സി.എല്‍ മുഹമ്മദലിയുടെ മൃതദേഹം ഖബറടക്കി

ചെമ്മനാട്: അന്തരിച്ച കോണ്‍ഗ്രസ് നേതാവും സാംസ്‌കാരിക പ്രവര്‍ത്തനും ജില്ലയിലെ ആദ്യകാല ഫോട്ടോഗ്രാഫറുമായ സി.എല്‍ മുഹമ്മദലി (62)യുടെ മൃതദേഹം ഖബറടക്കി. വൈകിട്ട് നാല് മണിയോടെ നൂറുകണക്കിനാളുകളുടെ സാന്നിധ്യത്തില്‍ ചെമ്മനാട് ജുമാമസ്ജിദ് ഖബര്‍സ്ഥാനിലാണ് ഖബറടക്കിയത്.

അസുഖ ബാധിതനായി ഒരു വര്‍ഷത്തോളമായി ചികിത്സയിലായിരുന്ന മുഹമ്മദലി ബുധനാഴ്ച പുലര്‍ചെയാണ് മരിച്ചത്. മരണ വിവരമറിഞ്ഞ് പ്രമുഖരടക്കം സമൂഹത്തിന്റെ നാനാതുറകളിലുള്ള നൂറുകണക്കിനാളുകള്‍ വീട്ടിലെത്തി അന്തിമോപചാരം അര്‍പിച്ചു. പൊതുപ്രവര്‍ത്തനത്തിന്റെ വൈവിധ്യമാര്‍ന്ന മേഖലകളിലൊക്കെ തന്റേതായ രീതിയില്‍ ഇടപെടുകയും പരിഹാരമുണ്ടാക്കാന്‍ യത്‌നിക്കുകയും ചെയ്ത മുഹമ്മദലി ഏവര്‍ക്കും പ്രിയങ്കരനായിരുന്നു.

വിദ്യാര്‍ത്ഥിയായിരിക്കെ കെ.എസ്.യുവിലൂടെ പൊതുപ്രവര്‍ത്തന രംഗത്തെത്തിയ അദ്ദേഹം കര്‍ഷക കോണ്‍ഗ്രസ് അവിഭക്ത കണ്ണൂര്‍ ജില്ലാ പ്രസിഡണ്ട്, കോണ്‍ഗ്രസ് ഉദുമ മണ്ഡലം സെക്രട്ടറി, പ്രവാസി കോണ്‍ഗ്രസ് ജില്ലാ പ്രസിഡണ്ട്, സംസ്‌കാര സാഹിതി ജില്ലാ ചെയര്‍മാന്‍ തുടങ്ങിയ സ്ഥാനങ്ങള്‍ അലങ്കരിച്ചു. അതിന് പുറമെ പരവനടുക്കം പ്രിയദര്‍ശിനി കലാവേദി രക്ഷാധികാരി, പാലിച്ചിയടുക്കം നൂര്‍ മസ്ജിദ് കമ്മിറ്റി പ്രസിഡണ്ട് എന്നീ നിലകളിലും പ്രവര്‍ത്തിച്ചു.

ചിത്രകാരനും ഫോട്ടോഗ്രാഫറും സഹൃദയനും നല്ലൊരു വായനക്കാരനും ആയിരുന്നു മുഹമ്മദലി. കേന്ദ്രമന്ത്രിമാരായ എ.കെ. ആന്റണി, മുല്ലപ്പള്ളി രാമചന്ദ്രന്‍ തുടങ്ങിയ കോണ്‍ഗ്രസ് നേതാക്കളുമായി നല്ല അടുപ്പത്തിലായിരുന്നു. വലിയൊരു സുഹൃദ് വലയമാണ് അദ്ദേഹത്തിനുണ്ടായിരുന്നത്.

Also Read: 
ജയിലിലെ പീഡനം: വിദ്യാര്‍ത്ഥിക്ക് നാല് മില്യണ്‍ ഡോളര്‍ നഷ്ടപരിഹാരം