Death | എഡിഎം നവീൻ ബാബുവിൻ്റെ മരണം: പി പി ദിവ്യയെ മാത്രം പ്രതിയാക്കി പൊലീസ് കുറ്റപത്രം

കണ്ണൂർ: (KasargodVartha) അഡീഷണൽ ഡിസ്ട്രിക്ട് മജിസ്ട്രേറ്റ് (എഡിഎം) ആയിരുന്ന നവീൻ ബാബുവിൻ്റെ മരണത്തിൽ കണ്ണൂർ ജില്ലാ പഞ്ചായത്ത് മുൻ പ്രസിഡന്റ് പി പി ദിവ്യയാണ് ഏക പ്രതിയെന്ന് പോലീസ്. ദിവ്യയുടെ പ്രസംഗമാണ് നവീൻ ബാബുവിനെ ആത്മഹത്യയിലേക്ക് നയിച്ചതെന്നാണ് പോലീസിൻ്റെ കണ്ടെത്തൽ. ഇതുമായി ബന്ധപ്പെട്ട കുറ്റപത്രം ഉടൻ തന്നെ കോടതിയിൽ സമർപ്പിക്കും. യാത്രയയപ്പ് യോഗത്തിലേയ്ക്ക് ക്ഷണമില്ലാതെ പോയത് നവീൻ ബാബുവിനെ അപമാനിക്കാൻ ലക്ഷ്യമിട്ടായിരുന്നുവെന്ന് പോലീസ് പറയുന്നു.

പോലീസ് കുറ്റപത്രത്തിൽ പറയുന്നതനുസരിച്ച്, ഒരു പ്രാദേശിക ചാനലിനെ ഉപയോഗിച്ച് ദിവ്യ പ്രസംഗം ചിത്രീകരിക്കുകയും, സ്വന്തം ഫോണിൽ നിന്ന് ദൃശ്യങ്ങൾ പ്രചരിപ്പിക്കുകയും ചെയ്തു. എന്നാൽ, നവീൻ ബാബുവിൻ്റെ ആത്മഹത്യാക്കുറിപ്പ് ഇതുവരെ കണ്ടെത്താനായിട്ടില്ല. കൊലപാതക സാധ്യതകളൊന്നും ശാസ്ത്രീയ പരിശോധനയിൽ തെളിഞ്ഞിട്ടില്ലെന്നും പോലീസ് അറിയിച്ചു. സംഭവത്തിൽ 82 സാക്ഷികളുടെ മൊഴി രേഖപ്പെടുത്തിയിട്ടുണ്ട്. ഏകദേശം 400 പേജുള്ള കുറ്റപത്രമാണ് പോലീസ് തയ്യാറാക്കിയിരിക്കുന്നത്.

2024 ഒക്ടോബറിലാണ് കണ്ണൂർ പളിക്കുന്നിലെ ക്വാർട്ടേഴ്സിൽ നവീൻ ബാബുവിനെ തൂങ്ങിമരിച്ച നിലയിൽ കണ്ടെത്തിയത്. വിരമിക്കാൻ ഏതാനും മാസങ്ങൾ മാത്രം ബാക്കിനിൽക്കെയാണ് സംഭവം. തലേദിവസം നടന്ന യാത്രയയപ്പ് ചടങ്ങിൽ പി പി ദിവ്യ, ശ്രീകണ്ഠാപുരം ചെങ്ങളായിലെ ടി.വി.പ്രശാന്തൻ എന്നയാൾ ആരംഭിക്കുന്ന പെട്രോൾ പമ്പിന് എൻ.ഒ.സി നൽകുന്നതുമായി ബന്ധപ്പെട്ട് നവീൻ ബാബുവിനെതിരെ അഴിമതി ആരോപണം ഉന്നയിച്ചിരുന്നു. ഇതിന് പിന്നാലെയാണ് അദ്ദേഹത്തെ മരിച്ച നിലയിൽ കണ്ടെത്തിയത്. ലാൻഡ് റവന്യൂ ജോയിൻ്റ് കമ്മീഷണറുടെ അന്വേഷണ റിപ്പോർട്ടും ദിവ്യയുടെ ആരോപണങ്ങളാണ് മരണത്തിന് കാരണമായതെന്ന സൂചന നൽകുന്നുണ്ട്.

ഈ വാർത്ത പങ്കുവെക്കുകയും അഭിപ്രായങ്ങൾ രേഖപെടുത്തുകയും ചെയ്യുക. 

Police have filed a chargesheet naming former Kannur District Panchayat President PP Divya as the sole accused in the death of ADM Naveen Babu. The police investigation concluded that Divya's speech at his farewell event led to his death.

#NaveenBabu, #PPDivya, #Kannur, #KeralaPolice, #DeathCase, #Chargesheet