കുഡ്‌ലു ബാങ്ക് കവര്‍ച്ച: ഇടപാടുകാരും നാട്ടുകാരും ദേശീയപാത ഉപരോധിച്ചു

കാസര്‍കോട്: (www.kasargodvartha.com 08/09/2015) കുഡ്‌ലു സര്‍വീസ് സഹകരണ ബാങ്കില്‍ നിന്നും 21 കിലോ സ്വര്‍ണവും 13 ലക്ഷം രൂപയും കൊള്ളയടിച്ച സംഭവത്തില്‍ ഇടപാടുകാരും നാട്ടുകാരും ചേര്‍ന്ന് ദേശീയ പാത ഉപരോധിച്ചു. നഷ്ടപ്പെട്ട സ്വര്‍ണത്തിന് അധികൃതര്‍ ഒരു തീരുമാനമുണ്ടാക്കണമെന്നാവശ്യപ്പെട്ടായിരുന്നു പ്രതിഷേധം.

ഒടുവില്‍ 10 ദിവസത്തിനുള്ളില്‍ പരിഹാരം കാണാമെന്ന ബാങ്ക് അധികൃതരുടെ ഉറപ്പിന്‍മേലാണ് പ്രതിഷേധക്കാര്‍ പിരിഞ്ഞുപോയത്. വൈകിട്ട് അഞ്ച് മണിയോടെയാണ് എരിയാലില്‍ നൂറോളം പേര്‍ ചേര്‍ന്ന് റോഡ് ഉപരോധിച്ചത്. റോഡില്‍ കുത്തിയിരുന്ന സമരക്കാര്‍ തങ്ങളുടെ ആവശ്യങ്ങള്‍ക്ക് ഉടന്‍ പരിഹാരം കാണണമെന്ന് ആവശ്യപ്പെട്ടു. ഇതിനിടയില്‍ ഒരുസംഘം ദേശീയ പാതയില്‍ വാഹനങ്ങള്‍ തടഞ്ഞു. ഇതോടെ ദേശീയ പാതയില്‍ ഗതാഗതം സ്തംഭിച്ചു. പോലീസെത്തി സമരക്കാരെ നീക്കാന്‍ ശ്രമിച്ചെങ്കിലും ഫലമുണ്ടായില്ല.

ഒടുവില്‍ ടൗണ്‍ സി.ഐ പി.കെ സുധാകരന്‍ സമരക്കാരുമായി നടത്തിയ ചര്‍ച്ചയില്‍  പ്രതിഷേധം അവസാനിപ്പിക്കുകയായിരുന്നു. തുടര്‍ന്ന് ബാങ്ക് അധികൃതരുമായി സി.ഐ നടത്തിയ ചര്‍ച്ചയിലാണ് 10 ദിവസത്തിനുള്ളില്‍ പരിഹാരമുണ്ടാക്കുമെന്ന് ഉറപ്പു നല്‍കിയത്. അതേസമയം വാക്ക് പാലിച്ചില്ലെങ്കില്‍ ആക്ഷന്‍ കമ്മിറ്റി രൂപീകരിച്ച് ശക്തമായ സമര പരിപാടികള്‍ നടത്താനാണ് ഇടപാടുകാരുടെയും നാട്ടുകാരുടെയും തീരുമാനം.