പോലീസിനെ ഭയന്നോടി കിണറ്റില്‍ വീണ യുവാക്കളില്‍ ഒരാള്‍ മരിച്ചു; നാട്ടുകാര്‍ സ്‌റ്റേഷന്‍ ഉപരോധിച്ചു

നീലേശ്വരം: പോലീസിനെ ഭയന്നോടി കിണറ്റില്‍ വീണ യുവാക്കളില്‍ ഒരാള്‍ മരിച്ചു. സംഭവത്തില്‍ പ്രകോപിതരായ നാട്ടുകാര്‍ നീലേശ്വരം പോലീസ് സ്‌റ്റേഷനും ദേശീയ പാതയും ഉപരോധിച്ചു. ഗള്‍ഫുകാരന്‍ നീലേശ്വരം ചിറപ്പുറത്തെ കെ.വി. ശശീന്ദ്രന്‍(28) ആണു മരിച്ചത്.

കിണറ്റില്‍ വീണ ശശിധരന്റെ സുഹൃത്തുക്കളായ  സ്വകാര്യ ബസ് ഡ്രൈവര്‍ ഗണേശന്‍(30), സജിത്ത്(29) എന്നിവര്‍ക്കു പരിക്കേറ്റു. ഗുരുതരമായി പരിക്കേറ്റ ഗണേശനെ മംഗാലപുരത്തെ ആശുപത്രിയില്‍ പ്രവേശിപ്പിച്ചു.

വ്യാഴാഴ്ച രാത്രി എട്ട് മണിയോടെയാണ് സംഭവം. അതേസമയം നീലേശ്വരം എസ്‌ഐ മൈക്കിളിന്റെ നേതൃത്വത്തില്‍ റോഡരികില്‍ കൂടിനിന്നവരെ ഒരു പ്രകോപനവുമില്ലാതെ ഓടിക്കുകയായിരുന്നുവെന്നാണു നാട്ടുകാരുടെ ആരോപണം.

പ്രകോപിതരായ നാട്ടുകാര്‍ നീലേശ്വരം പോലീസ് സ്‌റ്റേഷനും ദേശീയ പാതയും ഉപരോധിക്കുകയായിരുന്നു. പോലീസ് നടപടിയില്‍ പ്രതിഷേധിച്ച് വെള്ളിയാഴ്ച നീലേശ്വരം മുന്‍സിപ്പാലിറ്റി പരിധിയില്‍ ഹര്‍ത്താല്‍ ആചരിക്കാന്‍ സി.പി.എം. നേതൃത്വം ആഹ്വാനം ചെയ്തിട്ടുണ്ട്. സംഭവത്തില്‍ കുറ്റക്കാരായ പോലീസ് ഉദ്യോഗസ്ഥര്‍ക്കെതിരെ നടപടി സ്വീകരിക്കണമെന്ന് പി. കരുണാകരന്‍ എം.പി. ആവശ്യപ്പെട്ടു.

ശശീന്ദ്രന്റെ മൃതദേഹം കാഞ്ഞങ്ങാട് ജില്ലാ ആശുപത്രി മോര്‍ച്ചറിയിലേക്ക് മാറ്റും. വിവരമറിഞ്ഞ് ഉന്നത പോലീസ് ഉദ്യോഗസ്ഥര്‍ സ്ഥലത്തെത്തിയിട്ടുണ്ട്. പോലീസ് സ്‌റ്റേഷനും ദേശീയ പാതയും ഉപരോധിച്ച നാട്ടുകാരുമായി ചര്‍ച്ച നടത്തിവരികയാണ്.

ചിറപ്പുറത്തെ കുട്ടിരാമന്‍-കൂഞ്ഞമ്മാര്‍ ദമ്പതികളുടെ മകനാണ് ശശീന്ദ്രന്‍. സഹോദരങ്ങള്‍: കെ.വി. ഗംഗാധരന്‍, ശ്രീധരന്‍, മുരളീധരന്‍, രാധ, ശ്രീജയ, ശ്രീകല.

Related News:
യുവാവ് കിണറ്റില്‍ വീണ് മരിച്ച സംഭവത്തില്‍ എസ്.ഐയ്ക്ക് സസ്‌പെന്‍ഷന്‍ ഞങ്ങളുടെ Facebookലും Twitterലും അംഗമാകൂ. ഓരോ വാര്‍ത്തയും കാസര്‍കോട് വാര്‍ത്തയിലൂടെ അറിയാം.