ദേശീയ പാതയില്‍ വാഹനങ്ങള്‍ കൂട്ടിയിടിച്ചു; 2 പേര്‍ക്ക് പരിക്ക്
Oct 9, 2014, 01:46 IST
കാസര്‍കോട്: (www.kasargodvartha.com 09.10.2014) ദേശീയ പാതയില്‍ മൂന്ന് വാഹനങ്ങള്‍ കൂട്ടയിടിച്ചു. തലനാരിഴയ്ക്കാണ് വന്‍ അപകടം ഒഴിവായത്. ബുധനാഴ്ച രാത്രി 12 മണിയോടെ അശ്വിനി നഗറില്‍ ഗോള്‍ഡ് പാലസിന് മുന്‍വശത്തായിരുന്നു അപകടം. മംഗലാപുരം ഭാഗത്തേക്ക് പോവുകയായിരുന്ന കാര്‍ പെടുന്നനെ ബ്രേക്കിട്ടപ്പോള്‍ പിറകിലുണ്ടായിരുന്ന എം.എച്ച് 20 സിടി 4202 നമ്പര്‍ ട്രക്ക് എതിര്‍ദിശയിലേക്ക് വെട്ടിച്ചതാണ് അപകടത്തിന് വഴിവെച്ചത്.
ട്രക്കിലേക്ക് ഇടിക്കാതിരിക്കാനായി എതിര്‍ ദിശയില്‍ നിന്നും വരികയായിരുന്ന കെഎ 31 3427 നമ്പര്‍ മീന്‍ വണ്ടി സൈഡിലേക്ക് വെട്ടിച്ചു. നിയന്ത്രണം വിട്ട ലോറി സമീപത്തെ കുഴിയിലേക്ക് മറിഞ്ഞ് മരത്തിലിടിച്ചാണ് നിന്നത്. അപകടത്തില്‍ മീന്‍ വണ്ടിയുടെ ഡ്രൈവര്‍ ഉള്ളാള്‍ സ്വദേശി അന്‍സാര്‍ (34) എന്നയാള്‍ക്ക് പരിക്കേറ്റു. ട്രക്കിന്റെ പിന്‍ഭാഗം കാഞ്ഞങ്ങാട് ഭാഗത്തേക്ക് പോവുകയായിരുന്ന കെഎല്‍ 60 എഫ് 6788 നമ്പര്‍ ഓമ്‌നി വാനിലിടിച്ചു. സമീപത്തെ ഇലക്ട്രിക്ക് പോസ്റ്റിലിടിച്ചാണ് ട്രക്ക് നിന്നത്.
വാനിന്റെ മുന്‍വശത്തെ ഗ്ലാസ് അപകടത്തില്‍ തകര്‍ന്നു. വാനിലുണ്ടായിരുന്ന കാഞ്ഞങ്ങാട് സ്വദേശി റോണി (22) ക്ക് പരിക്കേറ്റു. അപകടത്തില്‍ വൈദ്യുതി പോസ്റ്റ് തകര്‍ന്നു. ഇതേതുടര്‍ന്ന് നഗരത്തില്‍ വൈദ്യുതി ബന്ധം തടസപ്പെട്ടു.
Keywords : Accident, Kasaragod, Kerala, Injured, Lorry, Ashwini Nagar, 3 Vehicles, Car, Truck.
Tags
Share this story
