വൈ-റ്റു-കെ

കേരളത്തിന്‍റെ കോവിഡ് തലസ്ഥാനമാണ്‌ കാസര്‍ക്കോട് എന്ന തരത്തിലാണ് മാധ്യമചര്‍ച്ചകള്‍ മുന്നേറുന്നത്. പോലീസ്സുകാരടക്കം കാസര്‍ക്കോട്ട് ജോലി ചെയ്യുന്ന ഗവണ്മെന്‍റുദ്യോഗസ്ഥരില്‍ നല്ലൊരു പങ്ക്, തെക്കന്‍ ജില്ലകളിലെ ലോക്കല്‍ രാഷ്ട്രീയനേതാക്കളുടെ അപ്രീതിക്ക് പാത്രമായതിന്‍റെ പേരില്‍ സ്ഥലമാറ്റം കിട്ടിയവരാണ്. ബ്രിട്ടീഷ് ഇന്ത്യന്‍ ഭരണകൂടത്തിന് ആന്തമാന്‍ എന്നതുപോലെയാണ് തെക്കന്‍ കേരളത്തിലുള്ളവര്‍ക്ക് കാസര്‍ക്കോട്. അവിടത്തെ പോസ്റ്റിംഗ് എന്നുകേട്ടാല്‍ നരകത്തില്‍ പോവുന്നതുപോലെയാണ്. ജയിലെ സൗകര്യങ്ങള്‍ വര്‍ധിപ്പിച്ചാല്‍ കുറ്റകൃത്യങ്ങള്‍ കൂടുമെന്ന് പണ്ടാരോ പറഞ്ഞതുപോലെ കാസര്‍ക്കോട്ട് വികസനമുണ്ടായാല്‍ ജീവനക്കാര്‍ക്ക് അവിടത്തെ നിയമനം ശിക്ഷയായി തോന്നില്ലെന്നും അവരെ ചൊല്പടിക്കുനിര്‍ത്താന്‍ ബുദ്ധിമുട്ടാണെന്നും രാഷ്ട്രീയനേതൃത്വങ്ങള്‍ക്ക് തോന്നിയതിനാലാവാം കാസര്‍ക്കോട് ഇന്നും കാലാപാനിയായി തുടരുന്നു. പക്ഷേ, മംഗലാപുരം അടുത്തായതിനാല്‍ നാട്ടുകാര്‍ക്ക് വലിയ ബുദ്ധിമുട്ട് അനുഭവപ്പെട്ടില്ല. അങ്ങോട്ടുള്ള വഴിയാണ് ഇപ്പോള്‍ അടഞ്ഞിരിക്കുന്നത്.

കൊറോണയുടെ കേന്ദ്രമാണ് കാസര്‍ക്കോട് എന്ന വാര്‍ത്ത പരന്നതോടെ ഓരോ ജീവനക്കാരന്‍റെയും വീട്ടുകാര്‍ വിളിക്കുകയാണ്‌; സുഖവിവരങ്ങളറിയാന്‍. മാത്രമല്ല, ലീവെടുത്ത് നാട്ടിലെത്താന്‍ പലരോടും കുടുംബാംഗങ്ങള്‍ ആവശ്യപ്പെടുന്നുണ്ട്. വിദേശരാജ്യങ്ങളില്‍ നിന്നുള്ള ഭയപ്പെടുത്തുന്ന വാര്‍ത്തകള്‍ കേള്‍ക്കുമ്പോള്‍ ഉറ്റവരുടെ ജീവനില്‍ കൊതിയുള്ളവര്‍ അങ്ങനെ ചെയ്യുക സ്വാഭാവികമാണ്.

കണ്ടാല്‍ ഗള്‍ഫുകാരാണെന്ന് തോന്നുന്നവരോട് നികൃഷ്ടജീവികളെപ്പോലെയാണ് ബന്ധപ്പെട്ട ഉദ്യോഗസ്ഥര്‍ പെരുമാറുന്നതെന്ന് ജ്യേഷ്ഠന്‍റെ കുറിപ്പില്‍ വ്യക്തമാണ്. വിദേശങ്ങളില്‍ നിന്നാണ് കൊറോണ വരുന്ന ധാരണയുള്ളതിനാല്‍ ഇപ്പോള്‍ ഇത് സ്വാഭാവികമാണ്. എന്നാല്‍ ഗള്‍ഫുകാരോടുള്ള മുന്‍വിധി ഇന്നുതുടങ്ങിയതല്ലെന്നതാണ് വാസ്തവം. കൂനിന്മേല്‍ കുരുവെന്നതുപോലുള്ള പങ്കുമാത്രമേ ഇക്കാര്യത്തില്‍ കൊറോണയ്ക്കുള്ളൂ.

