കരാറുകാരന്റെ വീട്ടിലെ വെടിവെപ്പ്: ബാലസ്റ്റിക് വിദഗ്ദ്ധന്‍ എത്തി; അന്വേഷണം സ്‌പെഷ്യല്‍ ടീമിന്

By Web Desk SreJul 19, 2013, 12:48 IST

കാസര്‍കോട്: പി.ഡബ്യൂ.ഡി കരാറുകാരന്‍ ബേവിഞ്ചയിലെ എം.ടി. മുഹമ്മദ്കുഞ്ഞി ഹാജിയുടെ വീടിനു നേരെയുണ്ടായ വെടിവെപ്പ് കേസുമായി ബന്ധപ്പെട്ട് തിരുവനന്തപുരത്തു നിന്നും ബാലസ്റ്റിക് വിദഗ്ദ്ധനെത്തി തെളിവു ശേഖരിച്ചു.

ബാലസ്റ്റിക് വിദഗ്ധന്‍ ഡോ. ജയചന്ദ്രനാണ് വെള്ളിയാഴ്ച രാവിലെ എട്ടു മണിയോടെ വെടിവെപ്പ് നടന്ന വീട്ടില്‍ പരിശോധന നടത്തിയത്. പൊട്ടാതെ കിടന്ന വെടിയുണ്ടയും ജനല്‍ ഗ്ലാസിലും ചുമരിലും തുളഞ്ഞു കയറിയ വെടിയുണ്ടയുടെ ദ്വാരവും അവശിഷ്ടവും പരിശോധിച്ച് തെളിവ് ശേഖരിച്ചു. വീടിന്റെ വളരെ അടുത്ത് നിന്നാണ് വെടിവെപ്പ് നടന്നതെന്ന് വ്യക്തമായിട്ടുണ്ട്.

ഏതു തരം എം.എം പോയിന്റുള്ള തോക്കാണ് വെടിവെപ്പിന് ഉപയോഗിച്ചതെന്ന് വിശദമായി പരിശോധിച്ച ശേഷം മാത്രമെ പറയാന്‍ കഴിയുകയുള്ളൂവെന്നാണ് ബാലസ്റ്റിക് വിദഗ്ദ്ധന്‍ അറിയിച്ചത്. റിവോള്‍വറില്‍ നിന്നാണ് വെടിയുയര്‍ത്തിയതെന്ന് കണ്ടെത്തിയിട്ടുണ്ട്.

വ്യാഴാഴ്ച്ച പുലര്‍ച്ചെ 5.15 മണിയോടെയാണ് മുഹമ്മദ് കുഞ്ഞിയുടെ വീട്ടിലേക്ക് ബൈക്കിലെത്തിയ രണ്ടംഗ സംഘം തുരുതുരെ വെടിയുതിര്‍ത്തത്. ഭാഗ്യം കൊണ്ടാണ് മുഹമ്മദ് കുഞ്ഞിയുടെ ഭാര്യ മറിയം വെടിയേല്‍ക്കാതെ രക്ഷപ്പെട്ടത്. ഇവരുടെ തലയ്ക്ക് മുകളിലൂടെയാണ് വെടിയുണ്ട ചീറിപ്പാഞ്ഞത്. അതിനിടെ കേസന്വേഷണത്തിന് കാസര്‍കോട് ഡി.വൈ.എസ്.പി മോഹന ചന്ദ്രന്റെ നേതൃത്വത്തില്‍ സ്‌പെഷ്യല്‍ ടീമിനെ നിയമിച്ചു. കാസര്‍കോട് സി.ഐയുടെ ചുമതലയുള്ള ട്രാഫിക് സി.ഐ പ്രേംസദന്‍, വിദ്യാനഗര്‍ എസ്.ഐ സുഭാഷ് എന്നിവരടങ്ങുന്ന സ്‌പെഷ്യല്‍ ടീമാണ് രൂപീകരിച്ചത്.

മുമ്പ് നടന്ന വെടിവെപ്പ് കേസില്‍ ബാംഗ്ലൂര്‍ ജയിലില്‍ വെച്ച് പോലീസ് ചോദ്യം ചെയ്ത മൂന്നു പേരെ ഇപ്പോഴുണ്ടായ വെടിവെപ്പുമായി ബന്ധപ്പെട്ട് ചോദ്യം ചെയ്യുമെന്നാണ് അന്വേഷണ സംഘം നല്‍കുന്ന സൂചന. മംഗലാപുരത്തെ അധോലോക നേതാവ് രവി പൂജാരിയുടെ സംഘത്തില്‍പെട്ട ചിലരെയാണ് വെടിവെപ്പുമായി ബന്ധപ്പെട്ട് പോലീസ് സംശയിക്കുന്നത്. കാസര്‍കോട്ടുകാരായ ചിലരും രവി പൂജാരി സംഘത്തില്‍ ഉണ്ടെന്നാണ് വിവരം.