ഖാസി സി എം അബ്ദുല്ല മൗലവിയുടെ മരണം; തുടരന്വേഷണ ആവശ്യത്തില്‍ സി ബി ഐ രണ്ടുമാസത്തിനകം തീരുമാനമെടുക്കണമെന്ന് ഹൈക്കോടതി

കൊച്ചി: (www.kasargodvartha.com 07.12.2017) ചെമ്പരിക്ക ഖാസി സി.എം. അബ്ദുല്ല മൗലവിയുടെ മരണത്തില്‍ തുടരന്വേഷണം വേണമെന്ന ആവശ്യത്തില്‍ സി.ബി.ഐയുടെ കൊച്ചി എസ്.പി രണ്ട് മാസത്തിനകം തീരുമാനമെടുത്ത് വേണ്ട നടപടികള്‍ സ്വീകരിക്കാന്‍ ഹൈക്കോടതി ഉത്തരവിട്ടു. കേസില്‍ പുനരന്വേഷണം നടത്തണമോയെന്ന് സി.ബി.ഐക്ക് തീരുമാനിക്കാമെന്നും ഇക്കാര്യത്തില്‍ കാലതാമസം ഉണ്ടാകരുതെന്നും ഉത്തരവില്‍ വ്യക്തമാക്കി.

ചെമ്പരിക്ക ഖാസിയുടെ മരണത്തില്‍ തുടരന്വേഷണം ആവശ്യപ്പെട്ട് മലപ്പുറം സ്വദേശി മുഹമ്മദ് ത്വയ്യിബ് ഹുദവി നല്‍കിയ ഹരജിയുടെ അടിസ്ഥാനത്തിലാണ് ഹൈക്കോടതി ഉത്തരവ്. 2010 ഫെബ്രുവരി 15നാണ് ഖാസിയുടെ മൃതദേഹം ചെമ്പരിക്ക കടപ്പുറത്ത് കണ്ടെത്തിയത്. ഖാസിയുടെ മരണകാരണത്തെക്കുറിച്ച് വ്യക്തമായ തെളിവുകള്‍ ലഭിച്ചിട്ടില്ലെന്ന് കാട്ടി സി.ബി.ഐ രണ്ടുതവണ കുറ്റപത്രം എറണാകുളം സി.ജെ.എം കോടതിയില്‍ സമര്‍പ്പിച്ചിരുന്നു.


ആത്മഹത്യയാണെന്നു കാണിച്ച് സി.ബി.ഐ നല്‍കിയ അനുബന്ധ കുറ്റപത്രത്തിനെതിരേ ഖാസിയുടെ മകന്‍ നല്‍കിയ ഹരജി സി.ജെ.എം കോടതിയുടെ പരിഗണനയിലാണുള്ളത്. ഇതിനിടെ കാസര്‍കോട് പരപ്പ സ്വദേശി പി.എ. അഷ്റഫ് ഖാസിയുടെ മരണത്തിനുത്തരവാദികളെ തനിക്കറിയാമെന്ന വെളിപ്പെടുത്തല്‍ നടത്തിയതോടെയാണ് പുനരന്വേഷണ ആവശ്യവും ശക്തമായത്. തനിക്കറിയാവുന്ന കാര്യങ്ങള്‍ വ്യക്തമാക്കി അശ്റഫ് സി.ബി.ഐക്ക് കത്തെഴുതുകയും ചെയ്തിരുന്നു.

2017 നവംബര്‍ രണ്ടിനും 30 നും മുഹമ്മദ് ത്വയ്യിബ് ഹുദവി ഇക്കാര്യങ്ങള്‍ വിശദീകരിച്ച് സി.ബി.ഐക്ക് കത്തെഴുതിയിരുന്നു. എന്നാല്‍ ഇവയൊന്നും അന്വേഷണസംഘം കണക്കിലെടുത്തില്ലെന്നും ഹൈക്കോടതി ഇടപെട്ടില്ലെങ്കില്‍ കേസില്‍ സത്യം തെളിയിക്കാന്‍ കഴിയില്ലെന്നും ഹരജിയില്‍ ചൂണ്ടിക്കാണിച്ചിട്ടുണ്ട്.