ഗവ. കോളജ് സംഘട്ടനം: 10 പേര്‍ക്കെതിരെ കേസ്

By kvarthakgd1Sep 28, 2013, 12:29 IST

കാസര്‍കോട്: കാസര്‍കോട് ഗവ കോളജില്‍ വെള്ളിയാഴ്ചയുണ്ടായ എസ്.എഫ്.ഐ-എം.എസ്.എഫ് സംഘട്ടനത്തില്‍ രണ്ട് പരാതികളിലായി 10 പേര്‍ക്കെതിരെ പോലീസ് കേസെടുത്തു. എസ്.എഫ്.ഐ പ്രവര്‍ത്തക അജാനൂര്‍ മൂലക്കണ്ടത്തെ അര്‍ച്ചന (20)യുടെ പരാതിയില്‍ എം.എസ്.എഫ് പ്രവര്‍ത്തകരായ ഉനൈസ്, നയീം, മുഹമ്മദ്, നവാസ് എന്നിവര്‍ക്കെതിരെയാണ് ഒരു കേസ്.

എസ്.എഫ്.ഐ പ്രവര്‍ത്തകരെ മര്‍ദിക്കുന്നതുകണ്ട് തടയാന്‍ ചെന്നപ്പോള്‍ തന്റെ കൈപിടിച്ച് തിരിച്ചുവെന്നും നിലത്തിട്ട് ചവിട്ടിയെന്നും മാനഹാനിയുണ്ടാക്കിയെന്നുമാണ് അര്‍ച്ചനയുടെ പരാതി. എം.എസ്.എഫ് പ്രവര്‍ത്തകന്‍ പള്ളിപ്പുഴയിലെ മുഹമ്മദ്കുഞ്ഞി (21)യുടെ പരാതിയില്‍ എസ്.എഫ്.ഐ പ്രവര്‍ത്തകരായ ശിവപ്രസാദ്, ശ്രീകാന്ത്, ശ്രീനാഥ്, വര്‍ഗീസ്, രാജേഷ്, പ്രജേഷ് എന്നിവര്‍ക്കെതിരെയും പോലീസ് കേസെടുത്തു.