അലോഷ് മോന്റെ ശസ്ത്രക്രിയ വിജയം; നടന്നത് മണിക്കൂറുകള്‍ നീണ്ട സങ്കീര്‍ണമായ ശസ്ത്രക്രിയ

കാസര്‍കോട്: (www.kasargodvartha.com 11.07.2018) അലോഷ് മോന്റെ ശസ്ത്രക്രിയ വിജയം. നടന്നത് മണിക്കൂറുകള്‍ നീണ്ട സങ്കീര്‍ണമായ ശസ്ത്രക്രിയ. ബുധനാഴ്ച രാവിലെ 7.30 മണിയോടെയാണ് ശസ്ത്രക്രിയയ്ക്കായി അലോഷിനെ മുംബൈ ഹിന്ദുജ ആശുപത്രിയിലെ ഓപ്പറേഷന്‍ തീയേറ്ററിലേക്ക് മാറ്റിയത്. എട്ടു മണിയോടെ ശസ്ത്രക്രിയ ആരംഭിച്ചു. ഉച്ചയ്ക്ക് 1.30 മണിയോടെയാണ് ശസ്ത്രക്രിയ അവസാനിച്ചത്.

ശസ്ത്രക്രിയ വിജയകരമാണെന്ന് ശസ്ത്രക്രിയയ്ക്ക് നേതൃത്വം നല്‍കിയ പ്രമുഖ ന്യൂറോളജിസ്റ്റ് ഡോ. മിശ്ര അലോഷിന്റെ മാതാപിതാക്കളായ അലക്‌സിനെയും നിമ്മിയെയും ചികിത്സ സഹായ കമ്മിറ്റി ജനറല്‍ കണ്‍വീനര്‍ മൊയ്തീന്‍ കുഞ്ഞി കളനാട്, ഷംസുദ്ദീന്‍ ബാട്ടിയ എന്നിവരെ അറിയിച്ചു. കുട്ടിക്ക് ബോധം വീണ്ടുകിട്ടിയാലുടന്‍ വാര്‍ഡിലേക്ക് മാറ്റാന്‍ കഴിയുമെന്നും ഡോ. മിശ്ര ഇവരെ അറിയിച്ചു.


നാടു മുഴുവനും പ്രാര്‍ത്ഥനയോടെ കഴിയുമ്പോഴാണ് മുംബൈയില്‍ നിന്നും ശുഭവാര്‍ത്ത ലഭിച്ചിരിക്കുന്നത്. 12 ലക്ഷം രൂപ ചിലവ് വരുന്ന ശസ്ത്രക്രിയയാണ് നാട്ടുകാരുടെയും ചികിത്സാ കമ്മിറ്റിയുടെയും സഹായത്തോടെ നടത്തിയത്. വലിയ ജനപിന്തുണയാണ് ചികിത്സാ കമ്മിറ്റിക്ക് ലഭിച്ചുകൊണ്ടിരിക്കുന്നത്. നാട്ടില്‍ നിന്നും ദുബൈയില്‍ നിന്നും നാനാജാതി മത വിഭാഗങ്ങള്‍ക്കതീതമായുള്ള സഹായമാണ് കമ്മിറ്റിക്ക് ലഭിച്ചിരിക്കുന്നത്. തുടര്‍ ചികിത്സയ്ക്കും ഭാരിച്ച തുക വേണ്ടി വരുമെന്നാണ് കരുതുന്നത്. അതുകൊണ്ടു തന്നെ കാരുണ്യ പ്രവര്‍ത്തനം തുടരുകയാണ്. അലോഷ് മോന്‍ പഴയ പോലെ തന്നെ ചിരിച്ചുകളിച്ച് കാണാന്‍ കാത്തിരിക്കുകയാണ് കളനാട്ടെയും പരിസര പ്രദേശങ്ങളിലെയും ജനങ്ങള്‍.

ഉദാരമതികളുടെ സഹായങ്ങള്‍ താഴെ കൊടുത്ത അക്കൗണ്ടിലൂടെ കൈമാറാം. കൂടുതല്‍ വിവരങ്ങള്‍ക്കായി പിതാവ് അലക്‌സിനെ ബന്ധപ്പെടാം. MOB NO: 9961358720