നക്‌സല്‍ ബന്ധം: 4 വര്‍ഷമായി ജയിലിലായിരുന്ന സരോജയ്ക്ക് മോചനം

മംഗലാപുരം: നക്‌സല്‍ ബന്ധം ആരോപിച്ച് ജയിലിലടച്ച ഹൊരോളെ സരോജ ജയില്‍ മോചിതയായി. കഴിഞ്ഞ നാലുവര്‍ഷത്തോളമായി ജയില്‍ ജീവിതം നയിച്ചിരുന്ന സരോജ ബുധനാഴ്ചയാണ് ജയില്‍ മോചിതയായത്.  നക്‌സല്‍ ബന്ധം ആരോപിച്ച് സരോജയ്‌ക്കെതിരെ ഉഡുപ്പി, കുന്ദാപുരം, കാര്‍ക്കള എന്നിവിടങ്ങളിലാണ് കേസുണ്ടായിരുന്നത്.

2009 ലാണ് ചിക്കമാംഗലൂര്‍ ജില്ലയിലെ ഹൊരാളെയിലെ സരോജ (29), ദേവേന്ദ്ര (37) എന്നിവരെ പോലീസ് നക്‌സല്‍ ബന്ധം ആരോപിച്ച് മൈസൂര്‍ ജയിലിലടച്ചത്. 2010 ല്‍ കേസ് ഉഡുപ്പി പോലീസിന് കൈമാറുകയും സരോജയെ മംഗലാപുരം സബ്ജയിലിലേക്ക് മാറ്റുകയും ചെയ്തു. 22 ഓളം കേസുകളാണ് പോലീസ്  സരോജയുടെയും ദേവേന്ദ്രയുടേയും  മേല്‍ ചുമത്തിയിരുന്നത്.  ഇതില്‍ പത്തോളം കേസുകള്‍ കുന്ദാപുരം, ഉഡുപ്പി, കാര്‍ക്കള എന്നീ  കോടതികളാണ് പരിഗണിക്കുന്നത്. കുന്ദാപൂരത്തെ പത്തോളം കേസുകള്‍ മാര്‍ച്ച് മാസത്തില്‍ അവസാനിപ്പിച്ചിരുന്നു.

പോലീസ് നക്‌സല്‍ ബന്ധമാരോപിച്ച് തന്നെ കള്ളക്കേസില്‍ കുടുക്കുകയായിരുന്നുവെന്ന് ജയില്‍ മോചിതയായ സരോജ ആരോപിച്ചു. ജയില്‍ മോചിതയായതില്‍ അതീവസന്തോഷമുണ്ടെന്നും, തന്നെപ്പോലെ നിരപരാധിയായ ഒരാളെ ജയിലിലടയ്ക്കാതിരിക്കാനായി നിയമയുദ്ധം നടത്തുമെന്നും അവര്‍ മാധ്യമപ്രവര്‍ത്തകരോട്  പറഞ്ഞു.
ജമ്മുകശ്മീരില്‍ രണ്ടിടങ്ങളില്‍ തീവ്രവാദി ആക്രമണം: സാംബ സൈനീക ക്യാമ്പില്‍ കനത്ത പോരാട്ടം