നാരായണന്‍ വധക്കേസില്‍ 2 പ്രതികള്‍ കൂടി റിമാന്‍ഡില്‍; നാലാം പ്രതി ഒളിവില്‍

കാഞ്ഞങ്ങാട്: (www.kasargodvartha.com 16/09/2015) സി.പി.എം. പ്രവര്‍ത്തകനായ കാലിച്ചാനടുക്കം കായക്കുന്നിലെ സി. നാരായണനെ കൊലപ്പെടുത്തിയ കേസിലെ രണ്ട് പ്രതികളെ കൂടി കോടതി റിമാന്‍ഡ് ചെയ്തു. കായക്കുന്ന് എരളാലിലെ പുഷ്പരാജന്‍ (26), കായക്കുന്നിലെ വിജയന്‍ (56) എന്നിവരെയാണ് ഹൊസ്ദുര്‍ഗ് ജുഡീഷ്യല്‍ ഒന്നാം ക്ലാസ് മജിസ്‌ട്രേറ്റ് (ഒന്ന്) കോടതി രണ്ടാഴ്ചത്തേക്ക് റിമാന്‍ഡ് ചെയ്തത്. ഇരുവരേയും ചൊവ്വാഴ്ചയാണ് ഹൊസ്ദുര്‍ഗ് സി.ഐ. യു. പ്രമേന്‍ അറസ്റ്റുചെയ്തത്.

സി.പി.എമ്മിന്റെ കൊടിമരം മോഷണംപോയതിനെചൊല്ലി തിരുവോണനാളിലുണ്ടായ വാക്കുതര്‍ക്കമാണ് കൊലപാതകത്തില്‍ കലാശിച്ചത്. നാരായണന്‍ വധവുമായി ബന്ധപ്പെട്ട് നാല് ബി.ജെ.പി. പ്രവര്‍ത്തകര്‍ക്കെതിരെയാണ് അമ്പലത്തറ പോലീസ് കൊലക്കുറ്റത്തിന് കേസെടുത്തത്. കായക്കുന്നിലെ ശ്രീനാഥും പുഷ്പരാജുമാണ് കേസിലെ മുഖ്യപ്രതികള്‍. വിജയന്റെ ബൈക്കില്‍ സ്ഥലത്തെത്തിയ ഇരുവരും നാരായണനുമായി വാക്കുതര്‍ക്കമുണ്ടാവുകയും തുടര്‍ന്ന് കൊലനടത്തുകയുമായിരുന്നു.

സംഘര്‍ഷത്തിനിടയില്‍ പുഷ്പരാജിനും കുത്തേറ്റിരുന്നു. ഇതേതുടര്‍ന്ന് പുഷ്പരാജ് മംഗളൂരു ആശുപത്രിയില്‍ ചികിത്സയിലായതിനാല്‍ അറസ്റ്റ് വൈകുകയായിരുന്നു. ശ്രീനാഥിനെ നേരത്തെ തന്നെ പോലീസ് അറസ്റ്റുചെയ്തിരുന്നു. ചൊവ്വാഴ്ച ചികിത്സ പൂര്‍ത്തിയായതോടെയാണ് പുഷ്പരാജിന്റെ അറസ്റ്റ് പോലീസ് രേഖപ്പെടുത്തിയത്. തുടര്‍ന്ന് വിജയനേയും അറസ്റ്റുചെയ്യുകയായിരുന്നു. വിജയന്‍ കേസില്‍ മൂന്നാം പ്രതിയാണ്. കായക്കുന്നിലെ ആനന്ദനാണ് നാലാംപ്രതി.

വിജയനും ആനന്ദനുമാണ് നാരായണനെ വധിക്കാന്‍ ഗൂഢാലോചന നടത്തിയതെന്നാണ് പോലീസ് അന്വേഷണത്തില്‍ തെളിഞ്ഞത്. വിജയനും ആനന്ദനും പോലീസിന് പിടികൊടുക്കാതെ ആഴ്ചകളോളം ഒളിവില്‍കഴിയുകയായിരുന്നു. വിജയന്‍ അറസ്റ്റിലായതോടെ ഇനി ആനന്ദനെ മാത്രമാണ് പിടികിട്ടാനുള്ളത്. ഒളിവില്‍കഴിയുന്ന ആനന്ദനെ പിടികൂടാന്‍ പോലീസ് തിരച്ചില്‍ ശക്തമാക്കിയിട്ടുണ്ട്.