മക്കളുടെ അസുഖവും ദാരിദ്ര്യവും: കനിവു കാത്ത് ആമിന

കാസര്‍കോട്: കടുത്ത ദാരിദ്ര്യവും മക്കളുടെ അസുഖവും മൂലം തകര്‍ന്ന ഹൃദയവുമായി ആശുപത്രിയിലിരുന്ന് സഹായത്തിന് കേഴുകയാണ് ആമിന. ചെര്‍ക്കള ബേര്‍ക്കയില്‍ വാടക ക്വാര്‍ട്ടേഴ്‌സില്‍ താമസിക്കുന്ന 29 കാരിയായ ആമിന കാസര്‍കോട് ജനറല്‍ ആശുപത്രിയിലിരുന്ന് കണ്ണീര്‍ വാര്‍ക്കുകയാണ്.

തന്നെ ദാരിദ്ര്യം തന്ന് പരിക്ഷിച്ചോളൂ, എന്നാലും മക്കള്‍ക്ക് ഒരു അസുഖവും വരുത്തല്ലേ റബ്ബേ... എന്നാണ് ആമിനയുടെ പ്രാര്‍ത്ഥന. വീട്ടില്‍ നിന്ന് വീണ് പരിക്കേറ്റ ഒന്‍പതു മാസം പ്രായമുള്ള മുഹമ്മദ് ആബിദ്, പനി ബാധിച്ച നാലുവയസുകാരന്‍ മുഹമ്മദ് ഷാഹിദ് എന്നിവര്‍ക്കൊപ്പം ആശുപത്രിയില്‍ കഴിയുകയാണ് ആമിന. ഒന്‍പതുവയസുകാരനായ മറ്റൊരു മകനും മാതാവിനോടൊപ്പം ആശുപത്രിയില്‍ കഴിയുകയാണ്. ആമിനയും രോഗിയാണ്.


എന്നാല്‍ തന്റെ അസുഖമോ ദാരിദ്ര്യമോ ആമിനയ്ക്ക് പ്രശ്‌നമല്ല. കുട്ടികള്‍ സുഖം പ്രാപിച്ചാല്‍ മതി എന്നാണ് അവര്‍ കരഞ്ഞു പ്രാര്‍ത്ഥിക്കുന്നത്.വീട്ടിലുണ്ടായിരുന്ന സ്റ്റൗ വിറ്റുകിട്ടിയ പണവുമായാണ് ആമിന മക്കളേയും കൂട്ടി ആശുപത്രിയിലെത്തിയത്. സുള്ള്യ സ്വദേശിനിയായ ആമിനയെ മൈസൂര്‍ സ്വദേശി സാദിഖ് 10 വര്‍ഷം മുമ്പാണ് വിവാഹം കഴിച്ചത്. ഒരു വര്‍ഷം മുമ്പ് ഉപേക്ഷിച്ചുപോയ ഭര്‍ത്താവ് പിന്നീട് തിരിഞ്ഞു നോക്കിയിട്ടില്ല.

അയല്‍വീടുകളില്‍ ജോലി ചെയ്തും ചൂലുണ്ടാക്കി വിറ്റുമാണ് ആമിന നിത്യവൃത്തി കഴിക്കുന്നത്. താമസിക്കുന്ന റൂമിന് 1,000 രൂപയാണ് വാടക. മൂന്നു മാസമായി വാടക കൊടുത്തിട്ടില്ല. മുട്ടിന് അസഹ്യമായ വേദനമൂലം ഇപ്പോള്‍ ജോലിക്ക് പോകാന്‍ കഴിയുന്നില്ല. നടക്കാനും പ്രയാസമാണ്. അതിനിടയിലാണ് മക്കള്‍ ആശുപത്രിയിലായത്. ആമിനയുടെ ദയനീയ സ്ഥിതിയില്‍ മനംനൊന്ത് വാര്‍ഡുകളിലെ മറ്റ് രോഗികളും അവരുടെ സന്ദര്‍ശകരുമാണ് ഭക്ഷണവും മറ്റും നല്‍കുന്നത്. ഒന്‍പത് വയസ്സായെങ്കിലും മൂത്ത മകനെ സ്‌കൂളിലയച്ചിട്ടില്ല. ആമിനയെ സഹായിക്കാന്‍ തയ്യാറുള്ളവര്‍ 9567301578 എന്ന ഫോണ്‍നമ്പറില്‍ ബന്ധപ്പെട്ട് സഹായങ്ങള്‍ നല്‍കാവുന്നതാണ്.

ഞങ്ങളുടെ Facebookലും Twitterലും അംഗമാകൂ. ഓരോ വാര്‍ത്തയും കാസര്‍കോട് വാര്‍ത്തയിലൂടെ അറിയാം.