ജയില്‍ ശിക്ഷയെന്ന പോലെ കാസര്‍ക്കോട്ടേക്ക് ട്രാന്‍സ്ഫര്‍ കിട്ടുന്നവരില്‍ ചിലര്‍ക്ക് ആശ്വാസവും ഗള്‍ഫുകാരായിരുന്നു. എന്തെങ്കിലും കാര്യം സാധിച്ചുകൊടുത്താല്‍ മോശമല്ലാത്ത കൈമടക്കുകിട്ടും. അത് എല്ലാ കാര്യങ്ങളും ഉദ്യോഗസ്ഥന്‍ സ്വന്തം ഉത്തരവാദിത്തത്തില്‍ ചെയ്തുകൊടുക്കും കാശ് വാങ്ങുമ്പോഴും അത് നല്കുന്നവരെക്കുറിച്ച് മനസ്സിലുള്ള ധാരണ അവര്‍ മണ്ടന്മാരാണ് എന്നായിരിക്കും; ബ്യൂറോക്രസിയുടെ നൂലാമാലകള്‍ക്കുപുറകെ ഓടാനുള്ള വിവരമില്ലാത്തതിനാല്‍ എല്ലാം കാശുകൊടുത്ത് ശരിയാക്കുന്നവര്‍.

ഗള്‍ഫുകാരെക്കുറിച്ച് പരദേശികളായ ഉദ്യോഗസ്ഥര്‍ക്ക് പുച്ഛമാണെങ്കിലും നാട്ടുകാര്‍ക്കവര്‍ വിജയികളാണ്. ജനിക്കുന്ന ഓരോ ആണ്‍കുട്ടിയും ഗള്‍ഫുകാരനാവാന്‍ മോഹിച്ചു. മരുഭൂമിയില്‍ വിയര്‍പ്പൊഴുക്കി പണിയെടുത്തതിനുശേഷം നാലഞ്ച് പെട്ടിയുമായി നാട്ടില്‍ വന്നിറങ്ങുമ്പോഴുള്ള പത്രാസ് വേറെയെവിടെ നിന്നും കിട്ടില്ല. മറുനാട്ടിലേക്ക് ചേക്കേറാനുള്ള തയാറെടുപ്പുകള്‍ ചെറുപ്പത്തില്‍ തന്നെ തുടങ്ങും. തെക്കുള്ളവര്‍ വയസ്സില്‍ കൃത്രിമം കാണിക്കുക, ഔദ്യോഗികരേഖകളില്‍ പ്രായം കുറച്ചെഴുതിക്കൊണ്ടാണ്. എന്നാല്‍ കാസര്‍ക്കോട്ടെ ഇച്ചമാര്‍ ആണ്‍കുട്ടികളുടെ പ്രായം കൂട്ടിയാണെഴുതുക. പെട്ടെന്നുതന്നെ പാസ്പോര്‍ട്ടും വിസയും സംഘടിപ്പിക്കാനുള്ള സൗകര്യത്തിനുവേണ്ടിയാണത്. ഗള്‍ഫില്‍ എത്തിപ്പെടുകയാണ് മുഖ്യലക്ഷ്യം എന്നതിനാല്‍ തന്നെ പഠിത്തത്തില്‍ ശ്രദ്ധിക്കുകയില്ല.

