കാസര്‍കോട്ട് ഓട്ടോയും കാറും കൂട്ടിമുട്ടി 9 പേര്‍ക്ക് പരിക്ക്

കാസര്‍കോട്: (www.kasargodvartha.com 04.05.2014) കാസര്‍കോട് - മംഗലാപുരം ദേശീയ പാതയില്‍ കറന്തക്കാട് അശ്വിനി നഗറില്‍ കാറും ഓട്ടോ റിക്ഷയും കൂട്ടിമുട്ടി ഇരു വാഹനങ്ങളിലെയും യാത്രക്കാരായ ഒമ്പത് പേര്‍ക്ക് പരിക്കേറ്റു. ഞായറാഴ്ച വൈകുന്നേരം 3.40 മണിയോടെയാണ് അപകടമുണ്ടായത്.

കൂത്തുപറമ്പില്‍ നിന്ന് മംഗലാപുരത്തേക്ക് പോവുകയായിരുന്ന മാരുതി എ സ്റ്റാര്‍ കെ.എല്‍ 58 സി 629 നമ്പര്‍ കാറും എരിയാലില്‍ നിന്ന് കാസര്‍കോട്ടേക്ക് വരികയായിരുന്ന കെ.എല്‍ 14 എല്‍ 1917 നമ്പര്‍ ഓട്ടോയുമാണ് കൂട്ടിമുട്ടിയത്. കൊല്‍ക്കത്ത സ്വദേശി അലിയുടെ ഭാര്യ ആബിദാജി (22), മകള്‍ അല്‍സിയ (രണ്ട്), കൂത്തുപറമ്പ് സ്വദേശി ബെന്നിയുടെ മകന്‍ അരുണ്‍ (27), അരുണിന്റെ ഭാര്യ നിദ (26), വര്‍ഗീസിന്റെ ഭാര്യ ആനി (48), ഇവരുടെ മക്കളായ ബെഞ്ചമിന്‍ (രണ്ട്), ജോവാന്‍ (എട്ട്), എരിയാലിലെ അഷ്‌റഫിന്റെ മകന്‍ സൈനുദ്ദീന്‍ (10), ഓട്ടോ ഡ്രൈവര്‍ ചേരങ്കൈ കടപ്പുറത്തെ മൂസയുടെ മകന്‍ നിസാര്‍ (33) എന്നിവര്‍ക്കാണ് പരിക്കേറ്റത്.

ഇവരില്‍ ഗുരുതരമായി പരിക്കേറ്റ രണ്ട് പേരെ മംഗലാപുരത്തെ ആശുപത്രിയിലേക്ക് മാറ്റി. മറ്റുള്ളവരെ കാസര്‍കോട്ടെ സ്വകാര്യ ആശുപത്രിയില്‍ പ്രവേശിപ്പിച്ചു. ഇരുവാഹനങ്ങള്‍ക്കും അപകടത്തില്‍ കേടുപറ്റി. നാട്ടുകാരാണ് പരിക്കേറ്റവരെ ആശുപത്രിയില്‍ പ്രവേശിപ്പിച്ചത്.