ഡി.വൈ.എഫ്.ഐയുടെ കലക്ടറേറ്റ് ഉപരോധം തുടങ്ങി

കാസര്‍കോട്: ഡി.വൈ.എഫ്.ഐ സംസ്ഥാന വ്യാപകമായി ഭരണ സിരാ കേന്ദ്രങ്ങള്‍ ഉപരോധിക്കുന്നതിന്റെ ഭാഗമായുള്ള കാസര്‍കോട് കലക്ടറേറ്റ് ഉപരോധം ആരംഭിച്ചു. രാവിലെ ആറ് മണിക്ക് തന്നെ ജില്ലയിലെ വിവിധ ഭാഗങ്ങളില്‍ നിന്നെത്തിയ ഡി.വൈ.എഫ്.ഐ. പ്രവര്‍ത്തകര്‍ സിവില്‍ സ്റ്റേഷനിലേക്കുള്ള കവാടങ്ങള്‍ വളയുകയായിരുന്നു. ഇതുമൂലം ഓഫീസുകളിലേക്ക് ജീവനക്കാര്‍ക്ക് കടക്കാനായില്ല.

വന്‍ പോലീസ് കാവലാണ് സ്ഥലത്ത് ഏര്‍പെടുത്തിയിട്ടുള്ളത്. 25,000 ത്തോളം പ്രവര്‍ത്തകരാണ് ഉപരോധത്തില്‍ പങ്കെടുക്കുന്നത്. അതാത് യൂണിറ്റുകളില്‍ നിന്ന് കാല്‍നട ജാഥകളായി എത്തിയ പ്രവര്‍ത്തകര്‍ ഞായറാഴ്ച രാത്രി വിവിധ സ്ഥലങ്ങളില്‍ തമ്പടിച്ച് തിങ്കളാഴ്ച പുലര്‍ചെ തന്നെ കലക്ടറേറ്റ് ലക്ഷ്യമാക്കി നീങ്ങുകയായിരുന്നു.


നിയമനനിരോധനം, അഴിമതി, വിലക്കയറ്റം എന്നിവയ്‌ക്കെതിരെയാണ് വൈകിട്ട് വരെ നീളുന്ന ഉപരോധം സംഘടിപ്പിച്ചിരിക്കുന്നത്. തലസ്ഥാനത്ത് സെക്രട്ടറിയേറ്റും മറ്റിടങ്ങളില്‍ കലക്ട്രേറ്റുകളും ഡി.വൈ.എഫ്.ഐ. പ്രവര്‍ത്തകര്‍ ഉപരോധിക്കുകയാണ്.

കാസര്‍കോട് കലക്ട്രേറ്റ് ഉപരോധം രാവിലെ 10 മണിയോടെ ഡി.വൈ.എഫ്.ഐ. സംസ്ഥാന സെക്രട്ടറി എം. സ്വരാജ് ഉദ്ഘാടനം ചെയ്തു. ജില്ലാ പ്രസിഡന്റ് രാജ്‌മോഹന്‍, സെക്രട്ടറി കെ. മണികണ്ഠന്‍, സി.പി.എം. ജില്ലാ സെക്രട്ടറി കെ.പി. സതീശ് ചന്ദ്രന്‍ തുടങ്ങിയ നേതാക്കള്‍ സംബന്ധിച്ചു.