പെരിയ ഇരട്ടക്കൊല: ഒരാള്‍ കൂടി അറസ്റ്റില്‍

പെരിയ: (www.kasargodvartha.com 20.02.2019) കല്യോട്ട് രണ്ട് യൂത്ത് കോണ്‍ഗ്രസ് പ്രവര്‍ത്തകരെ വെട്ടിക്കൊലപ്പെടുത്തിയ കേസില്‍ കൊലയാളി സംഘത്തിലെ ഒരാള്‍ കൂടി അറസ്റ്റില്‍. കല്ല്യോട് സ്വദേശി സജി ജോര്‍ജ് ആണ് അറസ്റ്റിലായത്. ബുധനാഴ്ച രാത്രി 10 മണിയോടെയാണ് ഇയാളുടെ അറസ്റ്റ് രേഖപ്പെടുത്തിയത്. നേരത്തെ പോലീസിന്റെ കസ്റ്റഡിയിലുള്ളയാളായിരുന്നു സജി ജോര്‍ജ്. ഇയാളുടെ കാര്‍ നേരത്തെ പോലീസ് കസ്റ്റഡിയിലെടുത്തിരുന്നു.

ഇതോടെ കേസില്‍ അറസ്റ്റിലാകുന്നവരുടെ എണ്ണം രണ്ട് ആയി. കഴിഞ്ഞ ദിവസം രാത്രി സിപിഎം പെരിയ ലോക്കല്‍ കമ്മിറ്റി അംഗം എ പീതാംബരനെ അന്വേഷണ സംഘം അറസ്റ്റ് ചെയ്തിരുന്നു. കൊലപാതകവുമായി ബന്ധപ്പെട്ട് ഏതാനും പേരെ പോലീസ് കസ്റ്റഡിയിലെടുത്തിരുന്നു. ഇവരെ ചോദ്യം ചെയ്തതോടെയാണ് പീതാംബരനിലേക്ക് അന്വേഷണസംഘം എത്തിയത്.

അറസ്റ്റിലായ പീതാംബരനെ ബുധനാഴ്ച കല്യോട്ട് എത്തിച്ച് തെളിവെടുപ്പ് നടത്തിയിരുന്നു. പൊട്ടക്കിണറ്റില്‍ നിന്നും മൂന്ന് ഇരുമ്പുദണ്ഡുകളും ഒരു വടിവാളും കണ്ടെടുത്തിട്ടുണ്ട്. കൃപേഷിന്റെ തല വെട്ടിപ്പിളര്‍ത്തി കൊലപ്പെടുത്തിയത് താനാണെന്നാണ് പീതാംബരന്‍ പോലീസിന് മൊഴി നല്‍കിയത്. എന്നാല്‍ ഈ മൊഴി പോലീസ് പൂര്‍ണമായും വിശ്വാസത്തിലെടുത്തിട്ടില്ല. 15 മണിക്കൂര്‍ നീണ്ട ചോദ്യം ചെയ്യലിനൊടുവിലാണ് ചൊവ്വാഴ്ച പീതാംബരന്റെ അറസ്റ്റ് രേഖപ്പെടുത്തിയത്.

ഞായരാഴ്ച രാത്രിയാണ് പെരിയ കല്യോട്ട് യൂത്ത് കോണ്‍ഗ്രസ് പ്രവര്‍ത്തകരായ കൃപേഷ് (24), ശരത്‌ലാല്‍ (21) എന്നിവരെ ക്രൂരമായി വെട്ടിക്കൊലപ്പെടുത്തിയത്.
Updated

ഇരട്ടക്കൊലയില്‍ ഞെട്ടി കാസര്‍കോട്; തിങ്കളാഴ്ച ജില്ലയില്‍ കോണ്‍ഗ്രസ് ഹര്‍ത്താല്‍

കാസര്‍കോട് പെരിയയില്‍ സി പി എം- കോണ്‍ഗ്രസ് സംഘര്‍ഷം; കോണ്‍ഗ്രസ് പ്രവര്‍ത്തകന്‍ കൊല്ലപ്പെട്ടു, മറ്റൊരു കോണ്‍ഗ്രസ് പ്രവര്‍ത്തന്റെ നില ഗുരുതരം

യൂത്ത് കോണ്‍ഗ്രസ് പ്രവര്‍ത്തകരെ കൊലപ്പെടുത്തിയത് ബൈക്കില്‍ സഞ്ചരിക്കുന്നതിനിടെ; അക്രമികളെത്തിയത് ജീപ്പില്‍, കൊലപാതകം സി പി എം പ്രവര്‍ത്തകന്റെ വീടിനു മുന്നില്‍ വെച്ച്