മണലാരണ്യത്തിലും കാല്‍പന്തുകളിയുടെ മര്‍മം അറിഞ്ഞ് ഇല്യാസ്
Oct 25, 2012, 10:43 IST
കാസര്‍കോടിന്റെയും ദുബൈ മലയാളികളുടെയും ഫുട്‌ബോള്‍ വീരോതിഹാസം രചിക്കുമ്പോള്‍ തീര്‍ചയായും ഇല്യാസ് റഹ്മാന്റെ പേര് തങ്കലിപികളാല്‍ തന്നെയുണ്ടാകും. കാസര്‍കോട് തളങ്കര മുസ്ലീം ഹൈസ്കൂളിന്റെ വിഖ്യാതമായ ഫുട്‌ബോള്‍ ടീമില്‍ അംഗമായി കൊണ്ടാണ് പ്രൊഫഷണല്‍ ഫുട്‌ബോള്‍ രംഗത്തേക്ക് ഇല്യാസ് എ. റഹ്മാന്‍ കാലെടുത്തുവെയ്ക്കുന്നത്. കാഞ്ഞങ്ങാട്ടു നിന്നുള്ള കായികാധ്യാപകന്‍ ഹസന്‍ മാസ്റ്റര്‍, കോച്ച് മമ്മു, ഐ.ടി.ഐയിലെ പേരു കേട്ട കളിക്കാരന്‍ ചെമ്മനാട് ഹനീഫ, തായലങ്ങാടിയിലെ മുസ്തഫ എന്നവരുടെ മാര്‍ഗ നിര്‍ദേശങ്ങള്‍ ഇല്യാസിന്റെ ഫുട്‌ബോള്‍ പ്രതിഭയുടെ വളര്‍ചയ്ക്ക് സഹായകമായി.
ഇന്റര്‍ സ്കൂള്‍ തല മത്സരങ്ങളില്‍ മിന്നിത്തിളങ്ങിയ മികച്ച ഫുട്‌ബോള്‍ കളിക്കാരിലൊരാളായി മാറിയ അദ്ദേഹത്തിന് കാസര്‍കോട് ഗവ. കോളേജിലെ ഫുട്‌ബോള്‍ ടീം ക്യാപ്റ്റനാകാന്‍ അധികകാലം വേണ്ടിവന്നില്ല. കാസര്‍കോട് ഗവ. കോളേജില്‍ ധാരാളം സോണല്‍ തല മത്സരങ്ങളും അന്ന് നടന്നിരുന്നു. ഗവ. കോളേജ് ഫുട്‌ബോളില്‍ കരുത്തുറ്റ ശക്തിയായി വളര്‍ന്നത് ഇല്യാസിന്റെ നായകത്വത്തിന്‍ കീഴിലാണ്. ചിന്താവിഷ്ടിയായ ശ്യാമള എന്ന സിനിമ നിര്‍മിച്ച ഷാര്‍ജയിലെ മലയാളി വ്യവസായി കരുണന്‍, സ്‌ട്രൈക്കര്‍ പള്ളത്ത് അബ്ദുല്ല എന്നിവര്‍ അന്ന് ടീം അംഗളായിരുന്നു. എ സോണില്‍ കാസര്‍കോട് കോളേജിന് കിരീടം നേടികൊടുക്കാന്‍ ഇല്യാസിന്റെ ടീമിന് സാധിച്ചു. ഇതോടൊപ്പം തന്നെ ജില്ലയിലെ ലീഗ് മത്സരങ്ങളിലും സജീവമായി.
കണ്ണൂര്‍ ജില്ലയില്‍ ക്ലബ് തല മത്സരങ്ങള്‍ എമ്പാടുമുണ്ടായിരുന്നു. സെവന്‍സും, ഇലവന്‍സും അരങ്ങ് തകര്‍ത്ത കാലമായിരുന്നു അന്ന്. കാസര്‍കോട് നാഷണല്‍ ക്ലബിന്റെ തേരാളികളിലൊരാളായി ഇല്യാസ് മാറി. ജില്ലയില്‍ ലീഗ് ഫുട്‌ബോള്‍ തുടങ്ങിയപ്പോള്‍ നാഷണല്‍ ക്ലബ് കിരീടമണിഞ്ഞു. കേരളത്തിലെയും ദക്ഷിണ കര്‍ണാടകയിലെ നിരവധി മൈതാനങ്ങളിലും ഫുട്‌ബോളിന്റെ ചാരുതയാര്‍ന്ന നിമിഷങ്ങള്‍ സമ്മാനിക്കാന്‍ ഇല്യാസിന് കഴിഞ്ഞു. നൂറുകണക്കിന് ടൂര്‍ണമെന്റുകളിലാണ് ഇല്യാസ് ബൂട്ടണിഞ്ഞത്.
