കാസര്‍കോട്ടെ പ്രമുഖര്‍ക്ക് 'ബ്ലേഡ്' വ്യാപാരവുമായി ബന്ധം; പോലീസിന് അനക്കമില്ല

കൊള്ള പലിശയ്ക്ക് പണം കൊടുക്കുന്നവരുടെ പിന്നില്‍ പ്രവര്‍ത്തിക്കുന്നവര്‍ ആരെല്ലാമെന്നതിന് കൃത്യമായ തെളിവുകള്‍ ഇതിനകം പുറത്തുവന്നിട്ടുണ്ട്. ബ്ലേഡ് വ്യാപാരം വഴിയുള്ള കൊള്ളലാഭത്തില്‍ നിന്നും ലഭിക്കുന്ന പണം മറ്റു ബിസിനസുകളിലും വിനിയോഗിക്കുന്നവരുമുണ്ട്. കൊള്ളപലിശയ്ക്ക് പണം കുത്തിയൊഴുക്കിവിടുന്ന പ്രമുഖരെ കുറിച്ചുള്ള കൃത്യമായ വിവരം പോലീസിലെ ചില ഉന്നതര്‍ക്ക് കിട്ടിയതായി വിവരമുണ്ട്.

സമൂഹത്തില്‍ മാന്യന്‍മാരായി വിലസുന്ന ചിലരുടേയെങ്കിലും സമ്പത്തിന്റെ പ്രധാന ഉറവിടം ബ്ലേഡ് വ്യാപാരത്തില്‍ നിന്നുള്ള കൊള്ള പലിശയാണെന്നും വ്യക്തമായിക്കഴിഞ്ഞു. റിയല്‍ എസ്റ്റേറ്റ് രംഗത്ത് പ്രവര്‍ത്തിക്കുന്ന പലര്‍ക്കും ആരുമറിയാത്ത ബ്ലേഡ് വ്യാപാരം വെറും സൈഡ് ബിസിനസ് മാത്രമാണ്. പുത്തന്‍ പണക്കാരയ ഇത്തരക്കാരുടെ പിന്നാമ്പുറത്ത് ബ്ലേഡിന്റെ തിളങ്ങുന്ന വെളിച്ചമാണ് മിന്നുന്നത്.

ഭര്‍ത്താക്കന്‍മാര്‍പോലും അറിയാതെ ബ്ലേഡ് വ്യാപരത്തില്‍ പണം നിക്ഷേപിക്കുകയും ഇതില്‍ പങ്കാളികളാവുകയും ചെയ്ത നിരവധി സ്ത്രീകളും കാസര്‍കോട്ടുണ്ട്. സ്വര്‍ണം ബാങ്കില്‍ പണയം വെച്ച് ആ പണം ബ്ലേഡ് വ്യാപാരത്തിന് കൊടുക്കുന്നവരും കുറവല്ല. വ്യാപാരികള്‍ക്കിടയിലും ബ്ലേഡ് ഇടപാടുകാരുടെ പ്രവര്‍ത്തനം ശക്തമാണ്. ചില സ്ത്രീകള്‍ നേരിട്ട്തന്നെ പലര്‍ക്കും ബ്ലേഡിടപാടുകാരെ പരിചയപ്പെടുത്തിക്കൊടുക്കുന്നുണ്ട്.