Drugs | മയക്കുമരുന്ന് ആസക്തി 'അർധ മഹാമാരി'യെന്ന് ഹൈകോടതി; ശ്രദ്ധേയ നിരീക്ഷണം

മുംബൈ: (KasargodVartha) മയക്കുമരുന്ന് കടത്ത് ഗുരുതരമായ കുറ്റകൃത്യമാണെന്നും, ലഹരി ആസക്തി 'അർധ-മഹാമാരി'യാണെന്നും ബോംബെ ഹൈകോടതി അഭിപ്രായപ്പെട്ടു. വ്യക്തികളെ അറസ്റ്റ് ചെയ്യുമ്പോഴും, തെളിവുകൾ ശേഖരിക്കുമ്പോഴും അധികാരികൾ നിയമപരമായ നടപടിക്രമങ്ങൾ കർശനമായി പാലിക്കേണ്ടതിൻ്റെ ആവശ്യകത കോടതി ഊന്നിപ്പറഞ്ഞു. മയക്കുമരുന്ന് കടത്തുകാരെ ഉരുക്കുമുഷ്ടി ഉപയോഗിച്ച് നേരിടേണ്ടതാണെങ്കിലും, അത് വ്യക്തി സ്വാതന്ത്ര്യത്തിൻ്റെ വില നൽകി ആകരുതെന്ന് ജസ്റ്റിസ് മിലിന്ദ് ജാദവ് വിധി പ്രസ്താവനയിൽ വ്യക്തമാക്കി.

'മയക്കുമരുന്ന് കടത്ത് ഗുരുതരമായ കുറ്റകൃത്യമാണ്, മയക്കുമരുന്ന് കടത്തുകാരുടെ ഭീഷണി ഇന്ത്യയിൽ മാത്രമല്ല, ലോകമെമ്പാടും നിലനിൽക്കുന്നു. മയക്കുമരുന്ന് ആസക്തിയെ ഒരു അർദ്ധ-മഹാമാരിയായി വിശേഷിപ്പിക്കുന്നത് തെറ്റാവില്ല', കോടതി നിരീക്ഷിച്ചു. 2023-ൽ നാർക്കോട്ടിക് ഡ്രഗ്‌സ് ആൻഡ് സൈക്കോട്രോപിക് സബ്‌സ്റ്റൻസസ് (NDPS) നിയമപ്രകാരം ഔഷധ മരുന്നുകൾ കൈവശം വെച്ചതിന് അറസ്റ്റിലായ നാല് മെഡിക്കൽ റെപ്രസെൻ്റേറ്റീവുകൾക്ക് ജാമ്യം അനുവദിച്ചു കൊണ്ടാണ് കോടതിയുടെ നിരീക്ഷണം. 

കോഡീൻ ഫോസ്ഫേറ്റ് സിറപ്പ്, നൈട്രാസെപാം ഗുളികകൾ, ആൽപ്രാസോലം ഗുളികകൾ എന്നിവയുൾപ്പെടെ നിയന്ത്രിത വസ്തുക്കളുടെ വലിയ അളവിലുള്ള കടത്തിനാണ് ചന്ദ്രഭാൻ ജനാർദ്ദനൻ യാദവ്, സന്ദീപ് രാംബ്രിക്ഷ് പ്രജാപതി, വിനോദ് രാംബച്ചൻ പ്രജാപതി, കുഞ്ജൽ ഭഗവാൻ വിശ്വകർമ്മ എന്നിവർ അറസ്റ്റിലായത്. പ്രതികളുടെ വീടുകളിൽ നടത്തിയ പരിശോധനയിൽ നടപടിക്രമങ്ങളിൽ ക്രമക്കേടുകൾ ഉണ്ടെന്ന് ചൂണ്ടിക്കാട്ടിയാണ് ഇവർ അറസ്റ്റിനെ ചോദ്യം ചെയ്തത്. 

നിയമപരമായ നടപടിക്രമങ്ങൾ പാലിക്കേണ്ടതിൻ്റെ പ്രാധാന്യം കോടതി അടിവരയിട്ടു. മയക്കുമരുന്ന് പിടിച്ചെടുക്കുന്നതിലുള്ള ഫോം അഞ്ച് സർട്ടിഫിക്കറ്റ് പോലുള്ള രേഖകൾ കാണാതായതുൾപ്പെടെയുള്ള നടപടിക്രമങ്ങളിലെ പിഴവുകൾ പ്രതിഭാഗം ചൂണ്ടിക്കാട്ടി. ഇത്തരം ക്രമക്കേടുകൾ കാരണം എൻഡിപിഎസ് കേസുകളിൽ കുറ്റവിമുക്തരാകുന്നവരുടെ എണ്ണം വർധിക്കുന്ന സാഹചര്യത്തിൽ, മാതൃകാ എഫ്‌ഐആർ നടപ്പാക്കണമെന്ന് ആവശ്യപ്പെട്ട് പൊലീസ് ഗവേഷണ വികസന ബ്യൂറോ (ബിപിആർഡി) അടുത്തിടെ നൽകിയ കത്ത് ജസ്റ്റിസ് ജാദവ് ചൂണ്ടിക്കാട്ടി.

സംശയത്തിനോ നടപടിക്രമപരമായ വീഴ്ചകൾക്കോ ഇടം നൽകാതെ നിയമങ്ങളും നടപടിക്രമങ്ങളും കർശനമായി പാലിക്കുന്നത് മയക്കുമരുന്ന് രഹിത സമൂഹം കൈവരിക്കാൻ സഹായിക്കുമെന്നാണ് കോടതി വിലയിരുത്തിയത്.

ഈ വാർത്ത പങ്കുവെക്കുകയും അഭിപ്രായങ്ങൾ രേഖപ്പെടുത്തുകയും ചെയ്യുക.

Bombay High Court termed drug addiction a 'semi-pandemic' and emphasized the need for strict adherence to legal procedures during arrests and evidence collection in drug trafficking cases.

#Drugs, #HighCourt, #Bombay, #NDPS, #Legal, #India