കുഡ്‌ലു ബാങ്ക് കൊള്ള: പ്രതികളില്‍ ഒരാളെ തിരിച്ചറിഞ്ഞു; മുങ്ങിയ നീര്‍ച്ചാല്‍ സ്വദേശിയെ കണ്ടെത്താന്‍ അന്വേഷണം ഊര്‍ജിതം

By Desk DeltaSep 9, 2015, 11:57 IST

കാസര്‍കോട്: (www.kasargodvartha.com 09/09/2015) നാടിനെ ഞെട്ടിച്ച കുഡ്‌ലു സര്‍വീസ് സഹകരണ ബാങ്ക് കൊള്ളക്കേസില്‍ പ്രതികളില്‍ ഒരാളെ പോലീസ് തിരിച്ചറിഞ്ഞു. നീര്‍ച്ചാല്‍ സ്വദേശിയായ യുവാവാണ് കവര്‍ച്ചാസംഘത്തിലുണ്ടായിരുന്നവരില്‍ ഒരാളെന്നാണ് പോലീസിന് വിവരം കിട്ടിയത്. കവര്‍ച്ചനടന്ന കുഡ്‌ലു സര്‍വീസ് സഹകരണ ബാങ്കിന് സമീപം ജോലിചെയ്തുകൊണ്ടിരുന്ന തൊഴിലാളിയാണ് പ്രതിയെ കണ്ടതായി പോലീസിന് വിവരം നല്‍കിയത്.

ഇതുകൂടാതെ തൊട്ടടുത്തുള്ള ഒരു സ്ഥാപനത്തിലെ സെക്യൂരിറ്റി ജീവനക്കാരനും ഇതേപ്രതി ഓടിപ്പോകുന്നത് കണ്ടതായി അറിയിച്ചിട്ടുണ്ട്. പ്രതിയെ നേരിട്ടുകണ്ട ആള്‍ക്ക് പോലീസിന്റെ കൈവശമുള്ള കവര്‍ച്ചാ-ക്രിമിനല്‍ കേസുകളിലെ പ്രതികളുടെ നൂറുകണക്കിന് ഫോട്ടോകള്‍ കാണിച്ചപ്പോഴാണ് അതില്‍നിന്നും നീര്‍ച്ചാല്‍ സ്വദേശിയായ യുവാവിനെ തിരിച്ചറിഞ്ഞത്. നിരവധി കവര്‍ച്ചാകേസില്‍ പ്രതിയായ ഇയാള്‍ കവര്‍ച്ച നടക്കുന്നതിന് മൂന്ന് ദിവസംമുമ്പ് തന്നെ നാട്ടില്‍നിന്നും അപ്രത്യക്ഷനായതായി പോലീസ് അന്വേഷണത്തില്‍ കണ്ടെത്തിയിട്ടുണ്ട്.

നീര്‍ച്ചാല്‍ സ്വദേശിയുടെ കൂട്ടാളികളായ മറ്റുരണ്ടുപേരെകുറിച്ചും പോലീസിന് ചിലവിവരങ്ങള്‍ കിട്ടിയതായാണ് അറിയുന്നത്. ഇവര്‍ കര്‍ണാടകയിലേക്ക് കടന്നുകളഞ്ഞതായുള്ള സംശയവും പോലീസിനുണ്ട്. കവര്‍ച്ചാസ്വര്‍ണം ജില്ലയില്‍നിന്നും കടത്തുന്നത് തടയാനുള്ള ശ്രമങ്ങള്‍ പോലീസ് അതിര്‍ത്തികേന്ദ്രീകരിച്ച് തുടരുന്നുണ്ട്. പ്രതികള്‍ എത്രയുംപെട്ടന്ന് പിടിയിലാകുമെന്ന ആത്മവിശ്വാസത്തിലാണ് അന്വേഷണ സംഘം. പ്രത്യേക അന്വേഷണ സംഘത്തെ പല സംഘങ്ങളാക്കി കര്‍ണാടകയുടെ വിവിധ പ്രദേശങ്ങളില്‍ അയച്ചിട്ടുണ്ട്. പ്രതികള്‍ക്ക് സഹായംകിട്ടാനുള്ള കേന്ദ്രങ്ങളെകുറിച്ചും മറ്റും കര്‍ണാടക പോലീസുമായി കാസര്‍കോട് ജില്ലാ പോലീസ് ചീഫ് ചര്‍ച്ചനടത്തിയിട്ടുണ്ട്. കര്‍ണാടക പോലീസ് എല്ലാ സഹായവും വാഗ്ദാനം ചെയ്തിട്ടുണ്ടെന്നാണ് അറിയുന്നത്.

കവര്‍ച്ചനടന്ന ബാങ്കില്‍നിന്നും അഞ്ച് പ്രതികളും പുറത്തുകടന്നപ്പോള്‍ നാലുപേര്‍ രണ്ട് ബൈക്കുകളിലായി പോവുകയും ഒരാള്‍ ഓടിപ്പോവുകയുമാണ് ചെയ്തിരുന്നത്. ഓടിപ്പോയവരില്‍ ഒരാളാണ് നീര്‍ച്ചാല്‍ സ്വദേശിയെന്ന് പോലീസ് സ്ഥിരീകരിച്ചിട്ടുണ്ട്. പിന്നീട് ഇയാളെയും സംഘം അല്‍പ്പദൂരം എത്തിയപ്പോൾ ബൈക്കില്‍കയറ്റി കടന്നുകളയുകയായിരുന്നു. എരിയാലിലും മറ്റുമുള്ള സി.സി.ടി.വി. ക്യാമറകളില്‍ മോഷ്ടാക്കളുടെ ചിത്രം പതിഞ്ഞിട്ടുണ്ടോയെന്നകാര്യവും പോലീസ് അന്വേഷിക്കുന്നുണ്ട്. ചില സി.സി.ടി.വി. ക്യാമറകള്‍ കേടായികിടക്കുന്നതിനാല്‍ ഈനിലയ്ക്കുള്ള അന്വേഷണം എത്രത്തോളം ഫലംചെയ്യുമെന്ന് വ്യക്തമല്ല.