കാസര്‍കോട്ട് തെരഞ്ഞെടുപ്പ് ചിത്രം തെളിയുന്നു; കെ. സുരേന്ദ്രന്‍ ബി.ജെ.പി. സ്ഥാനാര്‍ത്ഥി

കാസര്‍കോട്: ലോകസഭാ തെരഞ്ഞെടുപ്പിന്റെ തീയ്യതി പ്രഖ്യാപിച്ചിട്ടില്ലെങ്കിലും കാസര്‍കോട്ട് തിരഞ്ഞെടുപ്പിനെ നേരിടാന്‍ രാഷ്ട്രീയ കക്ഷികള്‍ ഒരുക്കം തുടങ്ങി. പാര്‍ട്ടി കണ്‍വെന്‍ഷനുകളും യോഗങ്ങളും വിളിച്ചുചേര്‍ത്ത് സ്ഥാനാര്‍ത്ഥികളെ കുറിച്ചും വോട്ടുകള്‍ വാരിക്കൂട്ടാനുള്ള തന്ത്രങ്ങളെ കുറിച്ചും ഗൗരവമായ ചര്‍ച്ചകള്‍ ജില്ലയിലെമ്പാടും ഊര്‍ജിതമായി നടന്നുവരികയാണ്.

സ്ഥാനാര്‍ത്ഥിയെ പ്രഖ്യാപിച്ച് ബി.ജെ.പി. ഒരുമുഴം മുമ്പേതന്നെ ഗോദയില്‍ ഇറങ്ങിക്കഴിഞ്ഞു. ബി.ജെ.പി. സംസ്ഥാന സെക്രട്ടറി കെ. സുരേന്ദ്രനായിരിക്കും കാസര്‍കോട് മണ്ഡലത്തിലെ ബി.ജെ.പി. സ്ഥാനാര്‍ത്ഥി. വെള്ളിയാഴ്ച കാസര്‍കോട്ട് നടന്ന ബി.ജെ.പി. ലോക്‌സഭാ മണ്ഡലം സമ്മേളനത്തില്‍ പാര്‍ട്ടി മുന്‍ ദേശീയ അധ്യക്ഷന്‍ വെങ്കയ്യ നായിഡുവമാണ് സുരേന്ദ്രന്റെ സ്ഥാനാര്‍ത്ഥിത്വം പ്രഖ്യാപിച്ചത്.

2009ല്‍ കാസര്‍കോട്ട് നിന്ന് ലോക്‌സഭയിലേക്കും 2011ല്‍ മഞ്ചേശ്വരം മണ്ഡലത്തില്‍ നിന്ന് നിയമ സഭയിലേക്കും സുരേന്ദ്രന്‍ മത്സരിച്ചിരുന്നുവെങ്കിലും ജയിക്കാനായില്ല. അതിന്റെ അനുഭവ കരുത്തുമായാണ് ഇക്കൂറി നേരത്തെ തന്നെ സ്ഥാനാര്‍ത്ഥിത്വം പ്രഖ്യാപിച്ച് തെരഞ്ഞെടുപ്പ് രംഗത്ത് ഇറങ്ങിയിരിക്കുന്നത്. നേരത്തെ തന്നെ കാസര്‍കോട്ട് ബി.ജ.പി. സ്ഥാനാര്‍ത്ഥി സുരേന്ദ്രനായിരിക്കുമെന്ന് ഏതാണ്ട് ഉറപ്പുണ്ടായിരുന്നു.

സംസ്ഥാന പ്രസിഡന്റ് വി. മുരളീധരനടക്കമുള്ള നേതാക്കള്‍ പങ്കെടുത്ത ചടങ്ങിലാണ് സുരേന്ദ്രന്റെ സ്ഥാനാര്‍ത്ഥിത്വം വെങ്കയ്യനായിഡു പ്രഖ്യാപിച്ചത്. കോഴിക്കോട് ഉള്ള്യേരി സ്വദേശിയായ സുരേന്ദ്രന്‍ 1991ല്‍ സി.കെ. പത്മനാഭന്റെ തെരഞ്ഞെടുപ്പ് ചുമതല ഏറ്റെടുത്താണ് കാസര്‍കോട്ട് പ്രവര്‍ത്തനം ആരംഭിക്കുന്നത്.

ഇടതുമുന്നണി സ്ഥാനാര്‍ത്ഥിയായി നിലവിലെ എം.പി. പി. കരുണാകരന്‍ തന്നെ മത്സരിക്കാനാണ് സാധ്യത.  യു.ഡി.എഫ്. സ്ഥാനാര്‍ത്ഥിയായി മുന്‍ എം.പി. പരേതനായ ഐ. രാമറൈയുടെ മകന്‍ അഡ്വ. എ. സുബ്ബയ്യ റൈയുടെ പേരും ഉയര്‍ന്നുകേള്‍ക്കുന്നു. എല്‍.ഡി.എഫിലും, യു.ഡി.എഫിലും സ്ഥാനാര്‍ത്ഥികളെ സംബന്ധിച്ചുള്ള അനിശ്ചിതത്വം നിലനില്‍ക്കുമ്പോഴും ബി.ജെ.പിയുടെ കാലേക്കൂട്ടിയുള്ള സ്ഥാനാര്‍ത്ഥി പ്രഖ്യാപനവും പ്രവര്‍ത്തനങ്ങളും രാഷ്ട്രീയ കേന്ദ്രങ്ങള്‍ ഗൗരവത്തോടെ നിരീക്ഷിക്കുകയാണ്. ആം ആദ്മി ഉള്‍പെടെയുള്ള പാര്‍ട്ടികളും കാസര്‍കോട്ട് മത്സര രംഗത്തുണ്ടാകുമെന്ന് സൂചനയുണ്ട്.
ഞങ്ങളുടെ Facebookലും Twitterലും അംഗമാകൂ. ഓരോ വാര്‍ത്തയും കാസര്‍കോട് വാര്‍ത്തയിലൂടെ അറിയാം.