സ്‌കൂള്‍ വിദ്യാര്‍ത്ഥിനി വീട്ടിനകത്ത് തൂങ്ങിമരിച്ച നിലയില്‍

മംഗലാപുരം: 15 വയസുകാരിയായ സകൂള്‍ വിദ്യാര്‍ത്ഥിനിയെ വീട്ടിനകത്ത് തൂങ്ങിമരിച്ചനിലയില്‍ കണ്ടെത്തി. കുന്താപൂര്‍ കോട്ട നേതാജി നഗര്‍ മൂഡുഗിളിയാറിലെ മത്സ്യത്തൊഴിലാളി ശിവയുടേയും കൂലിപ്പണിക്കാരിയായ ബേബിയുടേയും മകള്‍ ശുഭയാണ് മരിച്ചത്.

വെള്ളിയാഴ്ച രാവിലെയാണ് സംഭവം. വ്യാഴാഴ്ച രാത്രി അമ്മയോട് തനിക്ക് 200 രൂപ ആവശ്യമുണ്ടെന്ന് ശുഭ പറഞ്ഞിരുന്നു. എന്നാല്‍ തന്റെപക്കല്‍ പണമില്ലെന്നും അച്ഛന്‍ വന്നാല്‍ വാങ്ങിത്തരാമെന്നും ബേബി ശുഭയോട് പറഞ്ഞു. ഇത് ശുഭയെ വിഷമിപ്പിച്ചുവെന്ന് പറയുന്നു. പിറ്റേന്ന് രാവിലെ അനുജനോടൊപ്പം സ്‌കൂളിലേക്ക് ശുഭ പുറപ്പെട്ടെങ്കിലും സ്‌കൂളില്‍ എത്തിയിരുന്നില്ല. ജോലിക്ക്‌പോയ മാതാവ് രാവിലെ 10.30 മണിയോടെ വീട്ടില്‍ തിരിച്ചെത്തിയപ്പോള്‍ വാതില്‍ അകത്ത് നിന്ന് പൂട്ടിയ നിലയില്‍ കാണപ്പെട്ടു.

അയല്‍ക്കാരുടെ സഹായത്തോടെ വാതില്‍ തകര്‍ത്ത് അകത്തുകടന്നപ്പോള്‍ ശുഭയെ തൂങ്ങിമരിച്ചനിലയില്‍ കാണപ്പെടുകയായിരുന്നു. കോട്ടയിലെ വിവേക് ഗേള്‍സ് ഹൈസ്‌കൂളില്‍ ഒമ്പതാംതരം വിദ്യാര്‍ത്ഥിനിയാണ് ശുഭ. അഞ്ചാം തരംവിദ്യാര്‍ത്ഥി കാര്‍ത്തിക് സഹോദരനാണ്. കോട്ട സി.ഐ. അരുണ്‍ നായിക്ക് വീട് സന്ദര്‍ശിച്ചു. കോട്ട പോലീസ് സംഭവത്തില്‍ കേസെടുത്തു.