3 വിദ്യാര്‍ത്ഥികള്‍ക്ക് അധ്യാപകന്‍ പ്രാകൃത ശിക്ഷ വിധിച്ച സംഭവം ഒതുക്കി

കാസര്‍കോട്: കാസര്‍കോട്ടെ ഒരു സ്വകാര്യ സ്‌കൂളില്‍ അധ്യാപകന്‍ വിദ്യാര്‍ത്ഥികളെ പ്രാകൃതമായി പീഡിപ്പിച്ച പരാതി പ്രിന്‍സിപ്പാള്‍ ഒതുക്കി. അണങ്കൂര്‍, തളങ്കര സ്വദേശികളായ മൂന്ന് വിദ്യാര്‍ത്ഥികളുടെ രക്ഷിതാക്കള്‍ ഇതുസംബന്ധിച്ച് സ്‌കൂള്‍ പ്രിന്‍സിപ്പളിന് പരാതി നല്‍കിയിരുന്നു. എട്ടാംതരം എ-ഡിവിഷനില്‍ പഠിക്കുന്ന വിദ്യാര്‍ത്ഥികളാണ് അധ്യാപകനെതിരെ പരാതിയുമായി രംഗത്തുവന്നത്. ഇക്കഴിഞ്ഞ 22ന് കുട്ടികള്‍ സ്റ്റാഫ് റൂമില്‍പോയി ക്ലാസില്‍ തിരിച്ചെത്താന്‍ നാല് മിനിറ്റ് വൈകിയതിനാണ് അധ്യാപകന്‍ കുട്ടികളെ സ്‌കെയിലും ചൂരല്‍ വടികൊണ്ടും ക്രൂരമായി അടിക്കുകയും മര്‍ദിക്കുകയും ചെയ്തത്.

ഇതിനുപുറമെ കേട്ടാല്‍ അറക്കുന്ന ഭാഷയില്‍ കുട്ടികളേയും അവരുടെ രക്ഷിതാക്കളേയും അസഭ്യം പറയുകയും ചെയ്തു. അനുസരണക്കേട് കാണിച്ചാല്‍ വിദ്യാര്‍ത്ഥികളേയും പരാതിയുമായെത്തിയാല്‍ രക്ഷിതാക്കളേയും കത്തികൊണ്ട് കുത്തിക്കൊല്ലുമെന്നും അധ്യാപകന്‍ ഭീഷണിപ്പെടുത്തിയിരുന്നു. കുട്ടികളുടെ അഭിമാനത്തിന് ക്ഷതമുണ്ടാക്കുന്ന രീതിയില്‍ ക്ലാസ് റൂം മുതല്‍ സ്റ്റാഫ് റൂം വരെ അടിച്ച് ഓടിക്കുകയും ചെയ്തതായും പരാതിയുണ്ട്.

ഒരു വിദ്യാര്‍ത്ഥിയുടെ കൈക്ക് അടിയേറ്റ പാട് കണ്ട് വീട്ടുകാര്‍ അന്വേഷിച്ചപ്പോഴാണ് സ്‌കൂളിലെ പീഡന കഥ പുറത്തറിഞ്ഞത്. സംഭവത്തെകുറിച്ച് രക്ഷിതാക്കള്‍ പ്രിന്‍സിപ്പാളിന് പരാതിനല്‍കിയപ്പോള്‍ സംഭവം ഒതുക്കി തീര്‍ക്കാനും പുറത്ത് പറയാതിരിക്കാനും പ്രിന്‍സിപ്പാള്‍ സമ്മര്‍ദം ചെല്ലുത്തുകയായിരുന്നു. പരാതിയുമായി മുന്നോട്ടുപോയാല്‍ കുട്ടികളുടെ ഭാവിപഠനം സുഗമമാകില്ലെന്നുള്ള മുന്നറിയിപ്പും പ്രിന്‍സിപ്പാള്‍ നല്‍കിയിരുന്നു. സ്‌കൂളിന് പേരുദോഷമുണ്ടാക്കാതിരിക്കാന്‍ സ്‌കൂളില്‍ നടന്ന ഒരു കുറ്റകൃത്യം മൂടിവെക്കാനായിരുന്നു പ്രിന്‍സിപ്പാള്‍ ശ്രമിച്ചതെന്നും ആക്ഷേപമുണ്ട്.

ആരോപണ വിധേയനായ അധ്യാപകനെതിരെ പോലീസില്‍ പരാതി നല്‍കാനും നടപടി സ്വീകരിക്കാനും തയ്യാറാകുന്നതിന് പകരം പ്രിന്‍സിപ്പാള്‍ സംഭവം ഒതുക്കിത്തീര്‍ക്കാന്‍ ശ്രമിച്ചത് വിവാദമായിട്ടുണ്ട്. അധ്യാപകന്‍ ബോര്‍ഡില്‍ ചോക്കുകൊണ്ട് എഴുതിയത് ചിലകുട്ടികളെകൊണ്ട് നാക്ക് കൊണ്ട് മായ്പ്പിച്ച സംഭവവും ഇതേ സ്‌കൂളില്‍ നടന്നതായും പരാതിയുണ്ട്. നേരത്തേയും കുട്ടികള്‍ക്ക്‌നേരെ ഇത്തരം ക്രൂരമായ ശിക്ഷാ നടപടികള്‍ അധ്യാപകന്‍ സ്വീകരിച്ചതായും കുട്ടികളും രക്ഷിതാക്കളും പറയുന്നു. അതിനിടെ കുട്ടികളെ അടിച്ചുപരിക്കേല്‍പിച്ച അധ്യാപകനെ പിരിച്ചുവിട്ടതായും സ്‌കൂള്‍ അധികൃതര്‍ വിശദീകരിച്ചു. അതിനിടെ സ്‌കൂളില്‍ അച്ചടക്ക നടപടിയുമായി ബന്ധപ്പെട്ട് മറ്റൊരു പ്രശ്‌നവും പുകയുന്നുണ്ട്.

Also read:
വിദ്യാര്‍ത്ഥിയെ കൊണ്ട് കാല്‍ തിരുമ്മിച്ച അധ്യാപികയ്ക്ക് സസ്‌പെന്‍ഷന്‍
Keywords: Kasaragod, School, Teacher, Student, Assault, Complaint, Injured, Kerala, Malayalam News, National News, Kerala News, International News, Sports News, Entertainment, Stock News. current top stories, photo galleries, Top Breaking News on Politics and Current Affairs in India & around the World, discussions, interviews and more, Kerala culture, Malayalam comedy, Malayalam news channel, Kerala news paper, News malayalam, Today news paper, Today cricket news, Malayalam hot news, Malayalam kathakal, Live malayalam news, News Kerala, Malayalam gulf news.