ജാനകി വധം; ദുരൂഹ സാഹചര്യത്തില്‍ തുറന്ന ജയില്‍ പരിസരത്തു നിന്നും കണ്ടെത്തിയ കത്തി വിദഗ്ദ്ധ പരിശോധനക്കയച്ചു; കൊലയ്ക്കുപയോഗിച്ച കത്തിയാണോയെന്ന് പരിശോധനയിലൂടെ മാത്രമേ വ്യക്തമാകൂവെന്ന് പോലീസ്

ചീമേനി: (www.kasargodvartha.com 08.01.2018) റിട്ട. പ്രധാനാധ്യാപിക ചീമേനി പുലിയന്നൂരിലെ ജാനകിയെ കൊലപ്പെടുത്തിയ കേസില്‍ പോലീസ് ഊര്‍ജിതമായി തുടരുന്നു. ജാനകിയെ കൊലപ്പെടുത്താന്‍ ഉപയോഗിച്ചതെന്ന് സംശയിക്കുന്ന കത്തി ദുരൂഹ സാഹചര്യത്തില്‍ ചീമേനി തുറന്ന ജയില്‍ പരിസരത്തു നിന്നും കണ്ടെത്തി. നാട്ടുകാര്‍ നല്‍കിയ വിവരത്തിന്റെ അടിസ്ഥാനത്തില്‍ പോലീസെത്തിയാണ് കത്തി കസ്റ്റഡിയിലെടുത്തത്. തുടര്‍ന്ന് ഈ കത്തി ഫോറന്‍സിക് പരിശോധനയ്ക്കയച്ചു. പരിശോധനാ ഫലം പുറത്തു വന്നതിനു ശേഷം മാത്രമേ കൊലയ്ക്കുപയോഗിച്ച കത്തിയാണോ എന്ന് ഉറപ്പിക്കാനാവുകയുള്ളൂവെന്ന് പോലീസ് പറഞ്ഞു.

ചീമേനി തുറന്ന ജയില്‍ സ്ഥിതി ചെയ്യുന്ന തുറവ് മുതല്‍ വെളിച്ചംതോട് വരെയുള്ള പ്രദേശം കാടുപിടിച്ചതും വിജനവുമാണ്. കൊലയ്ക്കുശേഷം സംഘം കത്തി ഉപേക്ഷിച്ച് കടന്നു കളഞ്ഞതാകാമെന്ന സംശയമാണ് പോലീസിനുള്ളത്. കഴിഞ്ഞ 13 ന് രാത്രിയാണ് സംഘം ജാനകിയെ കഴുത്തറുത്ത് കൊലപ്പെടുത്തുകയും ഭര്‍ത്താവ് കളത്തേര കൃഷ്ണനെ മാരകമായി കുത്തിപ്പരിക്കേല്‍പിക്കുകയും ചെയ്തത്. ഇതിനു ശേഷം സ്വര്‍ണാഭരണങ്ങളും പണവുമായി സംഘം കടന്നുകളയുകയായിരുന്നു.



സംഭവം നടന്ന ഒരു മാസമാകാറായിട്ടും കൊലയാളികളെ പിടികൂടാന്‍ കഴിയാത്തത് പോലീസിന് തലവേദന സൃഷ്ടിക്കുന്നുണ്ട്. അന്വേഷണ സംഘത്തിലെ മുഴുവന്‍പേരും ചീമേനിയില്‍ തന്നെ കേന്ദ്രീകരിച്ചാണ് അന്വേഷണം നടത്തുന്നത്. കൊലപാതകം നടന്ന വീട്ടിനുള്ളില്‍ നിന്ന് ഇതുവരെയായി കിട്ടിയത് കറുത്ത തുണിയുടെ ഒരു ഭാഗം മാത്രമായിരുന്നു. ശാസ്ത്രീയ പരിശോധനയില്‍ കണ്ടെത്തിയ വിരലടയാളങ്ങള്‍ ഒരാളുടേതാണെന്ന് പോലീസിന് സൂചന ലഭിച്ചിരുന്നു. സംഭവദിവസവും പിറ്റേ ദിവസങ്ങളിലും ഈ പ്രദേശത്തെ ടവറിന് കീഴില്‍ നിന്നുള്ള പതിനായിരക്കണക്കിന് ഫോണ്‍ കോളുകള്‍ പോലീസ് പരിശോധിക്കുകയും ചെയ്തിരുന്നു. എന്നാല്‍ കൊല നടന്ന ദിവസം പോലും സംശയിക്കത്ത രീതിയിലുള്ള കോളുകള്‍ കണ്ടെത്താന്‍ പോലീസിന് കഴിഞ്ഞിട്ടില്ല.

Related News: