ഒരു വനിതാ മുഖ്യമന്ത്രിയെ കേരളത്തിന് ലഭിക്കാൻ സമൂഹത്തിൽ എന്ത് മാറ്റം സംഭവിക്കണം? കാസർകോട്ടെ വനിതാ അധ്യക്ഷന്മാർ പ്രതികരിക്കുന്നു

വനിതകളെ മുഖ്യമന്ത്രി സ്ഥാനാർഥിയായി നിര്‍ത്തണം. പുരുഷ കേന്ദ്രീകൃത സാമൂഹ്യ വ്യവസ്ഥ മാറണം. സമൂഹത്തിന്റെ മനോഭാവം സ്ത്രീകള്‍ക്ക് നേതൃപദവിയിലെത്താനുളള കഴിവുണ്ട് എന്ന് ബോധ്യപ്പെടണം.



ഇടവിട്ട് റിസര്‍വേഷന്‍ വേണം - ഗിരിജ മോഹൻ (വെസ്റ്റ് എളേരി ഗ്രാമ പഞ്ചായത്ത് പ്രസിഡണ്ട്)

സ്ത്രീകള്‍ക്ക് ഇന്ന് ഏത് മേഖലയിലും എത്തപ്പെടണമെങ്കില്‍ റിസര്‍വേഷന്‍ ഉണ്ടാവണം. അതേ പോലെ ഇടവിട്ട് ഇടവിട്ട് അഞ്ച് വര്‍ഷത്തിലൊരിക്കല്‍ സ്ത്രീയായിരിക്കണം മുഖ്യമന്ത്രിയെന്ന് തീരുമാനം ഉണ്ടാവണം. അങ്ങിനെ റിസര്‍വേഷന്‍ തന്നതുകൊണ്ടു മാത്രമല്ലേ ഞാന്‍ പ്രസിഡണ്ടായത്. അതേ പോലെ വനിതാ മുഖ്യമന്ത്രി സ്ഥാനത്തേക്ക് റിസര്‍വേഷന്‍ വേണം.


സ്ത്രീ സുരക്ഷ ഒന്നു കൂടി മെച്ചപ്പെടുത്തണം - സുഫൈജാ അബൂബക്കര്‍ (ചെമ്മനാട് ഗ്രാമ പഞ്ചായത്ത് പ്രസിഡന്റ്)

സ്ത്രീ സുരക്ഷ ഒന്നു കൂടി മെച്ചപ്പെടുത്തണം. വനിതാ മുഖ്യമന്ത്രി സ്ഥാനത്തേക്കും സംവരണം വേണം. പുരുഷന്‍മാരുടെ മനോഭാവം മാറണം. നിലവിലുളള നിയമങ്ങള്‍ മാറണം. ഉദാഹരണത്തിന് ഒരു കമിറ്റി രൂപീകരിക്കുമ്പോള്‍ അതില്‍ രണ്ട് വനിതകള്‍ വേണം എന്ന നിര്‍ദേശം വെക്കുകയും, അതു പോലെ മാത്രം ചെയ്യുകയും ചെയ്യുന്നു. എന്തിനാണിങ്ങിനെ നമ്പറ് കൊടുക്കുന്നത്. കഴിവുളള സ്ത്രീകളെയൊക്കെ കമിറ്റിയിലെടുക്കാന്‍ പാടില്ലേ. കഴിവില്ലായ്മയാണ് കാരണം എന്ന് പറയുന്നത് ശരിയല്ല. മറിച്ച് കാഴ്ചപ്പാടിലാണ് മാറ്റം ഉണ്ടാവേണ്ടത്.

പുരുഷ മേധാവിത്വമാണ് കാരണം - പ്രസന്ന പ്രസാദ് (പനത്തടി ഗ്രാമപഞ്ചായത്ത് പ്രസിഡണ്ട്)

ഒരിക്കലും പുരുഷന്‍മാരുടെ ചിന്ത ഒരു വനിതാ മുഖ്യമന്ത്രി ഉണ്ടാവണം എന്ന അവസ്ഥയില്‍ എത്തുന്നില്ല. പുരുഷന്‍മാര്‍ പിടിച്ചടക്കപ്പെടുകയാണ്. പുരുഷ മേധാവിത്വമാണ് ഇതിന് കാരണം. സ്ത്രീകളായ ഞങ്ങള്‍ക്കൊക്കെ ആഗ്രഹമുണ്ട് ഒരു വനിതാ മുഖ്യമന്ത്രി ഉണ്ടാവണമെന്ന്. പക്ഷേ അത് നടപ്പിലാവുന്നില്ലെന്നു മാത്രം. ഒരു വനിതയാണു മുഖ്യമന്ത്രിയെങ്കില്‍ സ്ത്രീകള്‍ക്ക് ഇന്നുളളതിനെക്കാള്‍ സുരക്ഷിതത്വ അവസ്ഥ ഉണ്ടാക്കിയെടുക്കാനും സമൂഹചിന്ത സ്ത്രീ അനുകൂലമാക്കാനും സാധിക്കുമായിരുന്നു.


