ജാനകി വധം; സംഭവസ്ഥലത്ത് ക്യാമ്പ് ചെയ്ത് ഐ ജി; വീടുമായി അടുത്ത ബന്ധമുള്ള ആള്‍ ഉള്‍പ്പെടെ മൂന്നുപേരെ പോലീസ് ചോദ്യം ചെയ്തു

ചെറുവത്തൂര്‍: (www.kasargodvartha.com 19.12.2017) ചീമേനി പുലിയന്നൂരിലെ റിട്ട. അധ്യാപിക പി വി ജാനകിയെ കഴുത്തറുത്ത് കൊലപ്പെടുത്തിയ കേസില്‍ അന്വേഷണം കൂടുതല്‍ വഴിത്തിരിവിലേക്ക്. കണ്ണൂര്‍ റേഞ്ച് ഐ ജി മഹിപാല്‍ യാദവ് സംഭവസ്ഥലത്ത് ക്യാമ്പ് ചെയ്താണ് അന്വേഷണത്തിന് മേല്‍നോട്ടം വഹിക്കുന്നത്. കൊല നടന്ന ദിവസം ചീമേനിയിലെത്തിയിരുന്ന ഐ ജി സ്ഥിതിഗതികള്‍ വിലയിരുത്തുകയും അന്വേഷണ ഉദ്യോഗസ്ഥര്‍ക്ക് വേണ്ട മാര്‍ഗനിര്‍ദേശങ്ങള്‍ നല്‍കി തിരിച്ചുപോവുകയും ചെയ്തിരുന്നു.

തിങ്കളാഴ്ച വൈകുന്നേരത്തോടെ ഐ ജി വീണ്ടുമെത്തി. കൊലപാതകത്തിലേക്ക് വെളിച്ചം വീശുന്ന നിര്‍ണായകമായ വിവരങ്ങള്‍ ലഭിച്ചതിന്റെ അടിസ്ഥാനത്തിലാണ് ഐ ജി സ്ഥലത്ത് ക്യാമ്പ് ചെയ്യുന്നത്. കൊലപാതകവുമായി ബന്ധമുണ്ടെന്ന സംശയത്തിന്റെ അടിസ്ഥാനത്തില്‍ മൂന്നുപേരെ പോലീസ് സ്‌റ്റേഷനിലേക്ക് വിളിച്ചുവരുത്തി ചോദ്യം ചെയ്തു. ഇവരില്‍ നിന്നും വിലപ്പെട്ട പല വിവരങ്ങളും പോലീസിന് ലഭിച്ചിട്ടുണ്ട്. കഴിഞ്ഞ ദിവസം ജാനകിയുടെ അടുത്ത ബന്ധുവിനെ രഹസ്യകേന്ദ്രത്തില്‍ മണിക്കൂറുകളോളം പോലീസ് ചോദ്യം ചെയ്തിരുന്നു. ഇതോടെ ഘാതകസംഘത്തെക്കുറിച്ചുള്ള സൂചനകള്‍ പോലീസിന് ലഭിച്ചുവെന്നാണ് കരുതുന്നത്.



ജാനകിയെ കൊലപ്പെടുത്തിയത് അന്യസംസ്ഥാനക്കാരല്ലെന്നും മലയാളികളാണെന്നുമുള്ള നിഗമനത്തിലാണ് ഇപ്പോള്‍ പോലീസ് അന്വേഷണം മുന്നോട്ടുപോകുന്നത്. കാഞ്ഞങ്ങാട് ഡി വൈ എസ് പി കെ ദാമോദരന്റെ നേതൃത്വത്തിലാണ് അന്വേഷണം നടക്കുന്നത്. ചോദ്യം ചെയ്യാന്‍ വിളിപ്പിച്ച മൂന്നുപേരും മുമ്പ് ചില കേസുകളില്‍ ഉള്‍പ്പെട്ടവരാണെന്നും ഇവരില്‍ ഒരാള്‍ക്ക് വീടുമായി അടുത്ത ബന്ധമുണ്ടെന്നും പോലീസ് അന്വേഷണത്തില്‍ വ്യക്തമായി. ചോദ്യം ചെയ്യാന്‍ പോലീസ് വിളിപ്പിച്ചവരെ കാണാന്‍ ചീമേനി പോലീസ് സ്‌റ്റേഷനില്‍ വന്‍ ജനക്കൂട്ടമാണ് തിങ്കളാഴ്ച വൈകുന്നേരം തടിച്ചുകൂടിയത്.