റേഷന്‍ കടയില്‍ വിതരണത്തിനെത്തിച്ചത് പഴകിയ അരി

കാസര്‍കോട്: കാസര്‍കോട് നുള്ളിപ്പാടിയിലെ റേഷന്‍ കടയില്‍ വിതരണത്തിനെത്തിച്ച അരിച്ചാക്കുകളില്‍ ഒന്നില്‍ പഴകിയ അരി കണ്ടെത്തി. നാട്ടുകാര്‍ വിവരം അറിയിച്ചതിന്റെ അടിസ്ഥാനത്തില്‍ താലൂക്ക് സപ്ലൈ ഓഫീസറുടെ നേതൃത്വത്തില്‍ ഉദ്യോഗസ്ഥരെത്തി അരി കസ്റ്റഡിയിലെടുത്തു. ഇവിടെ നിന്നും കണ്ടെടുത്ത ഒരു ചാക്ക് പച്ചരി സിമന്റ് പൊടികലര്‍ത്തിയ നിലയിലായിരുന്നു.

നീലേശ്വരം എഫ്.സി.ഐയില്‍ നിന്നുമാണ് അരികൊണ്ടുവന്നത്. നുള്ളിപ്പാടിയിലെ അരുണ്‍കുമാറിന്റെ ഉടമസ്ഥതയിലുള്ള റേഷന്‍ കടയില്‍നിന്നുമാണ് ഉപയോഗ ശ്യൂന്യമായ അരി കണ്ടെത്തിയത്. ഇതിന് മുമ്പും ഇത്തരത്തില്‍ എഫ്.സി.ഐയില്‍ നിന്നും അരികിട്ടിയിട്ടുണ്ടെന്ന് കടയുടമ അരുണ്‍കുമാര്‍ പറഞ്ഞു. തുന്നികെട്ടിയ നിലയിലായിരുന്നു അരി ഉണ്ടായിരുന്നത്. സാധാരണ അരി സ്റ്റിച്ച് ചെയ്താണ് എത്താറുള്ളത്.

രാവിലെ ഉപഭോക്താക്കള്‍ക്ക് നല്‍കാനായി അരിച്ചാക്ക് പൊട്ടിച്ചപ്പോഴാണ് നിറയെ സിമന്റ് മാലിന്യം കണ്ടെത്തിയത്. താലൂക്ക് സപ്ലൈ ഓഫീസര്‍ പി.ബി. വേണുഗോപാലന്റെ നേതൃത്വത്തില്‍ പരിശോധന നടത്തി അരി കസ്റ്റഡിയിലെടുത്തു. സിമന്റ് പൊടി കലര്‍ത്തിയ അരി വില്‍ക്കരുതെന്ന് സപ്ലൈ ഓഫീസര്‍ ഉടമയ്ക്ക് നിര്‍ദേശം നല്‍കി. സംഭവത്തെകുറിച്ച് അന്വേഷിച്ച് നടപടി സ്വീകരിക്കുമെന്നും റേഷന്‍ കടകളിലും പരിശോധന നടത്തുമെന്നും അദ്ദേഹം അറിയിച്ചു.