Gold Price Hike | സ്വർണവിലയിൽ കുതിപ്പ്; 22 കാരറ്റിന് 80 രൂപ കൂടി; 18 കാരറ്റിന് വ്യത്യസ്ത നിരക്കുകൾ; വെള്ളി നിരക്കിൽ യോജിപ്പ്

കൊച്ചി: (KasargodVartha) സംസ്ഥാനത്ത് സ്വർണവില കുതിച്ചുയരുന്നു. സ്വർണവ്യാപാര സംഘടനയിലെ ഭിന്നത നിലനിൽക്കുമ്പോഴും, 22 കാരറ്റ് സ്വർണത്തിന് ഇരു വിഭാഗങ്ങളും ഒരേ വിലയാണ് നിശ്ചയിച്ചിരിക്കുന്നത്. തിങ്കളാഴ്ച (10.03.2025) 22 കാരറ്റ് സ്വർണത്തിന് ഗ്രാമിന് 10 രൂപയും പവന് 80 രൂപയും വർധിച്ചു. ഗ്രാമിന് 8050 രൂപയും പവന് 64400 രൂപയുമാണ് നിരക്ക്.

18 കാരറ്റ് സ്വർണത്തിൽ ആശയക്കുഴപ്പം

എന്നാൽ, 18 കാരറ്റ് സ്വർണത്തിന് വ്യത്യസ്ത വിലകളാണ് ഇരു വിഭാഗങ്ങളും നിശ്ചയിച്ചിരിക്കുന്നത്. അയമു ഹാജി പ്രസിഡന്റും അഡ്വ. എസ് അബ്ദുൽ നാസർ സെക്രടറിയുമായ ഓൾ കേരള ഗോൾഡ് ആൻഡ് സിൽവർ മെർച്ചന്റ്സ് അസോസിയേഷന്റെ (AKGSMA) 18 കാരറ്റ് സ്വർണത്തിന് ഗ്രാമിന് അഞ്ച് രൂപ കൂടി 6620 രൂപയും പവന് 40 രൂപ കൂടി 52960 രൂപയുമാണ് തിങ്കളാഴ്ച നിശ്ചയിച്ച വില.

എന്നാൽ, ഭീമ ഗ്രൂപ്പ് ചെയർമാൻ ഡോ. ബി ഗോവിന്ദൻ ചെയർമാനും ജസ്റ്റിൻ പാലത്ര പ്രസിഡന്റുമായ ഓൾ കേരള ഗോൾഡ് ആൻഡ് സിൽവർ മെർച്ചന്റ്സ് അസോസിയേഷൻ 18 കാരറ്റ് സ്വർണത്തിന് ഗ്രാമിന് അഞ്ച് രൂപ കൂടി 6635 രൂപയും പവന് 40 രൂപ കൂടി 53080 രൂപയുമാണ് നിശ്ചയിച്ചിരിക്കുന്നത്. ഈ വില വ്യത്യാസം 18 കാരറ്റ് സ്വർണം വാങ്ങാൻ എത്തുന്ന ഉപഭോക്താക്കളിൽ ആശയക്കുഴപ്പം സൃഷ്ടിക്കുന്നുണ്ട്.

വെള്ളി വിലയിൽ യോജിപ്പ്

അതേസമയം, സാധാരണ വെള്ളിക്ക് ഇരുവിഭാഗവും ഗ്രാമിന് 106 രൂപയാണ് നിശ്ചയിച്ചിരിക്കുന്നത്. സ്വർണവിലയിലെ ഈ വർധനവ് സാധാരണക്കാരെ സംബന്ധിച്ചിടത്തോളം വലിയ തിരിച്ചടിയാണ്. വിവാഹം പോലുള്ള ആഘോഷങ്ങൾക്കായി സ്വർണം വാങ്ങാൻ ഉദ്ദേശിക്കുന്നവർക്ക് ഇത് വലിയ സാമ്പത്തിക ബാധ്യത ഉണ്ടാക്കുന്നു. എന്നാൽ നിക്ഷേപകർക്ക് ഇത് അവസരമാണ്. സ്വർണവില ഇനിയും ഉയരുമോ എന്ന് ഉറ്റുനോക്കുകയാണ് വ്യാപാരികളും ഉപഭോക്താക്കളും.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ രേഖപ്പെടുത്തൂ.

Gold prices in Kerala surge, with 22-carat gold seeing an increase. Discrepancies in 18-carat gold prices cause confusion. Silver rates remain stable. The hike poses financial challenges for consumers.

#GoldPrice, #KeralaGold, #SilverRate, #MarketNews, #GoldMarket, #PriceHike