ബാംഗ്ലൂളില്‍ സ്റ്റാന്റേര്‍ഡ് ടൂര്‍ണമെന്റില്‍ വരെ ആ കേളി മികവ് എത്തിപ്പെട്ടു. കാസര്‍കോട് നാഷണല്‍ ക്ലബിന്റെ പ്രതാപകാലത്ത് അതില്‍ അംഗമാകാന്‍ കഴിഞ്ഞതിലുള്ള ചാരിതാര്‍ത്ഥ്യം ഇല്യാസ് മറച്ച് വെയ്ക്കുന്നില്ല. ഓരോ ടൂര്‍ണമെന്റ് ജയിച്ച് വരുമ്പോഴും നാട് ആഹ്ലാദലഹരിയില്‍ സ്വീകരിക്കാനുണ്ടാകും. അന്നത്തെ കാണികളുടെ സ്‌നേഹ പ്രകടനവും, ആവേശവുമാണ് ഇന്നും പ്രചോദനമായി നില്‍ക്കുന്നത്. യു.എ.ഇയില്‍ എത്തിയിട്ട് മൂന്ന് പതിറ്റാണ്ടിലേറെയായിട്ടും ഇല്യാസ് ഫുട്‌ബോളിനെ വിടാന്‍ തയ്യാറായില്ല. എല്ലാ വെള്ളിയാഴ്ചകളിലും യു.എഫ്.എഫ്.സി ക്ലബില്‍ നാദ്ഷിയ ഗ്രൗണ്ടില്‍ പരിശീലനത്തില്‍ പങ്കെടുക്കുന്നു.
പ്രവാസികള്‍ക്കിടിയില്‍ ഫുട്‌ബോള്‍ മത്സരങ്ങള്‍ സംഘടിപ്പിക്കുന്നതോടൊപ്പം സീതിഹാജി മെമ്മോറിയല്‍ ട്രോഫി, സി.എച്ച്. മുഹമ്മദ്‌കോയ ട്രോഫി, കോപ്പ ഇന്ത്യട്രോഫി, ഗോവകേരള ട്രോഫി, വെല്‍ഫിറ്റ് കപ്പ് ട്രോഫി, ഫയര്‍പ്ലെ ഇന്റര്‍ സെവന്‍സ് ട്രോഫി, സെവന്‍സ് സൗഡ് യു.എ.ഇ ട്രോഫി, യു.എഫ്.എഫ്.സി ട്രോഫി എന്നീ ടൂര്‍ണമെന്റുകളില്‍ ട്രോഫികളും സമ്മാനങ്ങളും വാരിക്കൂട്ടി. ഒക്ടോബറില്‍ 61 വയസ് തികഞ്ഞപ്പോഴും 16ന്റെ പ്രായത്തെ മറക്കുന്ന ചൈതന്യമാണ് ആ മനസിലുള്ളത്. ഫുട്‌ബോളില്‍ എന്ന പോലെ എഴുത്തിലും സജീവമാണ് ഇല്യാസ്. നിരവധി ലേഖനങ്ങള്‍ അദ്ദേഹം ആനുകാലികങ്ങളില്‍ എഴുതിയിട്ടുണ്ട്. ഈ ഫുട്‌ബോള്‍ മാന്ത്രികനെ കെസഫ് പുരസ്കാരം നല്‍കി ആദരിച്ചു. ഈ കലാകായിക പ്രേമിയെ കാസര്‍കോട്ടുകാരും ആദരിക്കേണ്ടതല്ലെ?
-ഹുസൈന്‍ പടിഞ്ഞാര്‍
Keywords: Football, Player, Illyas.A.Rahman, Article, Husain Padinhar
Tags
Share this story