സ്കൂളില്‍ പോക്കര്‍ പഠിച്ച ക്ലാസ്സുകളില്‍ ബഹുഭൂരിപക്ഷവും ഗള്‍ഫുകാരുടെ മക്കളായിരുന്നു. ഉപജീവനത്തിനായി പഴയ തലമുറ സിങ്കപ്പൂര്‍, മലേഷ്യ തുടങ്ങിയ ദക്ഷിണപൂര്‍വേഷ്യന്‍ രാജ്യങ്ങളെയാണ് ആശ്രയിച്ചിരുന്നത്. എന്നാല്‍ പുതിയ തലമുറയിലത് ഗള്‍ഫ് രാഷ്ട്രങ്ങളായി. രണ്ടിനും ഇടയിലുള്ള കുടുംബപശ്ചാത്തലമായിരുന്നു പോക്കറിന്‍റേത്. ഉപ്പ സിങ്കപ്പൂരിലും ജ്യേഷ്ഠന്‍ ഗള്‍ഫിലും. വീടുകളില്‍ ആണുങ്ങള്‍ പുറത്തായതിനാല്‍ കുട്ടികള്‍ പഠിത്തത്തില്‍ ഉഴപ്പുന്നുവെന്നത് അധ്യാപകരുടെ പരാതിയായിരുന്നു. ഗള്‍ഫ് സ്വപ്നം കാരണമായി കുട്ടികള്‍ പഠിക്കുന്നില്ലെന്നതും അതിന്‍റെ കൂടെയുണ്ടായിരുന്നു.

ജ്യേഷ്ഠന്‍റെ കുറിപ്പില്‍ വിഹ്വലത പ്രകാരമാണ്; കാസര്‍ക്കോടിന്‍റെ തെരുവീഥികളിലും ഇടവഴികളിലും ഗ്രാമാന്തരങ്ങളിമെല്ലാം പറഞ്ഞറിയിക്കാനാവാത്ത ഒരു അനിശ്ചിതത്വം നിലനില്ക്കുന്നു. ലോകത്തെല്ലായിടത്തുമുള്ളതാണ്. കേരളത്തില്‍, കൂടുതല്‍ ശക്തം കാസര്‍ക്കോട്ടാണെന്നുമാത്രം.

ചെറിയമ്മാവന്‍റെ കൂടെ മംഗലാപുരത്തുപോകുമ്പോള്‍ കണ്ട വഴികള്‍. പിന്നീട് ജില്ലയുടെ വിവിധ ഭാഗങ്ങളില്‍ സഞ്ചരിച്ചത് അധ്യാപകരുടെ കൂടെയായിരുന്നു; ക്വിസ് മത്സരങ്ങളിലും മറ്റും പങ്കെടുക്കാന്‍. സ്കൂള്‍ തലത്തില്‍ ഒന്നാം സ്ഥാനം ലഭിച്ചാല്‍ ഉപജില്ലയിലും ജില്ലയിലുമൊക്കെ പോകണം. ഉപ്പ സിങ്കപൂരും മൂത്ത ജ്യേഷ്ഠന്‍ ഗള്‍ഫിലുമാണ്. രണ്ടാമത്തെ ജ്യേഷ്ഠന്‍ പഠിക്കുന്നു. ജ്യേഷ്ഠന്‍റെ പഠിത്തം മുടക്കേണ്ടെന്നുകരുതി അധ്യാപകര്‍ തന്നെ കൊണ്ടുപോകും. മിക്കതിലും യാത്രയുടെയും അതിനിടയിലുള്ള ഭക്ഷണത്തിന്‍റെയും ചെലവ് സ്വന്തമായി വഹിക്കണം. വീട്ടില്‍ നിന്നിറങ്ങുന്നതിനുമുമ്പ് ഉമ്മ പൈസ പോക്കറ്റിലിട്ടുതരും. പക്ഷേ, യാത്ര അധ്യാപകന്‍റെ നേതൃത്വത്തിലാണ്. അതില്‍ ഇടപെടാന്‍ ധൈര്യം വരില്ല. അതുകൊണ്ടുതന്നെ ചെലവുകളെല്ലാം അധ്യാപകന്‍ വഹിക്കും.

