മുരളി വധം: അറസ്റ്റിലായ 4 പ്രതികള്‍ വീണ്ടും പോലീസ് കസ്റ്റഡിയില്‍

കുമ്പള: (www.kasargodvartha.com 08.11.2014) സി.പി.എം. പ്രവര്‍ത്തകന്‍ കുമ്പള ശാന്തിപ്പള്ളത്തെ മുരളിയെ കൊലപ്പെടുത്തിയ കേസില്‍ പോലീസ് അറസ്റ്റു ചെയ്ത് റിമാന്‍ഡില്‍ കഴിയുകയായിരുന്ന നാലു പ്രതികളെ കൂടുതല്‍ ചോദ്യം ചെയ്യാനായി പോലീസ് വീണ്ടും കസ്റ്റഡിയില്‍ വാങ്ങി.

ബി.ജെ. പി. പ്രവര്‍ത്തകരായ കുമ്പള അനന്തപുരത്തെ ശരത് രാജ് (23), സീതാംഗോളി കുതിരപ്പാടിയിലെ ദിനേശ് ആചാര്യ(21), കെ. ഭരത് രാജ് (24), ബേള ധര്‍ബത്തടുക്കയിലെ സി.എച്ച്. മിഥുന്‍ കുമാര്‍(20) എന്നിവരെയാണ് വിശദമായ ചോദ്യം ചെയ്യലിനായി മൂന്നു ദിവസത്തേക്ക് കസ്റ്റഡിയില്‍ വാങ്ങിയതെന്ന് കുമ്പള സി.ഐ. സുരേഷ് ബാബു പറഞ്ഞു.

കൊലപാതകത്തില്‍ ഗൂഢാലോചന നടന്നിട്ടുണ്ടോ എന്നു തെളിയിക്കുന്നതിനാണ് പ്രതികളെ വീണ്ടും കസ്റ്റഡിയില്‍ വാങ്ങി ചോദ്യം ചെയ്യുന്നതെന്ന് പോലീസ് പറഞ്ഞു. ഒക്ടോബര്‍ 27ന് വൈകിട്ടാണ് മുരളി കൊല്ലപ്പെട്ടത്. സുഹൃത്ത് മഞ്ചുനാഥിനൊപ്പം ബൈക്കില്‍ സഞ്ചരിക്കുമ്പോള്‍ സൂരംബയലില്‍ വെച്ചാണ് രണ്ടു ബൈക്കുകളിലായെത്തിയ പ്രതികള്‍ മുരളിയെ തടഞ്ഞു നിര്‍ത്തി കുത്തിക്കൊലപ്പെടുത്തിയത്.

പ്രതികളെ രക്ഷപ്പെടാന്‍ സഹായിച്ചതിനു കാളിയങ്ങാട്ടെ നിധിന്‍, കുതിരപ്പാടിയിലെ കിരണ്‍ കുമാര്‍ എന്നിവര്‍ക്കെതിരെ പോലീസ് കേസെടുത്തിട്ടുണ്ടെങ്കിലും അറസ്റ്റു ചെയ്യാന്‍ കഴിഞ്ഞിട്ടില്ല.
മുരളിയുടെ കൊലയില്‍ ആഹ്ലാദം പ്രകടിപ്പിച്ചു അന്നു തന്നെ ഫേസ് ബുക്കില്‍ പോസ്റ്റിട്ടതിനു കട്ടത്തടുക്കയിലെ അരുണ്‍ കുമാറിനെതിരെ ഐ.ടി. ആക്ട് പ്രകാരവും പോലീസ് കേസെടുത്തിട്ടുണ്ട്. ഇയാളെയും അറസ്റ്റു ചെയ്യാന്‍ കഴിഞ്ഞിട്ടില്ല.