വനിതകള്‍ മൊത്തം ആവശ്യപ്പെടണം - അഡ്വ. ശമീറ ഫൈസൽ (മൊഗ്രാല്‍ പുത്തൂർ ഗ്രാമ പഞ്ചായത്ത് പ്രസിഡണ്ട്)

വനിതകള്‍ മൊത്തം ആവശ്യപ്പെടണം. ഇവിടെ ഭൂരിപക്ഷം സ്ത്രീകളല്ലേ. അതുകൊണ്ട് തന്നെ വനിതാ മുഖ്യമന്ത്രി ഉണ്ടാവണം എന്ന്. ഇങ്ങിനെ ആവശ്യപ്പെട്ടാല്‍ നടക്കുക തന്നെ ചെയ്യും. ലോകം കണ്ട ഏറ്റവും വലിയ പ്രധാനമന്ത്രി ആയിരുില്ലേ ഇന്ദിരാഗാന്ധി. അവര്‍ പ്രധാനമന്ത്രി ആയതു കഴിവും, പ്രാപ്തിയും ഉണ്ടായതു കൊണ്ടല്ലേ. അതേ പോലെ ആര്‍ജവം ഉളള സ്ത്രീകളുണ്ടായാല്‍ അവര്‍ക്കും മുഖ്യമന്ത്രി സ്ഥാനം കൊടുക്കേണ്ടി വരും. അവിടേയും ഒരു വനിതാ മുഖ്യമന്ത്രി എന്നതിലുപരി കഴിവുളള ഒരു വ്യക്തിയാണ് മുഖ്യമന്ത്രി സ്ഥാനത്തേക്ക് എത്തിപ്പെട്ടതെന്ന് സമൂഹത്തിന് ബോധ്യമാവും. സ്ത്രീയെന്നോ പുരുഷനെന്നോ ഉളള വിത്യസമല്ല അവിടെ പ്രധാനം. കഴിവുളള വ്യക്തി എന്ന് മാത്രമാണ് കരുതേണ്ടത്.

സ്ത്രീകള്‍ക്ക് മുന്‍തൂക്കം കൊടുക്കുന്ന ഒരു സമൂഹ ചിന്ത ഉരുത്തിരിഞ്ഞു വരണം - പ്രമീള സി വി (ചെറുവത്തൂര്‍ ഗ്രാമപഞ്ചായത്ത് പ്രസിഡണ്ട്)

പല കമിറ്റികളിലും സംഘടനകളിലും സ്ത്രി സാനിധ്യം ഉണ്ടാക്കിയെടുക്കുന്നത് ഇത്ര ഇത്ര പേര് മതി എന്ന നിലയിലാണ്. ഇതു കൊണ്ടൊന്നും സ്ത്രീ ശാക്തീകരണം നടക്കില്ല. ഇപ്പോള്‍ തന്നെ റിസര്‍വേഷന്‍ ഇത്ര പേര്‍ക്കാണ് എന്ന കണക്കിലാണ് ഓരോ പദവിയും സ്ത്രീകള്‍ക്ക് നല്‍കുന്നത്. സ്ത്രീകള്‍ക്ക് മുന്‍തൂക്കം കൊടുക്കുന്ന ഒരു സമൂഹ ചിന്ത ഉരുത്തിരിഞ്ഞു വരണം. ഏത് പദവിയിലും സ്ത്രീകള്‍ക്ക് ശക്തി പൂര്‍വ്വം പ്രവര്‍ത്തിക്കാന്‍ കഴിയുമെന്ന ധാരണ ഉണ്ടാവണം. അങ്ങിനെ ആണെങ്കില്‍ കേരളത്തില്‍ ഒരു വനിതാ മുഖ്യമന്ത്രിയെ നമുക്ക് പ്രതീക്ഷിക്കാനാവും. സ്ത്രീകള്‍ക്ക് കഴിവും തന്റേടവും ഇല്ലാത്തതു കൊണ്ടല്ല മറിച്ച് അവസരം ലഭ്യമാവാത്തതാണ് പ്രധാന കാരണം. കേരളത്തില്‍ ഇപ്പോള്‍ തന്നെ ഈ സ്ഥാനമൊഴിച്ച് ബാക്കി എല്ലാ മേഖലകളിലും സ്ത്രീകള്‍ക്ക് സ്ഥാനവും, അംഗീകാരവും ലഭിക്കുന്നുണ്ട്.