നാട്ടില്‍ പലയിടത്തും പോലീസ്സുകാര്‍ ആളുകളെ അടിച്ചോടിക്കുന്ന വാര്‍ത്തകളാണ് മാധ്യമങ്ങളില്‍ നിറയെ. അന്നൊക്കെ ആ സ്ഥലങ്ങള്‍ കാണുമ്പോള്‍ വലിയ പ്രതീക്ഷകളായിരുന്നു. ജില്ലയിലെ സ്ഥലനാമങ്ങള്‍ പല തരത്തിലാണ്. മലയാളത്തിലും തുളുവിലും കന്നഡയിലുമൊക്കെയുള്ള പഴയ പേരുകള്‍. പുതുതായി ഇട്ട കൃത്രിമത്വം ദ്വോതിപ്പിക്കുന്ന പേരുകളുമുണ്ട്. മാവുങ്കാലും രാംനഗറും പോലെ പരസ്പരം ലയിക്കാതെ കിടക്കുന്ന പേരുകളുണ്ട്. എന്നാല്‍ അവയൊന്നുമല്ല, പോക്കറിന്‍റെ മനസ്സില്‍ തങ്ങിനില്ക്കുന്നത്. അത്തരം സ്ഥലങ്ങളിലൂടെ ബസ്സ്‌ കടന്നുപോകുമ്പോള്‍ പരീക്ഷയ്ക്കുവേണ്ടി വായിച്ച ഭാഗങ്ങളും തിരിച്ചുവരുമ്പോള്‍ പ്രസംഗങ്ങളില്‍ നിന്നുകിട്ടിയ വിവരങ്ങളും സമ്മാനമായി കിട്ടിയ പുസ്തകം ബസ്സിലിരുന്ന് മറിച്ചുനോക്കുമ്പോള്‍ കണ്ണില്‍ പെട്ട കാര്യങ്ങളുമൊക്കെ അവിയല്‍ രൂപത്തില്‍ സ്ഥലനാമങ്ങളുമായി കൂടിക്കുഴഞ്ഞുനിന്നു. ക്വിസ്സുകളിലും വിജ്ഞാനപ്പരീക്ഷകളിലും കൂടുതലും നടത്തിയിരുന്നത് സംസ്ഥാനതലത്തില്‍ പ്രവര്‍ത്തിക്കുന്ന സര്‍ക്കാരിതറ പ്രസ്ഥാനങ്ങളും സന്നദ്ധസംഘടനകളുമൊക്കെയായിരുന്നു. ആദര്‍ശപ്രചാരമാണ് അത്തരം ഗ്രൂപ്പുകളുടെയെല്ലാം ലക്ഷ്യം. എല്‍ എസ് എസ്, യു എസ് എസ് സ്കോളര്‍ഷിപ്പ്‌ പരീക്ഷകള്‍, നാഷണല്‍ ടാലന്റ് സര്‍ച്ച് എക്സാം തുടങ്ങി സര്‍ക്കാര്‍ ആഭിമുഖ്യത്തിലുള്ള പരീക്ഷകളില്‍ മറ്റൊന്നുമുണ്ടാവില്ല. എന്നാല്‍, യുറീക്ക വിജ്ഞാനപരീക്ഷയുടെയും ശാസ്ത്രകേരളം ക്വിസ്സിന്‍റെയുമൊക്കെ കാര്യം അങ്ങനെയല്ല. ഏതെങ്കിലും സമ്മേളനത്തോടനുബന്ധിച്ചാവും പരീക്ഷയുണ്ടാവുക. പരീക്ഷാര്‍ഥി റിസള്‍ട്ട് കാത്തിരിക്കുന്ന വേളയില്‍ സമ്മേളനത്തിലെ മുഴുവന്‍ പ്രസംഗങ്ങളും കേള്‍ക്കുന്ന വിധത്തിലായിരിക്കും പരിപാടി ആസൂത്രണം ചെയ്യുക. ഫിസിക്സ്, കെമിസ്ട്രി, ബയോളജി തുടങ്ങി പല വിഷയങ്ങളിലുള്ള പ്രസംഗങ്ങളുണ്ടാവുമെങ്കിലും എല്ലാ ഉപസംഹരിക്കുന്നത് ഒരേ തരത്തിലായിരിക്കും. പരീക്ഷയില്‍ ജയിച്ചാല്‍ സമ്മാനമായി കിട്ടുന്ന പുസ്തകങ്ങളും അതേ രീതിയിലായിരിക്കും അവസാനിക്കുക. ലോകം കീഴടക്കിയ മനുഷ്യന്‍. വിജയങ്ങളിലൂടെ മുന്നേറുന്ന മനുഷ്യന്‍. രോഗങ്ങളെല്ലാം വഴിമാറിക്കൊണ്ടിരിക്കുന്നു. ഏറെത്താമസിയാതെ മരണവും വഴിമാറും.