനിയില്‍ തമ്പടിച്ച് അന്വേഷണത്തിന് മേല്‍നോട്ടം വഹിക്കുന്നു.

ഇപ്പോള്‍ കസ്റ്റഡിയിലുള്ള ചിലരെ എസ്പിയുടെ നേതൃത്വത്തില്‍ തന്നെയാണ് ചോദ്യം ചെയ്യുന്നത്. ജില്ലയിലെ പ്രമാദമായ ഒരു ബാങ്ക് കവര്‍ച്ചാ കേസിലെ പ്രതികള്‍ക്ക് ലഭിച്ച ക്വട്ടേഷന്‍ പ്രകാരമാണ് കൊല നടത്തിയതെന്നാണ് അവസാന നിഗമനം. ഇതില്‍ മംഗളൂരുവിലെയും ബംഗളൂരുവിലെയും ക്വട്ടേഷന്‍ സംഘവും ഉള്‍പ്പെട്ടിട്ടുണ്ട്. പ്രതികളുടേതാണെന്ന് സംശയിക്കുന്ന വ്യക്തമായ ദൃശ്യങ്ങള്‍ ബോവിക്കാനത്തെ ഒരു ബാങ്കിന്റെ സി സി ക്യാമറയില്‍ പതിഞ്ഞിട്ടുണ്ട്. പ്രതികളാണെന്ന് സംശയിക്കുന്നവര്‍ സഞ്ചരിച്ച കാറിന്റെ നമ്പറും ദൃശ്യങ്ങളിലുണ്ട്. ഈ വാഹനം കണ്ടെത്തിയതായും സൂചനയുണ്ട്.

കടലില്‍ നിന്നുമുള്ള മൊബൈല്‍ വിളിയാണ് ഇതു സംബന്ധിച്ച് അന്വേഷണ സംഘത്തിന് വഴിത്തിരിവായത്. ഏഴിമല ടവറില്‍ നിന്നുള്ള വിളി ചീമേനി പുലിയന്നൂര്‍ ടവറുമായി ബന്ധപ്പെട്ടായിരുന്നു. ഷിമോഗ സ്വദേശിയായ ക്വട്ടേഷന്‍ സംഘത്തിലെ അംഗത്തിന്റേതായിരുന്നു ഈ ഫോണ്‍വിളി. കേസന്വേഷണ സംഘത്തിലുള്ള കാഞ്ഞങ്ങാട് സിഐ സി കെ സുനില്‍കുമാറും നീലേശ്വരം സിഐ വി ഉണ്ണികൃഷ്ണനും ഈ സംഘത്തിന്റെ പിന്നാലെയാണ്. കഴിഞ്ഞ ദിവസം ഇരുവരും ഇതു സംബന്ധിച്ച കൂടുതല്‍ തെളിവെടുപ്പിനായി കര്‍ണാടകയില്‍ പോയിരുന്നു.
ഇപ്പോള്‍ ചോദ്യം ചെയ്തവരുടെ മൊഴിയില്‍ നിന്നും കൊലപാതകം സംബന്ധിച്ച ചില സൂചനകള്‍ അന്വേഷണ സംഘത്തിന് ലഭിച്ചിട്ടുണ്ട്.

ഇവരുടെ മൊഴികളും തെളിവുകളും പരസ്പരം ബന്ധിപ്പിക്കാനായാല്‍ കൊലപാതകത്തിന് തുമ്പുണ്ടാകുമെന്നാണ് കരുതുന്നത്. പ്രതികളെ ഉടന്‍ അറസ്റ്റു ചെയ്യാന്‍ കഴിയുമെന്ന് ആക്ഷന്‍ കമ്മിറ്റി ഭാരവാഹികള്‍ക്കും പ്രമുഖ രാഷ്ട്രീയ നേതാക്കള്‍ക്കും അന്വേഷണ സംഘം ഉറപ്പ് നല്‍കിയിട്ടുണ്ട്. അതുകൊണ്ട് തന്നെ പ്രക്ഷോഭ പരിപാടികള്‍ക്ക് അല്‍പ്പം കാത്തു നില്‍ക്കാനാണ് ആക്ഷന്‍ കമ്മിറ്റിയുടെ തീരുമാനം.

Related News:
ജാനകിവധം: സി സി ടി വി ക്യാമറയുടെ ഹാര്‍ഡ് ഡിസ്‌ക് വിദഗ്ദ്ധ പരിശോധനക്ക് ബംഗളൂരുവിലേക്കയച്ചു