ഹാജി ടി.എം. കുഞ്ഞി സ്മാരക അവാര്‍ഡ് എസ്.എ.എം. ബഷീറിന്

കാസര്‍കോട്: കാസര്‍കോട് ജില്ലാ മാപ്പിളപ്പാട്ട് ആസ്വാദക സംഘത്തിന്റെ പ്രസിഡന്റായിരുന്ന  ഹാജി ടി.എം. കുഞ്ഞിയുടെ സ്മരണാര്‍ത്ഥം മൊഗ്രാല്‍ മാപ്പിളപ്പാട്ട് ആസ്വാദക സംഘം ഏര്‍പെടുത്തിയ അവാര്‍ഡിന് ഖത്തര്‍ കെ.എം.സി.സി. നേതാവ് എസ്.എ.എം. ബഷീര്‍ അര്‍ഹനായതായി ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു.

അഡ്വ. ബി.എഫ്. അബ്ദുര്‍ റഹ് മാന്‍, ഉമേഷ് സാലിയാന്‍, ഹമീദ് കാവില്‍, അഷ്‌റഫ് അലി ചേരങ്കൈ എന്നിവരടങ്ങിയ ജൂറികമ്മിറ്റിയാണ് അവാര്‍ഡ് ജേതാവിനെ തെരഞ്ഞെടുത്തത്. സാമൂഹ്യ-സാംസ്‌ക്കാരിക-ജീവകാരുണ്യ രംഗത്തെ സംഭാവനകള്‍ മാനിച്ചാണ് എസ്.എ.എം. ബഷീറിനെ അവാര്‍ഡിനായി തെരഞ്ഞെടുത്തത്, 11,111 രൂപയും പ്രശസ്തി പ്രത്രവും മൊമന്റോയും അടങ്ങുന്നതാണ് അവാര്‍ഡ്.

ഫെബ്രുവരി അവസാനവാരം ന്യൂഡല്‍ഹിയില്‍വെച്ച് നടക്കുന്ന ചടങ്ങില്‍ അവാര്‍ഡ് വിതരണം ചെയ്യും. ബോംബൈ-കേരള ജമാഅത്ത് സെക്രട്ടറി, അവിഭക്ത കണ്ണൂര്‍ ജില്ലാ യൂത്ത് ലീഗ് സെക്രട്ടറി, ചന്ദ്രിക കാസര്‍കോട് ലേഖകന്‍, പത്രാധിപ സമിതി അംഗം എന്നീ നിലയില്‍ പ്രവര്‍ത്തിച്ച ബഷീര്‍ 12 വര്‍ഷം ഖത്തര്‍ കെ.എം.സി.സി. പ്രസിഡന്റായും മൂന്ന് വര്‍ഷം ജനറല്‍ സെക്രട്ടറിയായും പ്രവര്‍ത്തിച്ചിട്ടുണ്ട്.

ഇതിനിടയില്‍ ഖത്തര്‍ കെ.എം.സി.സിയുടെ സാമൂഹ്യ സുരക്ഷാപദ്ധതിയും, സ്‌നേഹപൂര്‍വ്വം പദ്ധതിയും ആവിഷ്‌ക്കരിച്ച് ശ്രദ്ധേയനായിരുന്നു. കുമ്പള മഹാത്മാ ചെയര്‍മാന്‍ കൂടിയാണ് ഇദ്ദേഹം. ഭാര്യ: ഷമീമ. മൂന്ന് മക്കളുണ്ട്.

വാര്‍ത്താ സമ്മേളനത്തില്‍ അഡ്വ. ബി.എഫ്. അബ്ദുര്‍ റഹ്മാന്‍, ഉമേഷ് സാലിയാന്‍, ടി.എം. ശുഹൈബ്, മാപ്പിളപ്പാട്ട് ആസ്വാദക സംഘം ജില്ലാ സെക്രട്ടറി എം.കെ. അബ്ദുല്ല, ടി.കെ. അന്‍വര്‍ എന്നിവര്‍ സംബന്ധിച്ചു.