മുഖ്യമന്ത്രി സ്ഥാനത്തേക്കും സംവരണം ഉണ്ടായാല്‍ നല്ലത് - പി ലക്ഷ്മി (ഉദുമ ഗ്രാമ പഞ്ചായത്ത് പ്രസിഡണ്ട്)

ഒരു വനിതാ മുഖ്യമന്ത്രി ഉണ്ടായിരുന്നെങ്കില്‍ സ്ത്രീകളുടെ മനസ്സറിഞ്ഞ് അവരനുഭവിക്കുന്ന പ്രയാസങ്ങളറിഞ്ഞ് കരുതലുണ്ടാവാന്‍ അവര്‍ക്കാവുമായിരുന്നു. കഴിവുളള സ്ത്രീകള്‍ ഉണ്ടെങ്കിലും അതില്‍ മികച്ച എം എല്‍ എമാരുണ്ടെങ്കിലും, ഏത് രാഷ്ട്രീയ പാര്‍ടികളും മുഖ്യമന്ത്രി സ്ഥാനം അലങ്കരിക്കാനുളള അവസരം ലഭ്യമാക്കി കൊടുക്കുന്നില്ല. പുരുഷ മേധാവിത്വം എന്ന് ഞാന്‍ പറയുന്നില്ല. പക്ഷേ മുഖ്യമന്ത്രി സ്ഥാനത്തേക്കും സംവരണം ഉണ്ടായാല്‍ നല്ലതാണെു തോന്നുന്നു. ഇടവിട്ട ഇടവിട്ട കാലയളവിലെങ്കിലും മുഖ്യമന്ത്രി കസേര സ്ത്രീകള്‍ക്ക് അനുവദിച്ചു കൊടുക്കാന്‍ സമൂഹം തയ്യാറാവേണ്ടിയിരിക്കുന്നു.

സമൂഹം മൊത്തം ചിന്തിച്ചാലേ ഇതിനൊരു പരിഹാരമാവൂ - പി വി മിനി (മുളിയാര്‍ ഗ്രാമ പഞ്ചായത്ത് പ്രസിഡണ്ട്)

ഇന്നും സമൂഹത്തിന്റെ ചിന്ത സ്ത്രീകള്‍ക്ക് കഴിയുമോ മുഖ് മന്ത്രി സ്ഥാനത്തിരിക്കുവാന്‍ എന്നതാണ്. മറ്റ് സംസ്ഥാനങ്ങളില്‍ വനിതാ മുഖ്യമന്ത്രിമാരുണ്ടെങ്കിലും കേരളം ആ പരുവത്തിലേക്ക് മാറിയിട്ടില്ല ഇന്ന് ഇതുവരെ. കുടുംബശ്രീ എന്ന് പറയുന്ന സ്ത്രീ സംഘ പ്രവര്‍ത്തനം ലോകത്തിനു തന്നെ മാതൃകയാണ്. സ്ത്രീ ശാക്തീകരണം അതി ബൃഹത്തായ രീതിയില്‍ നടക്കുന്ന സംസ്ഥാനമാണ് കേരളം. ഞങ്ങള്‍ക്ക് വേണം ഒരു വനിതാ മുഖ്യമന്ത്രിയെന്ന് വനിതകള്‍ ശക്തമായി പ്രതികരിച്ചാല്‍ ആ ലക്ഷ്യം സാക്ഷാത്കരിക്കാനാവും. ഈ വരുന്ന ഇലക്ഷനില്‍ തന്നെ സ്ഥാനാർഥികളായി സ്ത്രീകളെ മല്‍സരിപ്പിക്കാന്‍ കൂടി വിമുഖത കാട്ടുന്ന രാഷ്ട്രീയ കക്ഷികളെ കാണുന്നില്ലേ ?. അങ്ങിനെയുളള രാഷ്ട്രീയ കക്ഷികള്‍ക്ക് സങ്കല്‍പിക്കാന്‍ കൂടി ആവുമോ ഒരു വനിതാ മുഖ്യമന്ത്രിയെ ?. സമൂഹം മൊത്തം ചിന്തിച്ചാലേ ഇതിനൊരു പരിഹാരമാവൂ.

< !- START disable copy paste -->