ഉള്ളാള്‍ തങ്ങള്‍: അസ്തമിച്ചത് പണ്ഡിത തേജസ്

കാസര്‍കോട്: ഉള്ളാള്‍ തങ്ങളുടെ വിയോഗത്തോടെ അസ്തമിച്ചത് മത-  വിജ്ഞാനരംഗത്തെ പണ്ഡിത സൂര്യനെയാണ്. ഇസ്ലാമിക കാര്യങ്ങളില്‍ അറിവിന്റെ മഹാഗോപുരമായിരുന്നു തങ്ങള്‍. സരസവും ലളിതവുമായ ഭാഷയില്‍ അദ്ദേഹം ഇസ്ലാമിക കാര്യങ്ങള്‍ വ്യാഖ്യാനിക്കുന്നത് കേള്‍വിക്കാരില്‍ പ്രത്യേക താല്‍പര്യം ജനിപ്പിച്ചിരുന്നു.

സമസ്തയുടെ പക്ഷത്ത് നിലയുറപ്പിച്ച ഉള്ളാള്‍ തങ്ങള്‍ പതിറ്റാണ്ടുകളായി അതിന്റെ നേതൃസ്ഥാനം അലങ്കരിച്ചുവരികയായിരുന്നു. താജുല്‍ ഉലമ എന്ന പേരിനെ അന്വര്‍ത്ഥമാക്കുന്ന വാക്കും പ്രവര്‍ത്തിയും കൊണ്ട് ഏവരുടേയും ആദരവ് പിടിച്ചുപറ്റാന്‍ അദ്ദേഹത്തിനു കഴിഞ്ഞു. കേരളത്തില്‍ മാത്രമല്ല, ഇന്ത്യ ഒട്ടാകെയും ഗള്‍ഫു രാജ്യങ്ങളിലും പ്രശസ്തനാണ് ഈ പണ്ഡിത വര്യന്‍. ആയിരക്കണക്കിന് ശിഷ്യന്‍മാരുള്ള ഉള്ളാള്‍ തങ്ങളുടെ വാക്കുകള്‍ക്ക് കാതോര്‍ക്കാനും അദ്ദേഹത്തിന്റെ അനുഗ്രഹം വാങ്ങാനും നിരവധി പേര്‍ എത്തുമായിരുന്നു.

ഉള്ളാള്‍ തങ്ങളുടെ  വിയോഗ വാര്‍ത്ത ഉള്‍ക്കൊള്ളാന്‍ പലര്‍ക്കും കഴിയാത്ത സ്ഥിതിയാണ്. പ്രയാധിക്യത്തെ തുടര്‍ന്ന് അടുത്ത കാലത്തായി വിശ്രമ ജീവിതം നയിച്ചുവരുന്ന അദ്ദേഹത്തിന്റെ അന്ത്യം ശനിയാഴ്ച വൈകിട്ട് പയ്യന്നൂര്‍ എട്ടിക്കുളത്തെ വീട്ടില്‍ വെച്ചായിരുന്നു. ശതാഭിഷേകത്തിന് അഞ്ചുവര്‍ഷം മാത്രം ബാക്കിനില്‍ക്കെയാണ് സാര്‍ത്ഥകമായ ആ ജീവിതത്തിന് തിരശ്ശീല വീണത്.

സമ്മേളന വേദികളിലും മതപ്രഭാഷണ പരിപാടികളിലും ഇസ്ലാമിന്റെ തത്വങ്ങളും സരണികളും വ്യാഖ്യാനിച്ചും താന്‍ പ്രതിനിധാനം ചെയ്യുന്ന സമസ്ത കേരള ജം ഇയ്യത്തുല്‍ ഉലമയുടെ നിലപാടുകള്‍ വിശദീകരിച്ചും അദ്ദേഹം നടത്തുന്ന പ്രസംഗങ്ങള്‍ ആയിരങ്ങളെ ആകര്‍ഷിച്ചിരുന്നു. ഇന്ത്യയില്‍ തന്നെ ഇസ്ലാമിക വിഷയങ്ങളില്‍ ഇത്രത്തോളം പ്രാഗത്ഭ്യമുള്ള പണ്ഡിതന്‍മാര്‍ ചുരുക്കമായിരിക്കും.

കാന്തപുരം എ.പി.അബൂബക്കര്‍ മുസ്ലിയാര്‍, എം.എ.അബ്ദുല്‍ ഖാദര്‍ മുസ്ലിയാര്‍ എന്നിവർക്കൊപ്പം
ചേര്‍ന്ന് സംഘടനയുടെ കീഴില്‍ മത- ഭൗതീക -വിദ്യാഭ്യാസ സ്ഥാപനങ്ങളും പള്ളികളും ആരംഭിക്കുന്നതിനും അവ വളര്‍ത്തിക്കൊണ്ടുവരുന്നതിനും നിര്‍ണായകമായ പങ്കാണ് അദ്ദേഹം വഹിച്ചിരുന്നത്. അദ്ദേഹം വിടവാങ്ങുമ്പോള്‍ ഒരു കാലഘട്ടത്തിന്റെ തന്നെ സേവന ചരിത്രമാണ് ഓര്‍മയാവുന്നത്.

ഞങ്ങളുടെ Facebookലും Twitterലും അംഗമാകൂ. ഓരോ വാര്‍ത്തയും കാസര്‍കോട് വാര്‍ത്തയിലൂടെ അറിയാം.

Also read: 

താജുല്‍ ഉലമ ഉള്ളാള്‍ തങ്ങള്‍ അന്തരിച്ചു